ទិវាអន្តរជាតិប្រយុទ្ធប្រឆាំងគ្រឿងញៀ.ននៅខេត្តស្វាយរៀង
ខេត្តស្វាយរៀង ៖ នៅស្នងការដ្ឋាននគរបាលខេត្ត មានរៀបចំពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀ.ន ក្រោមប្រធានបទ «ចូរធ្វើឲ្យជីវិត និងសហគមន៍យើងគ្មានគ្រឿងញៀ.ន»
ខេត្តស្វាយរៀង ៖ នៅស្នងការដ្ឋាននគរបាលខេត្ត មានរៀបចំពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន ក្រោមប្រធានបទ «ចូរធ្វើឲ្យជីវិត និងសហគមន៍យើងគ្មានគ្រឿងញៀន» ដោយមានការអញ្ជើញចូលរួមជាគណៈអធិបតីពី លោក ជៀង អំ អភិបាលខេត្ត លោកឧត្តមសេនីយ៍ឯក មាស វិរិទ្ធ អគ្គលេខានៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ព្រមទាំងលោកស្នងការ ស្នងការរង មន្ត្រីរាជការ មន្ត្រីនគរបាល ព្រមទាំងសិស្សានុសិស្ស សរុបចំនួន២៥០នាក់ ។
ទិវានេះ បានរៀបចំធ្វើឡើងនៅម៉ោង៨ព្រឹកថ្ងៃទី៣ កក្កដា ២០១៥ នៅសាលប្រជុំស្នងការដ្ឋាននគរបាលខេត្ត ស្ថិតនៅភូមិមេភ្លើង សង្កាត់ស្វាយរៀង ក្រុងស្វាយរៀង ។
លោកឧត្តមសេនីយ៍ត្រី កឹង ឃន ស្នងការនគរបាលខេត្ត បានរាយការណ៍ថា ផ្អែកតាមអនុសាសន៍ដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គណៈកម្មាធិការត្រួតពិនិត្យគ្រឿងញៀនខេត្ត ស្នងការដ្ឋាននគរបាលខេត្ត បានអនុវត្តវិធានការបង្ការនិងបង្ក្រាបបទល្មើសគ្រឿងញៀន តាមរយៈការចាត់តាំងអនុវត្តគោលនយោបាយភូមិឃុំមានសុវត្ថិភាព ផ្សព្វផ្សាយអប់រំដល់មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ និស្សិត សិស្សានុសិស្ស និងពលរដ្ឋទូទាំងខេត្ត លើកកម្ពស់ការយល់ដឹងអំពីផលប៉ះពាល់នៃការប្រើថ្នាំញៀន និងច្បាប់ស្តីពីការត្រួតពិនិត្យគ្រឿងញៀន ។
លោកស្នងការខេត្ត បន្តទៀតថា រយៈពេលមួយឆ្នាំនេះ ជាក់ស្តែងការិយាល័យជំនាញសហការជាមួយកម្លាំងអធិការដ្ឋាននគរបាលស្រុក ក្រុង ប៉ុស្ត៍រដ្ឋបាល និងកម្លាំងពាក់ព័ន្ធ ចុះបង្ក្រាបបទល្មើសគ្រឿងញៀនបានចំនួន៩ករណី និងឃាត់ខ្លួនជនសង្ស័យបានចំនួន២៦នាក់ (ស្ត្រី៤នាក់) កសាងសំណុំរឿងចាត់ការតាមច្បាប់ និងដកហូតវត្ថុតាង រួមមាន ថ្នាំញៀនមេតំហ្វេតាមីន ម្សៅក្រាមពណ៌សចំនួន៥៥កញ្ចប់ ក្នុងនោះ មាន៤១កញ្ចប់តូច និង១៤កញ្ចប់ធំ ទម្ងន់សរុប១២១,៩ក្រាម ។ ម៉ូតូចំនួន៤គ្រឿងទូរស័ព្ទដៃ១៣គ្រឿង និងសម្ភារប្រើប្រាស់គ្រឿងញៀនមួយចំនួន ។
ក្រោយពីលោកឧត្តមសេនីយ៍ឯក មាស វិរិទ្ធ ឡើងអានសារលិខិតរបស់ សម្តេចអគ្គមហាសេនាបតីតេជោ ហ៊ុន សែន រួចមក លោក ជៀង អំ អភិបាលខេត្ត មានមតិផ្តាំផ្ញើក្នុងអង្គពិធីថា ពេលយើងដឹងមានបទល្មើសប្រើប្រាស់ និងចែកចាយគ្រឿងញៀននៅក្នុងមូលដ្ឋាន ត្រូវតែផ្តល់ព័ត៌មាន និងរាយការណ៍ជាបន្ទាន់ឲ្យសមត្ថកិច្ចដើម្បីចុះបង្ក្រាប កុំលាក់លៀម កុំភ័យខ្លាច ។ អនុវត្តឲ្យមានប្រសិទ្ធភាពនូវគោលនយោបាយភូមិឃុំមានសុវត្ថិភាព គឺត្រូវពង្រឹងយន្តការផែនការប្រយុទ្ធប្រឆាំងគ្រឿងញៀនឲ្យមានប្រសិទ្ធភាពខ្ពស់ ។
លោកអភិបាលខេត្ត បន្តទៀតថា គ្រប់ស្ថាប័នទាំងអស់ ទាំងមន្ត្រីរាជការ កងកម្លាំងប្រដាប់អាវុធ និស្សិត សិស្សានុសិស្ស ប្រជាពលរដ្ឋ ព្រះសង្ឃ ត្រូវរួមគ្នាលើកកម្ពស់ការអប់រំផ្សព្វផ្សាយដល់កូនៗ ប្អូនមិត្តភក្តិ ឲ្យយល់ដឹងអំពីផលប៉ះពាល់នៃគ្រឿងញៀន ។ គ្រឿងញៀនបំផ្លាញសុខភាពបណ្តាលឲ្យស្លាប់ និងប៉ះពាល់ដល់សន្តិសុខសង្គមជាតិបាត់បង់ធនធានមនុស្ស កើតមានចោរលួច ចោរប្លន់ នាំឲ្យមានអសន្តិសុខសង្គម ត្រូវឆ្លើយថាទេ នៅឲ្យឆ្ងាយពីគ្រឿងញៀន ។
បន្ទាប់មក លោកឧត្តមសេនីយ៍ឯក មាស វិរិទ្ធ ប្រគល់ថវិកាជូនលោកស្នងការនគរបាលខេត្ត ដើម្បីយកទៅប្រើប្រាស់ក្នុងការបំពេញការងារ ៕
ចែករំលែកព័តមាននេះ