រាជធានីភ្នំពេញ ៖ ប្រធានគណបក្សសង្គ្រោះជាតិ លោក សម រង្ស៊ី ថ្លែងថា ចំពោះបញ្ហាព្រំដែនជាមួយវៀតណាម គឺប្រជាជននៅតាមព្រំដែនកំពុងរងគ្រោះដោយសារការបាត់បង់ដីស្រែចម្ការរបស់ពួកគាត់ដែលបញ្ហាមួយនេះលោកសុំថ្កោលទោស ។ ជាងនេះទៀត បញ្ហានេះគណបក្សសង្គ្រោះជាតិក៏គិតគូរពីបណ្តឹងទៅតុលាការថ្នាក់ជាតិ និងថ្នាក់អន្តរជាតិតាមអ្វីដែលអាចធ្វើបាន គឺធ្វើយ៉ាងណាសុំកុំឱ្យជនជាតិវៀតណាមធ្វើបាបប្រជាពលរដ្ឋខ្មែរដែលគ្មានកំហុស គ្រាន់តែទៅការពារទឹកដីរបស់ខ្លួនបែរជាត្រូវគេវាយធ្វើបាប ។ រាជរដ្ឋាភិបាលត្រូវធ្វើការដោះស្រាយបញ្ហាទាំងនេះ ពិសេសនោះអាជ្ញាធរមានសមត្ថកិច្ចត្រូវការពារប្រជាពលរដ្ឋរបស់ខ្លួនដែលនាំគ្នាការពារទឹកដីរបស់ខ្លួនមិនគួរមិនអើពើនោះទេ ។
ប្រតិកម្មរបស់លោក សម រង្ស៊ី នេះ បានធ្វើឡើងនៅព្រឹកថ្ងៃទី២៩ មិថុនា នៅវិមានរដ្ឋសភា បន្ទាប់ពីមានការប៉ះទង្គិចគ្នាមួយប្រាវរវាងព្រះសង្ឃ យុវជន និងសកម្មជនគណបក្សសង្គ្រោះជាតិ ដែលដឹកនាំដោយលោក រៀល ខេមរិន្ទ្រ ជាមួយភាគីវៀតណាមដែលបណ្តាលឱ្យមានរងរបួសទាំងសងខាង តែអ្វីដែលគួរឱ្យកត់សម្គាល់នោះគឺលោក រៀល ខេមរិន្ទ្រ បានរងរបួសធ្ងន់ក្នុងការប៉ះទង្គិចគ្នានោះ ។
យោងតាមសេចក្តីប្រកាសព័ត៌មានរបស់អ្នកនាំពាក្យរដ្ឋបាលខេត្តស្វាយរៀង នៅថ្ងៃទី២៨ មិថុនា បានសម្តែងនូវការសោកស្តាយចំពោះហេតុការណ៍ប៉ះទង្គិចគ្នានៅតំបន់ព្រំដែនកម្ពុជា-វៀតណាម នៅត្រង់ចំណុចបង្គោលព្រំដែនលេខ២០៣ (ទួលតាព្រាប) ស្ថិតក្នុងភូមិធ្លកថ្មី ឃុំត្នោត ស្រុកកំពង់រោទ៍ ខេត្តស្វាយរៀង កាលពីថ្ងៃទី២៨ មិថុនា ឆ្នាំ២០១៥ ដែលបានបង្កឱ្យភាគីកម្ពុជា រងរបួស ចំនួន១០នាក់ និងប្រជាជនវៀតណាមរងរបួសចំនួន៨នាក់ ។
