រាជធានីភ្នំពេញ ៖ យោងតាមរបាយការណ៍សាលាខណ្ឌដូនពេញ បានឲ្យដឹងថា កាលពីវេលាម៉ោង០២ និង៣០នាទីរសៀល ថ្ងៃទី១ កក្កដា ២០១៥ ភ្លៀងលាយខ្យល់ បានបណ្តាលឲ្យដើមអំពិលមួយដើមដួលរលំសង្កត់លើរថយន្តចំនួន៣គ្រឿង និងរបងសួនច្បារ តាមបណ្តោយផ្លូវលេខ១០៨ សង្កាត់វត្តភ្នំ ខណ្ឌដូនពេញ ដើមត្របែកព្រៃមួយដើមទៀតនៅលើកំណាត់ផ្លូវលេខ១០៨ក៏បានដួលរលំ ហើយសង្កត់រថយន្ដពីរគ្រឿងផងដែរ ។
នៅតាមបណ្ដោយផ្លូវលេខ៤៧ សង្កាត់ស្រះចក នៅជិតស្ថានីយប្រេងតូតាល់ និងនៅក្បែរភោជនីយដ្ឋានមណ្ឌលគិរីទី២ មានដើមជ្រៃមួយដើម អាយុកាលរាប់សិបឆ្នាំនោះក៏រលើងឬសដួលរលំកាត់ផ្លូវបណ្ដាលឱ្យសង្កត់រថយន្ដចំនួន២គ្រឿងផងដែរ ។ ដោយឡែកនៅរង្វង់មូលគួចកាណុង សង្កាត់ស្រះចក បង្គោលភ្លើងមួយដើមបានដួលរលំ ប៉ុន្ដែមិនប៉ះពាល់ដល់រថយន្ដ ម៉ូតូ ឬអ្នកដំណើរនោះទេ ។
របាយការណ៍បានឱ្យដឹងទៀតថា នៅក្នុងហេតុការណ៍ខាងលើមិនមានមនុស្សណាម្នាក់រងរបួសទេ គ្រាន់តែខូចខាតរថយន្ត៥គ្រឿងប៉ុណ្ណោះ៕
ចែករំលែកព័តមាននេះ