រាជធានីភ្នំពេញ ៖ អ្នកញៀនថ្នាំម្នាក់ត្រូវបាននគរបាលប៉ុស្តិ៍ច្រាំងចំរេះទី២ឃាត់ខ្លួន ខណៈពេលដែលឥទ្ធពលគ្រឿងញៀនរើឡើងលែងដឹងខុសត្រូវ ហើយដុតផ្ទះខ្លួនឯង ។ ហេតុការណ៍ដុតផ្ទះនេះបង្កឱ្យមានការភ្ញាក់ផ្អើលកាលពីវេលាម៉ោង៥ និង១៥នាទីល្ងាច ថ្ងៃទី២៩ មិថុនា ២០១៥ នៅចំណុចផ្ទះគ្មានលេខ ក្រុមទី២ ភូមិខ១ សង្កាត់ច្រាំងចំរេះ២ ខណ្ឌឫស្សីកែវ តែត្រូវប្រជាពលរដ្ឋនាំគ្នាពន្លត់ទាន់ គឺគ្រាន់តែឆេះអស់ពូក ខ្នើយ ខោអាវមួយចំនួនតែប៉ុណ្ណោះ ។
ជនញៀនថ្នាំដុតផ្ទះខ្លួនឯងនេះត្រូវបាននគរបាលឱ្យដឹងថា មានឈ្មោះសាន ប៊ុនជឿន ភេទប្រុស អាយុ២៨ឆ្នាំ មានអាសយដ្ឋានកន្លែងកើតហេតុខាងលើ ។
មន្ត្រីនគរបាលប៉ុស្តិ៍បានឱ្យដឹងថា មុនពេលកើតហេតុស្រាប់តែគេឃើញផ្សែងហុយទ្រលោមចេញពីផ្ទះខាងលើ ។ ភ្លាមៗនោះប្រជាពលរដ្ឋក៏បាននាំគ្នាស្ទុះទៅជួយពន្លត់ ស្រាប់តែឃើញម្ចាស់ផ្ទះកំពុងតែដុតផ្ទះរបស់ខ្លួនឯង ហើយក៏នាំគ្នាជួយពន្លត់ទាន់ ខណៈនោះនគរបាលមូលដ្ឋានក៏បានចុះទៅអន្តរាគមន៍ ហើយឃាត់ខ្លួនជនបង្កជាអ្នកដុតដែលជាម្ចាស់ផ្ទះ ។
នេះចាត់ទុកជាសំណាងល្អហើយដែលប្រជាពលរដ្ឋនាំគ្នាជួយពន្លត់ទាន់ កុំអីភ្លើងបានឆេះរាលដល់លំនៅដ្ឋានដែលនៅក្បែរនោះ បង្កទៅជាគ្រោះអគ្គិភ័យយ៉ាងធ្ងន់ធ្ងរជាក់ជាមិនខាន ។
តាមមន្ត្រីនគរបាលមូលដ្ឋានបានឱ្យដឹងថា បុរសរូបនោះជាកូនកំព្រាដែលឪពុក-ម្តាយស្លាប់ចោល និងបានញៀនថ្នាំជាង១០ឆ្នាំមកហើយ មិននឹកស្មានថា វង្វេងបាត់ស្មារតីរហូតដល់ថ្នាក់ដុតផ្ទះខ្លួនឯងបែបនេះសោះ ។
បន្ទាប់ពីចាប់ខ្លួននៅព្រឹកថ្ងៃទី៣០ មិថុនា នគរបាលប៉ុស្តិ៍ក៏បានបញ្ជូនជនញៀនថ្នាំម្នាក់នេះទៅកាន់«មណ្ឌលកែប្រែឱកាសខ្ញុំ» ៕
ចែករំលែកព័តមាននេះ