រាជធានីភ្នំពេញ ៖ កាលពីវេលាម៉ោង០៨ និង៣០នាទីព្រឹកថ្ងៃទី០១ កក្កដា ២០១៥ នៅអគ្គនាយកដ្ឋានគយ និងរដ្ឋាករកម្ពុជា មានប្រារព្ធកិច្ចប្រជុំលើកទី៥របស់យន្តការភាពជាដៃគូគយ-ផ្នែកឯកជន ក្នុងគោលបំណងដោះស្រាយនូវបញ្ហាប្រឈម និងសំណូមពរនានារបស់វិស័យឯកជនពាក់ព័ន្ធនឹងកិច្ចការគយ សំដៅធានាប្រសិទ្ធភាពនៃការអនុវត្តគោលនយោបាយសម្រួលពាណិជ្ជកម្មរបស់រាជរដ្ឋាភិបាលកម្ពុជា។
កិច្ចប្រជុំនេះ បានប្រព្រឹត្តទៅក្រោមអធិបតីភាព សហប្រធាននៃយន្តការភាពជាដៃគូគយ-ផ្នែកឯកជន ឯកឧត្តមបណ្ឌិត គុណ ញឹម អគ្គនាយកនៃ អគ្គនាយកដ្ឋានគយនិងរដ្ឋាករកម្ពុជា និងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ព្រមទាំងមានការចូលរួមពីសំណាក់សមាសភាពដឹកនាំនៃយន្តការនេះ មកពីស្ថាប័នគយនិងរដ្ឋាករ កម្ពុជា និងផ្នែកឯកជនជាច្រើនទៀតរួមមានសភាពាណិជ្ជកម្មកម្ពុជា សមាគមរោងចក្រកាត់ដេរនៅកម្ពុជា សមាគមសហគ្រាសខ្នាតតូច-មធ្យម សមាគមដឹកជញ្ជូនកម្ពុជា ក្លឹបធុរកិច្ចជប៉ុន ក្រុមហ៊ុននាំចេញ-នាំចូល និងតំណាងដៃគូអភិវឌ្ឍអន្តរជាតិ ព្រមទាំងភ្ញៀវជាតិនិងអន្តរជាតិផងដែរ។
ថ្លែងក្នុងសុន្ទរកថាបើក ឯកឧត្តមបណ្ឌិត គុណ ញឹម បានគូសបញ្ជាក់អំពីយន្តការនេះថា បាននិងកំពុងក្លាយជាវេទិកាដ៍សំខាន់មួយសម្រាប់វិស័យឯកជនក្នុងការលើកយកបញ្ហា និងកង្វល់នានាពាក់ព័ន្ធនឹងកិច្ចការគយមកពិគ្រោះ និងពិភាក្សាផ្លាស់ប្តូរយោបល់រវាងដៃគូពាក់ព័ន្ធ ឈានទៅជំរុញឲ្យមានការចូលរួមកាន់តែសកម្មរបស់វិស័យឯកជន ក្នុងការកែលម្អបរិយាកាសធុរកិច្ចនៅកម្ពុជា។
នាឱកាសនោះ តំណាងអគ្គនាយកដ្ឋានគយនិងរដ្ឋាករកម្ពុជា បានធ្វើបទបង្ហាញអំពីវឌ្ឍនភាពនៃកិច្ចដំណើរការយន្តការភាពជាដៃគូគយ-ផ្នែកឯកជន តាមរយៈការរំលឹកឡើងវិញនូវសមិទ្ធផលនានាដែលសម្រេចបានក្នុងកិច្ចប្រជុំរបស់យន្តការនេះ៤លើកកន្លងមក ដោយបានរួមគ្នាដោះស្រាយនូវបញ្ហាពាក់ព័ន្ធនឹងគយបានមួយចំនួនធំ ព្រមទាំងបានចេញនូវបទប្បញ្ញត្តិចាំបាច់នានាក្នុងការធ្វើសាមញ្ញកម្មនីតិវិធីគយ ដើម្បីបង្កលក្ខណៈងាយស្រួលដល់វិនិយោគិន និងធុរជនពាក់ព័ន្ធបន្ថែមទៀត។
បន្ទាប់មកអង្គប្រជុំបានដំណើរការពិភាក្សា និងលើកឡើងនូវលទ្ធភាពដំណោះស្រាយ លើសំណើដែលលើកឡើងដោយផ្នែកឯកជនចំនួន៤៦បញ្ហា ជាពិសេសពាក់ព័ន្ធនឹងការជំរុញល្បឿននៃការបំពេញបែបបទគយ ការផ្សព្វផ្សាយព័ត៌មានតាមគហទំព័រ ការធ្វើវិមជ្ឈការការផ្ទៀងផ្ទាត់វិញ្ញាបនបត្រដើមកំណើតទំនិញ ការបង្កើតកម្រៃផ្លូវការលើសេវាកម្មគយ ការអនុវត្តនីតិវិធីឆ្លងកាត់ ការអនុវត្តយន្តការធុរជនមានអនុលោមភាពខ្ពស់បំផុត និងការត្រួតពិនិត្យទំនិញរួមគ្នារវាងស្ថាប័នមានសមត្ថកិច្ចពាក់ព័ន្ធជាដើម។
ជាលទ្ធផលនៃកិច្ចពិភាក្សានេះ អង្គប្រជុំបានរកឃើញដំណោះស្រាយសមស្រប ប្រកបដោយការយោគយល់គ្នាខ្ពស់តាមបទប្បញ្ញត្តិជាធរមាននិងតាមការអនុវត្តល្អជាអន្តរជាតិ ដែលត្រូវអនុវត្តបន្តដើម្បីឈានទៅបង្កឲ្យមានបរិយាកាសធុរកិច្ចកាន់តែប្រសើរប្រកបដោយសមធម៌។
កិច្ចប្រជុំនេះបានបញ្ចប់នៅវេលាម៉ោង១២ថ្ងៃដដែល ក្រោមបរិយាកាសការងារ និងប្រកបដោយការទទួលខុសត្រូវខ្ពស់ ។
អគ្គនាយកដ្ឋានគយ និងរដ្ឋាករកម្ពុជា
ថ្ងៃទី១ កក្កដា ឆ្នាំ២០១៥
ចែករំលែកព័តមាននេះ