សេចក្តីប្រកាសព័ត៌មាននេះ លើកឡើងថា ដំណើរមកពិនិត្យព្រំដែនរបស់គណបក្សសង្គ្រោះជាតិ ដែលដឹកនាំដោយលោក រៀល ខេមរិន្ទ្រ មិនបានជូនដំណឹងមកអាជ្ញាធរ និងសមត្ថកិច្ចពាក់ព័ន្ធ ដើម្បីរៀបចំការពារសន្តិសុខ សុវត្ថិភាព សណ្តាប់ធ្នាប់ ក៏ដូចជាជូនដំណឹងទៅភាគីវៀតណាមជាមុន ដើម្បីបញ្ចៀសហេតុការណ៍ផ្សេងៗកើតឡើងឡើយ ហើយនៅពេលទៅដល់ព្រំដែន សមត្ថកិច្ចកម្ពុជាបានព្យាយាមពន្យល់ និងហាមឃាត់ មិនឱ្យក្រុមខាងលើទៅពិនិត្យតំបន់ព្រំដែនផងដែរ ព្រោះបារម្ភពីបញ្ហាសុវត្ថិភាព តែពួកគាត់នៅតែជម្នះទៅពិនិត្យតំបន់ព្រំដែនដោយចិត្តឯង ។
ក្នុងនាមអ្នកនាំពាក្យរដ្ឋបាលខេត្តស្វាយរៀង ប្រកាសមិនទទួលខុសត្រូវចំពោះផ្លូវច្បាប់ណាមួយ លើហេតុការណ៍ដែលបានកើតឡើងខាងលើ ព្រោះសកម្មភាពខាងលើធ្វើឡើងដោយមិនបានជូនដំណឹង និងសហការជាមួយអាជ្ញាធរមានសមត្ថកិច្ចឡើយ គឺក្នុងគោលបំណងបង្កឱ្យមានអសន្តិសុខតាមតំបន់ព្រំដែន ផ្ទុយទាំងស្រុង ពីគោលជំហររបស់រាជរដ្ឋាភិបាលកម្ពុជា ក៏ដូចជាផ្ទុយទាំងស្រុងពីវប្បធម៌សន្ទនា ដែលមេដឹកនាំបក្សទាំងពីរបានប្រកាន់យក ក្នុងការពិភាក្សាបញ្ហាប្រទេសជាតិ បូរណភាពទឹកដី និងអធិបតេយ្យភាពជាមួយប្រទេសជិតខាងជាប់ព្រំដែន ដោយឈរលើមូលដ្ឋានច្បាប់ និងលិខិតបទដ្ឋានគតិយុត្តនានា ជាធរមាន ។
ការប៉ះទង្គិចគ្នាដែលស្មានមិនដល់
តាមសេចក្តីរាយការណ៍ព័ត៌មានបានឱ្យដឹងថា ពលរដ្ឋខ្មែរ និងវៀតណាម បានប៉ះប្រយុទ្ធគ្នាដោយព្រនង់មួយប្រាវបណ្តាលឱ្យរបួសរៀងខ្លួននៅតំបន់ព្រំដែនខេត្តស្វាយរៀង នារសៀលថ្ងៃទី២៨ មិថុនា ។ ការប៉ះទង្គិចគ្នានេះនៅពេលដែលពលរដ្ឋវៀតណាមរារាំងមិនឱ្យពលរដ្ឋខ្មែរចូលទៅពិនិត្យចំណុចព្រំដែន ។
លោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោមថ្លែងថា ការប៉ះទង្គិចគ្នានោះមានពលរដ្ឋ ព្រះសង្ឃ និងតំណាងរាស្ត្រ គឺលោក រៀល ខេមរិន្ទ្រ រងរបួសយ៉ាងដំណំ នៅពេលដែលពលរដ្ឋវៀតណាមមិនឱ្យពលរដ្ឋខ្មែរចូលទៅពិនិត្យបង្គោលព្រំដែននោះ ។
លោក ថាច់ សេដ្ឋា បានចោទប្រកាន់ថា ពលរដ្ឋវៀតណាមចូលមករារាំងពលរដ្ឋខ្មែរនោះ គឺនៅក្នុងទឹកដីខ្មែរប្រមាណជាង១គីឡូម៉ែត្រ «ទ័ពគេនៅការពារប្រជាជនរបស់គេ ហើយប្រជាជនគេមានព្រនង់ ដំបង មានកាំបិត គេចូលមកដីយើង ហើយយើងនៅក្នុងទឹកដីរបស់យើងសោះ គឺគេមកបង្កហិង្សាដាក់ពួកយើង