ខេត្តកំពង់ឆ្នាំង ៖ របាំងលបកាត់ព្រែកដាក់ចាប់ត្រី៧កន្លែង និងរបាំងសាច់អួនក្រហមក្រឡាញឹកប្រវែង១១៦ម៉ែត្រ ដែលជាបទល្មើសនេសាទក្នុងរដូវហាមឃាត់នេសាទ ត្រូវបានសមត្ថកិច្ចចម្រុះដឹកនាំដោយលោកនាយខណ្ឌរដ្ឋបាលជលផលកំពង់ឆ្នាំង ចុះបង្ក្រាបជាច្រើនចំណុចនៅក្នុងភូមិសាស្ត្រស្រុកជលគីរី កាលពីព្រឹកថ្ងៃទី២៩ មិថុនា ២០១៥ ។ ការបង្ក្រាបបទល្មើសនេសាទនេះ ធ្វើឡើងខណៈដែលត្រីចាប់ផ្តើមឡើងរកព្រៃដើម្បីពងកូនក្នុងរដូវទឹកឡើងនេះ ។
លោកសោម ភិរុណ នាយខណ្ឌរដ្ឋបាលកំពង់ឆ្នាំងបានឱ្យដឹងថា ក្នុងកិច្ចប្រតិបត្តិការបង្ក្រាបករណីខាងលើនេះមានការចូលរូមពីមន្ត្រីសង្កាត់រដ្ឋបាលជលផលពាមឆ្កោក សហគមន៍នេសាទ មន្ត្រីនគរបាលស្រុក យោធាស្រុក អាវុធហត្ថស្រុក សរុបចំនួន១៧នាក់ និងបានប្រើប្រាស់កាណូតបាឡាស្មាច់ចំនួន៣គ្រឿង ដោយបានធ្វើការបង្ក្រាបការដាក់របាំងកាត់ព្រែកចាប់ត្រីនៅចំណុចព្រែកឆ្តោរ បឹង.កផ្សោត និងបឹងរាំងឡេក ក្នុងឃុំកំពង់អូស ស្រុកជលគីរី ដែលជាលទ្ឋផលយើងបង្ក្រាបបានរបាំងភ្ជិតព្រែកចំនួន៧កន្លែង របាំងសាច់អួនក្រហមក្រឡាញឹកចំនួន១៨កន្លែង ស្មើនិង១១៦ម៉ែត្រ និងរបាំងព្រួលត្រែង៣កន្លែង ស្មើនិង៣៦ម៉ែត្រ ដោយបានរើ និងកាប់បំផ្លាញចោលនៅនឹងកន្លែង ។ ចំពោះបទល្មើសខាងលើនេះ ដោយជាករណីលើកទី១ និងដោយសារមានការយោគយល់ប្រជាពលរដ្ឋខ្វះការយល់ដឹង លោកបានឱ្យម្ចាស់ជួយសហការណ៍ជាមួយសមត្ថកិច្ចរុះរើ និងបំផ្លាញចោលដោយខ្លួនឯង និងធ្វើកិច្ចសន្យាបញ្ឈប់សកម្មភាពនៃបទល្មើសខាងលើនេះទៀត ។
លោកនាយខណ្ឌរដ្ឋបាលបានសន្យាថា នឹងបន្តធ្វើការចុះបង្ក្រាបបទល្មើសនេសាទដូចខាងលើនេះជារៀងរាល់ថ្ងៃ នៅគ្រប់ទីកន្លែងក្នុងខេត្ត ដើម្បីធានាដល់ការធ្វើចរាចរណ៍ត្រីចូលពងកូនក្នុងរដូវទឹកឡើងនេះ ។
គួររំឮកផងដែរថា នេះជាលើកទីមួយហើយដែលមានការបង្ក្រាបរបាំងរាំងភ្ជិតព្រែកបិទចរាចរណ៍ត្រីឡើងពងកូន ក្នុងរដូវទឹកឡើងដំបូងនេះ ៕
ចែករំលែកព័តមាននេះ