រាជធានីភ្នំពេញ ៖ អាជ្ញាធរសង្កាត់ចោមចៅបានរៀបកិច្ចប្រជុំពិគ្រោះយោបល់រវាងក្រុមការងារផ្សព្វផ្សាយសេវាថែទាំ ព្យាបាលអ្នកញៀនគ្រឿងញៀនតាមសហគមន៍ជំហានទី២ជូនដល់អាជ្ញាធរភូមិ-សង្កាត់ និងកម្លាំងសមត្ថកិច្ចមូលដ្ឋានសង្កាត់ចោមចៅ ខណ្ឌពោធិ៍សែនជ័យ កាលពីព្រឹកថ្ងៃទី៣០ មិថុនា ២០១៥ ដើម្បីស្វែងរកចំណុចប្រឈមមួយចំនួនដែលទាក់ទងនឹងការព្យាបាលអ្នកញៀនគ្រឿងញៀននៅតាមសហគមន៍ ។
តាមសេក្តីរាយការណ៍របស់លោកសុទ្ធ សាធ ប្រធានក្រុមប្រឹក្សាសង្កាត់ចោមចៅបានឱ្យដឹងថា ក្នុងចំណោម២៧ភូមិ, ៩សហគមន៍ គេបានរកឃើញអ្នកប្រើប្រាស់គ្រឿងញៀនចំនួន៤៥នាក់ ក្នុងនោះ៣៥នាក់ត្រូវបានកម្លាំងសមត្ថកិច្ចបង្ក្រាប និងបញ្ជូនទៅអប់រំកែប្រែ ចំណែក១០នាក់ទៀតបញ្ជូនទៅកាន់សេវាព្យាបាល តែបើតាមតួលេខមិនផ្លូវការរបស់អង្គការក្រៅរដ្ឋាភិបាល យ៉ាងហោចណាស់ក៏មានអ្នកប្រើគ្រឿងញៀនជាង១០០នាក់ដែរក្នុងមូលដ្ឋាននេះ ។
លោកវេជ្ជបណ្ឌិតកែវ វិបុល អនុប្រធានមន្ទីរសុខាភិបាលរាជធានីភ្នំពេញ បានលើកឡើងថា ការព្យាបាលអ្នកញៀនគ្រឿងញៀន ផ្អែកលើសហគមន៍នេះមានន័យថា ព្យាបាល, បន្សាប និងថែទាំ ដោយផ្អែកលើមណ្ឌលសុខភាព និងមន្ទីរពេទ្យបង្អែកក្នុងមូលដ្ឋាន ។
ដើម្បីឈានទៅដំណើរការកម្មវិធីនេះ ក្រសួងសុខាភិបាលសហការជាមួយសាលារាជធានីភ្នំពេញ បានដាក់គោលដៅចំនួន២១ទីតាំងក្នុងភូមិសាស្ត្ររាជធានីភ្នំពេញ ដែលក្នុងនោះមានមន្ទីរពេទ្យបង្អែកចំនួន៧ទីតាំង, មណ្ឌលសុខភាពចំនួន១៣ទីតាំង និងប៉ុស្តិ៍សុខភាពចំនួន១ទីតាំង ដែលទីតាំងទាំងនេះស្ថិតនៅតាមបណ្តាសង្កាត់ចំនួន២១ ក្នុងរាជធានីភ្នំពេញ ដោយឡែកក្នុងខណ្ឌពោធិ៍សែនជ័យ កំណត់យកមន្ទីរពេទ្យបង្អែកពោធិ៍ចិនតុងជាគោលដៅ ។
យុទ្ធនាការផ្សព្វផ្សាយនេះបានចាប់ផ្តើមពីខែវិច្ឆិកា ឆ្នាំ២០១៤ រហូតមកដល់ពេលនេះមានរយៈពេលជាង៧ខែ ដែលជាលទ្ធផលទទួលបានអ្នកស្ម័គ្រចិត្តមកទទួលយកសេវាថែទាំ ព្យាបាលគ្រឿញៀន បានចំនួន៧៣នាក់ ។
លោកឈុំ វណ្ណារិទ្ធ អនុរដ្ឋលេខាធិការក្រសួងសុខាភិបាល មានប្រសាសន៍ថា គោលនយោបាយថ្មី គឺបង្កើតការព្យាបាលតាមសហគមន៍ ដែលគេមើលឃើញថា វាមានប្រសិទ្ធភាពជាងនៅតាមមណ្ឌល នេះជាបទពិសោធន៍ដែលពិភពលោករកឃើញ គឺមានប្រសិទ្ធភាព១០០% ។ ការព្យាបាលនេះធ្វើឡើងតាមគោលការណ៍ស្ម័គ្រចិត្ត រក្សាការសម្ងាត់ និងមិនគិតប្រាក់ឡើយ ។
លោកបញ្ចាក់ថា ដើម្បីឱ្យអ្នកញៀនគ្រឿងញៀនស្ម័គ្រចិត្តទៅទទួលយកការថែទាំ ព្យាបាល តាមសហគមន៍ ទាល់តែមាតា បិតា អាណាព្យាបាល លោកគ្រូ អ្នកគ្រូ និងអាជ្ញាធរភូមិ-សង្កាត់មានការគ្រប់គ្រងជនរងគ្រោះបានល្អ ចេះនិយាយលួងលោម អប់រំ ណែនាំ និងពន្យល់បែបណាឱ្យគេយល់ និងស្ម័គ្រចិត្តទៅទទួលយកសេវានេះ ទើបទទួលបានប្រសិទ្ធភាព ៕
ចែករំលែកព័តមាននេះ