ហើយវាយលោក រៀល ខេមរិន្ទ្រ ជាអ្នកតំណាងរាស្ត្រផង ហើយព្រះសង្ឃក៏ត្រូវរបួសធ្ងន់គួរសមដែរ ។ យើងនៅលើដីរបស់យើង យើងអត់មានរុលទៅមុខទេ ហើយយើងបានសួរអាជ្ញាធរនៅទីនោះដែរថា ទីនោះជាដីរបស់យើង ហើយគាត់ឱ្យដើរតាមហ្នឹង ហើយយួននៅទីហ្នឹងក្នុងដីយើងនាំគ្នាវាយយើងតែម្តង» ។
ការប៉ះទង្គិចគ្នានោះ ត្រូវបានអ្នកតំណាងរាស្ត្រខាងគណបក្សសង្គ្រោះជាតិលោក អ៊ុំ សំអាន សរសេរព័ត៌មាន និងបង្ហោះរូបថតក្នុងទំព័រហ្វេសប៊ុករបស់លោកថា ពលរដ្ឋវៀតណាមកាន់ដំបងគ្រប់ដៃ និងយោធាវៀតណាម កាន់អាវុធបានរារាំងតំណាងរាស្ត្រ យុវជន ព្រះសង្ឃ និងប្រជាពលរដ្ឋមិនឱ្យទៅមើលការសង់ផ្លូវរបស់វៀតណាមលើដីខ្មែរ និងទៅមើលបង្គោលព្រំដែនលេខ២០៣ ។ លោកឱ្យដឹងថា ការរារាំងនេះធ្វើឱ្យមានការប៉ះទង្គិចគ្នារវាងពលរដ្ឋវៀតណាម យុវជននិងប្រជាពលរដ្ឋខ្មែរ ដែលបណ្តាលឱ្យប្រជាពលរដ្ឋខ្មែររបួសធ្ងន់៤នាក់ ក្នុងនោះមានព្រះសង្ឃ១អង្គ និងរបួសស្រាលជាង១០នាក់ ឯអ្នកតំណាងរាស្ត្រពីគណបក្សសង្គ្រោះជាតិ គឺលោក រៀល ខេមរិន្ទ្រ របួសធ្ងន់ ។
ព្រះសង្ឃខ្មែរកម្ពុជាក្រោមមួយអង្គនាម ថាច់ វណ្ណា មានថេរដីកាបញ្ជាក់ថា ពេលដែលពលរដ្ឋវៀតណាម ចូលមកវាយក្រុមប្រតិភូខ្មែរនោះ ធ្វើឱ្យប៉ះទង្គិចគ្នាមួយប្រាវ ដោយការវាយតដៃគ្នាទៅវិញទៅមក ហើយធ្វើឱ្យភាគីទាំងពីររងរបួសរៀងខ្លួន ។
តាមគម្រោងតំណាងរាស្ត្រគណបក្សសង្គ្រោះជាតិដែលដឹកនាំដោយលោក រៀល ខេមរិន្ទ្រ លោក អ៊ុំ សំអាន និងប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា ដឹកនាំប្រជាពលរដ្ឋ និងព្រះសង្ឃកម្ពុជាក្រោមប្រមាណ២០០អង្គ/នាក់ ចុះពិនិត្យព្រំដែនខេត្តស្វាយរៀង ត្រង់ចំណុចភូមិគោកធ្លក ឃុំត្នោត ស្រុកកំពង់រោទ៍ ខេត្តស្វាយរៀង បន្ទាប់ពីទទួលដំណឹងពីប្រជាពលរដ្ឋ ថាវៀតណាមបានរំលោភទឹកដីខ្មែរ និងកំពុងធ្វើផ្លូវនៅតំបន់ដែលមិនទាន់ឯកភាពគ្នាបោះបង្គោល ។
