ក្តីកង្វល់របស់លោកកែប ជុតិមា គឺរំដោះជំនន់ទឹកភ្លៀងបញ្ចៀសការជន់លិច
ដោយ ៖ឈិត គឹមឆុន
ថ្ងៃអង្គារ ទី៧ ខែកញ្ញា ឆ្នាំ២០១០ ម៉ោង ១០:២៦
ណារិទ្ធ
លោកអភិបាលរាជធានីទៅពិនិត្យការសំអាតស្ថានីយបូមទឹកចតុមុខ
រាជធានីភ្នំពេញ ៖ បញ្ហាជំនន់ទឹកភ្លៀង គឺជាក្តីកង្វល់ខ្លាំងរបស់អាជ្ញាធររាជធានីភ្នំពេញ ជាពិសេសភាពខ្វល់ខ្វាយរបស់លោកកែប ជុតិមា ដែលតែងតែគិតគូរ មានន័យថា ឱ្យតែមេឃឡើងងងឹតពណ៌ខ្មៅរកកលភ្លៀង គឺជាក្តីបារម្ភព្រោះ ខ្លាចជន់លិចទីក្រុង ទោះជាមានការរៀបចំប្រព័ន្ធលូ ប្រឡាយ ឬស្ថានីយបូមទឹករួចក្តី ។ទោះជាយ៉ាងណាក្នុងឆ្នាំនេះឆ្លងកាត់ភ្លៀងប៉ុន្មានមេធំៗជាប់ៗគ្នា គេសង្កេតឃើញមានភាពប្រសើរ ហាក់មិនមានការជន់លិច ឬដក់ទឹកត្រាំត្រែងនោះទៀតទេ ដោយសារតែការខិតខំប្រឹងប្រែងរិះរកគ្រប់មធ្យោបាយ ក្នុងការសំរួលប្រព័ន្ធបង្ហូរទឹកស្អុយក្រោមដី ហើយរំពឹងថានាពេលឆាប់ៗខាងមុខនេះ បន្ទាប់ពីស្ថានីយបូមទឹកកប់ស្រូវដំណើរការទីក្រុងភ្នំពេញនឹងលែងលិចទៀតហើយ ។
ផ្តើមចេញពីការយកចិត្តទុកដាក់ លោកកែប ជុតិមា អភិបាលរាជធានីភ្នំពេញ តែងចុះទៅពិនិត្យស្ថានភាពទឹក ឬពេលខ្លះលោកបានចុះទៅកាយសំរាម បើកមាត់លូផងដែរនៅពេលភ្លៀង។ ជាក់ស្តែងនៅរសៀលថ្ងៃទី៥ កញ្ញា ២០១០ ក្នុងពេលកំពុងភ្លៀងធ្លាក់មួយមេយ៉ាងធំដែលមានរយៈពេល២ម៉ោង លោកបានដឹកនាំមន្ត្រីជំនាញក្រោមឱវាទចុះពិនិត្យស្ថានភាពទឹកនៅក្នុងភូមិសាស្ត្ររាជធានីភ្នំពេញ ជាពិសេសពិនិត្យតាមស្ថានីយបូមទឹកដើម្បីជាការដាស់តឿនឱ្យមន្ត្រីទទួលខុសត្រូវយកចិត្តទុកដាក់ជំរុញការសំរួលប្រព័ន្ធបង្ហូរទឹកនេះឱ្យរួចបានលឿន ។
ការចុះពិនិត្យស្ថានីយបូមទឹកទាំង៤ទីតាំងតាមដងទន្លេសាបចាប់ពីសាលសន្និសីទចតុមុខដល់មុខផ្សាររាត្រីដែលស្ថិតក្នុងគំរោងការពារទឹកជំនន់ និងកែលំអប្រព័ន្ធប្រឡាយលូក្នុងរាជធានីភ្នំពេញជំហានទី២ ជាជំនួយឥតសំណងរបស់ប្រទេសជប៉ុនសំណង់ស្ថានីយបូមទឹកទាំង៤ទីតាំងនេះនឹងត្រូវសម្ពោធដាក់ឱ្យប្រើប្រាស់ជាផ្លូវការនាថ្ងៃទី១៦ កញ្ញា ខាងមុខនេះ ។ លោកកែបជុតិមា បានណែនាំឱ្យអង្គភាពលូទឹក និងបូមទឹកត្រូវយកចិត្តទុកដាក់ទៅលើការកាយសំរាមចេញពីមុខក្បាលបូម ជាពិសេសនៅពេលមានភ្លៀងធ្លាក់ម្តងៗ ព្រោះសំរាម និងកាកសំណល់ផ្សេងៗជាឧបសគ្គដែលធ្វើឱ្យស្ទះទឹក ជាចាំបាច់ត្រូវដាក់កំលាំងកម្មករប្រចាំការឱ្យកាយចេញជាប្រចាំ ។
ភ្លៀងមួយមេនារសៀលថ្ងៃទី៥ កញ្ញា សង្កេតឃើញថា ការស្ទះទឹកមានការថយចុះក្នុងភូមិសាស្ត្ររាជធានីភ្នំពេញ ។ លោកកែប ជុតិមា បានណែនាំដល់មន្ត្រីក្រោមឱវាទ និងអាជ្ញាធរដែនដីគ្រប់សង្កាត់ ខណ្ឌ ត្រូវចុះមើលលូពេលមានភ្លៀងធ្លាក់នៅក្នុងភូមិសាស្ត្ររបស់ខ្លួន។ ស្ថានីយបូមទឹកបឹងត្របែកជាស្ថានីយមួយដ៏សំខាន់ក្នុងចំណោមស្ថានីយទាំង៩បានដំណើរការបូមយ៉ាងមមាញឹកដោយដំណើរការម៉ូទ័រទាំង៨គ្រឿងដែលក្នុងមួយគ្រឿងអាចបូមទឹកបាន៣៦០០ ម៉ែត្រគូបក្នុងមួយម៉ោង ឯកំលាំងកម្មករក៏មមាញឹកក្នុងការកាយសំរាមចេញដែរ៕
