ខេត្តស្វាយរៀង ៖ ភ្លៀង ផ្គរ ខ្យល់កន្ត្រាក់រលំផ្ទះ១ខ្នងទំហំ៦ម៉ែត្រគុណ៧ម៉ែត្រដួលរាបដល់ដី និង២ខ្នងទៀតខ្យល់ប៉ើងដំបូលអស់ កាលពីវេលាម៉ោង២ និង៣០នាទីរសៀល ថ្ងៃទី២៩ មិថុនា ២០១៥
ខេត្តស្វាយរៀង ៖ ភ្លៀង ផ្គរ ខ្យល់កន្ត្រាក់រលំផ្ទះ១ខ្នងទំហំ៦ម៉ែត្រគុណ៧ម៉ែត្រដួលរាបដល់ដី និង២ខ្នងទៀតខ្យល់ប៉ើងដំបូលអស់ កាលពីវេលាម៉ោង២ និង៣០នាទីរសៀល ថ្ងៃទី២៩ មិថុនា ២០១៥ នៅភូមិប្រាសាទ និងភូមិត្បែង ឃុំពោធិ៍រាជ ស្រុកស្វាយជ្រំ ខេត្តស្វាយរៀង ។
បើតាមលោកមេឃុំពោធិ៍រាជបានឲ្យដឹងថា នៅវេលាម៉ោង២ និង៣០នាទីរសៀល មានភ្លៀង ផ្គរ រន្ទះ លាយឡំខ្យល់កន្ត្រាក់យ៉ាងខ្លាំងបណ្តាលឲ្យរលំផ្ទះ១ខ្នងទំហំ៦ម៉ែត្រគុណ៧ម៉ែត្រ សង់ពីឈើ២ខ្នង ជញ្ជាំងសង្កសី ដំបូលប្រក់ស៊ីប្រូស៊ីម៉ង់ត៍ រលំរាបដល់ដី ដែលមានម្ចាស់ផ្ទះឈ្មោះទេព សារ៉ាត ភេទស្រី អាយុ៤៥ឆ្នាំ ជាស្ត្រីមេម៉ាយ មានកូន៥នាក់ ស្រី៣នាក់ បណ្តាលឱ្យផ្ទះខូចខាតទាំងស្រុង រួមទាំងស្រូវ និងសម្ភារៈមួយចំនួន ។
ហើយអ្វីដែលគួរឲ្យអាណិតអាសូរទៀតនោះ ស្ត្រីរងគ្រោះបានរៀបរាប់ទាំងទឹកភ្នែកថា ផ្ទះនេះបានសង់រួចកាលពីខែធ្នូ ឆ្នាំ២០១៣ គឺបានខ្ចីប្រាក់ពីធានាគារយកមកសង់ផ្ទះ បច្ចុប្បន្ននៅជំពាក់ធានាគារ៣៥០០ដុល្លារទៀត ។
ចាប់តាំពីសង់ផ្ទះនេះរួចមក គឺម្តាយរបស់គាត់ឈ្មោះប្រាក់ សី អាយុ៧៧ឆ្នាំ ចាប់មានជម្ងឺរ៉ាំរ៉ៃរហូតបានស្លាប់នៅថ្ងៃទី៩ មេសា ២០១៥ ។ ធ្វើបុណ្យសពម្តាយ៧ថ្ងៃរួច ប្តីរបស់គាត់ឈ្មោះឃ្លាំង ស៊ា អាយុ៤៤ឆ្នាំ នៅថ្ងៃ១៦ មេសា ២០១៥ មិនដឹងកើតជម្ងឺអ្វី គឺស្រាប់តែទន់ដៃទន់ជើង ដួលដើរលែងរួច ហើយក៏ស្លាប់ចោលប្រពន្ធកូនទៀត ។ អ្នកស្រុក និងអាជ្ញាធរឃុំបានរៃអង្គាសប្រាក់ធ្វើបុណ្យបន្តទាំងមិនទាន់រើរោងបុណ្យផង ។ តើអ្នកណាមិនរន្ធត់ចិត្ត ទុក្ខលើទុក្ខ ហើយឥឡូវមិនទាន់បានធ្វើបុណ្យ១០០ថ្ងៃឲ្យម្តាយ និងប្តីផង ស្រាប់តែខ្យល់កន្ត្រាក់រលំផ្ទះអស់ទៀត តើស្រីណាមិនយំ កូនណាមិនទឹកភ្នែក មិនតែប៉ុណ្ណោះជំពាក់ប្រាក់ធានាគារទៀត ពិតជាទុក្ខជាន់លើទុក្ខមែន ។
ក្រោយមកលោកមេឃុំ មេភូមិ មន្ត្រីនគបាល និងប្រជាពលរដ្ឋនាំគ្នាជួយរើផ្ទះ និងរើយកអីវ៉ាន់ ស្រូវអង្ករចេញពីក្នុងផ្ទះបាក់បែកក្រែងមានសល់ខ្លះ ។
ចំណែកនៅឯភូមិត្បែង ឃុំពោធិ៍រាជ ខ្យល់កន្ត្រាក់បានបំប៉ើងដំបូលផ្ទះ២ខ្នង ម្ចាស់ផ្ទះទី១ ឈ្មោះប្រាក់ មាណ ភេទប្រុស អាយុ៣៦ឆ្នាំ ផ្ទះទំហំ៦ម៉ែត្រគុណ៧ម៉ែត្រ ដំបូលប្រក់ស័ង្កសី របើកដំបូលអស់១ខ្នងមុខ និងម្ចាស់ផ្ទះទី២ ឈ្មោះប្រាក់ វណ្ណា ភេទប្រុស អាយុ២៥ឆ្នាំ ផ្ទះទំហំ៦ម៉ែត្រគុណ៧ម៉ែត្រ ដំបូលប្រក់ស័ង្កសី របើកដំបូលអស់៧សន្លឹក ៕
ចែករំលែកព័តមាននេះ