តាមVOD បានដកស្រង់សម្ដីរបស់យុវជនឈ្មោះ ម៉ា ចិត្រា ដែលចូលរួមក្នុងសកម្មភាពនោះដែរថា ហេតុការណ៍នេះកើតឡើងនៅវេលាម៉ោង២និង៣០នាទីរសៀលថ្ងៃទី២៨ មិថុនា ។ នៅត្រង់ចំណុចព្រំដែននោះ អាជ្ញាធរនិងពលរដ្ឋវៀតណាមមានគ្នាប្រមាណ២០០នាក់ ដោយក្នុងនោះទាហានវៀតណាមប្រមាណ៥០នាក់ ប្រដាប់ដោយកាំភ្លើងគ្រប់ដៃ និងពលរដ្ឋវៀតណាមប្រដាប់ដោយដំបង ។ យុវជនរូបនេះបន្តថា ចំណែកភាគីកម្ពុជា ពលរដ្ឋខ្មែរមិនមានកាន់ដំបង ឬកាំភ្លើងអ្វីទេ ហើយទាហានខ្មែរវិញមានតែប្រមាណ១០នាក់និងមិនមានកាន់កាំភ្លើងដូចខាងភាគីវៀតណាមឡើយ ។
ទាក់ទងនឹងករណីនេះ ប្រធានប៉ុស្តិ៍ព្រំដែន X១២ លោក ស៊ិន នឿន ត្រូវបាន VOD ដកស្រង់សម្ដីថា លោកបានទាក់ទងទៅភាគីវៀតណាមដែរថា តំណាងរាស្ត្រ និងពលរដ្ឋខ្មែរនឹងចូលទៅពិនិត្យព្រំដែនតំបន់នោះ តែភាគីវៀតណាមប្រាប់វិញថា មិនឲ្យចូលទៅតំបន់នោះទេ តែភាគីកម្ពុជាជម្នះចង់ចូល ទើបមានការប៉ះទង្គិចកើតឡើង ។ លោកបន្តថា ខាងប៉ុស្តិ៍ព្រំដែនក៏បានបញ្ជូនសមត្ថកិច្ចខ្មែរចំនួន ១២នាក់ផងដែរ ដើម្បីបង្ការកុំឲ្យមានបញ្ហាកើតឡើង ។
បើតាមលោក អ៊ុំ សំអាន នៅពេលត្រឡប់មកដល់ភ្នំពេញ លោកនឹងស្នើទៅរាជរដ្ឋាភិបាលឲ្យដាក់ពាក្យបណ្តឹងទៅតុលាការយុត្តិធម៌អន្តរជាតិជួយអន្តរាគមន៍ពីបញ្ហាព្រំដែនជាមួយវៀតណាម ដោយលោកចាត់ទុកថា យន្តការចរចាទ្វេភាគីកម្ពុជា និងវៀតណាម នឹងមិនមានប្រសិទ្ធភាពនោះទេមិនទាន់មានការធ្វើអត្ថាធិប្បាយភ្លាមៗពីរាជរដ្ឋាភិបាលកម្ពុជានៅឡើយជុំវិញបញ្ហាដែលបានកើតឡើងនេះ ។ អ្នកតាមដាននិយាយថា បើសិនជាមានការព្រួយបារម្ភដូចអ្នកនាំពាក្យសាលាខេត្តស្វាយរៀងប្រកាសមែននោះគួរតែទប់ស្កាត់កុំឱ្យសកម្មជនដែលលើកគ្នាទៅនោះបានទៅដល់ចំណុចដែលរសើបនេះ មិនគួររារាំងសើៗ លុះមានបញ្ហាកើតឡើងរលាស់ខ្លួនបែបនេះទេ វាគួរស្រណោះឈាមខ្មែរបន្តិចបន្ដួចផង ព្រោះពួកគេទៅនោះមិនមែនទៅរកផលប្រយោជន៍សម្រាប់ខ្លួនឯងទេ តែជាបូរណភាពទឹកដីខ្មែរទាំងមូល ។
តាមព័ត៌មានបានឱ្យដឹងថា អ្នករងរបួសរួមទាំងលោក រៀល ខេមរិន្ទ្រ ផងនោះត្រូវបានបញ្ជូនមកព្យាបាលនៅមន្ទីរពេទ្យមិត្តភាពខ្មែរ-សូវៀត ៕
ចែករំលែកព័តមាននេះ