រាជធានីភ្នំពេញ ៖ ចៅក្រមជា សុខហៀង ប្រធានក្រុមប្រឹក្សាជំនុំជម្រះ និងលោកហឹង ប៊ុនថន ជាតំណាងអយ្យការ កាលពីព្រឹកថ្ងៃទី៣០ មិថុនា ២០១៥ នេះ បានបដិសេធការសុំនៅក្រៅឃុំរបស់មេធាវីជនជាប់ចោទចំនួន៨នាក់ ។ ការសម្រេចនេះបានធ្វើឡើងបន្ទាប់ពីការបើកសវនាការជំនុំជម្រះលើបណ្តឹងសុំនៅក្រៅឃុំជាបណ្តោះអាសន្នរបស់ជនជាប់ចោទ៨នាក់ដែលត្រូវបានតុលាការចោទពីបទរួមគំនិតក្បត់ ។
ជនជាប់ចោទទាំង៨នាក់ត្រូវបានសមត្ថកិច្ចស្នងការរាជធានីភ្នំពេញឃាត់ខ្លួនក្នុងអំឡុងបាតុកម្មនាខែតុលា ២០១៤ ។ ក្រុមជនជាប់ត្រូវបានអាជ្ញាធរឃាត់ខ្លួនក្រោមបទចោទថា ចូលរួមក្នុងសកម្មភាពនានា រួមមានការដុតទង់ជាតិនៅខាងមុខស្ថានទូតវៀតណាមប្រចាំនៅកម្ពុជា (ក្នុងរាជធានីភ្នំពេញ) និងការតវ៉ានានារហូតដល់មានហិង្សា ។
ជនជាប់ចោទត្រូវបាននាំខ្លួនចូលសវនាការកាលពីថ្ងៃទី៣០ មិថុនា ២០១៥ រួមមាន១-ឈ្មោះឈុត ឆាត ភេទប្រុស អាយុ២៤ឆ្នាំ ២-ឈ្មោះលី ហេង ភេទប្រុស អាយុ២២ឆ្នាំ ៣-ឈ្មោះលីវ ឃី ភេទប្រុស អាយុ២៤ឆ្នាំ ៤-ឈ្មោះច្រាញ់ មុត ភេទប្រុស អាយុ២៤ឆ្នាំ (និស្សិត) ៥-ឈ្មោះឃុន ណាគង់ ភេទប្រុស អាយុ២៩ឆ្នាំ (គ្រូបង្រៀន) ៦-ឈ្មោះអាន ចាន់ ភេទប្រុស អាយុ៣៥ឆ្នាំ ៧-ឈ្មោះច័ន្ទ ស្មា ភេទប្រុស អាយុ២៧ឆ្នាំ និង៨-ឈ្មោះឈឹម ស្មាត់ អាយុ៥៦ឆ្នាំ ។
ជនជាប់ចោទត្រូវបានតុលាការចោទប្រកាន់ពីបទរួមគំនិតក្បត់ តាមមាត្រ៤៥៣នៃក្រមព្រហ្មទណ្ឌ ប្រព្រឹត្តនៅអំឡុងខែតុលា ឆ្នាំ២០១៤ ជនជាប់ចោទត្រូវបានសមត្ថកិច្ចចាប់ឃាត់ខ្លួននៅថ្ងៃ២២ និង២៣ តុលា ២០១៤ នៅម្តុំវត្តសន្សំកុសល សង្កាត់បឹងទំពុន ខណ្ឌមានជ័យ ៕
ចែករំលែកព័តមាននេះ