រាជធានីភ្នំពេញ ៖ អ្នកលេងល្បែងស៊ីសង២៧នាក់ (ប្រុស១១នាក់) បានត្រូវប៉ូលិសក្រសួងមហាផ្ទៃឃាត់ខ្លួន ខណៈពេលពួកគេកំពុងលេងបៀ-អាប៉ោង ។
រាជធានីភ្នំពេញ ៖ អ្នកលេងល្បែងស៊ីសង២៧នាក់ (ប្រុស១១នាក់) បានត្រូវប៉ូលិសក្រសួងមហាផ្ទៃឃាត់ខ្លួន ខណៈពេលពួកគេកំពុងលេងបៀ-អាប៉ោង ។ ហេតុការណ៍នេះ បានកើតឡើងនៅម៉ោងប្រមាណ៥ល្ងាចថ្ងៃទី ២៨ មិថុនា ២០១៥ នៅផ្ទះបើកល្បែងបៀ-អាប៉ោងដុះស្លែមួយកន្លែងស្ថិតក្នុងភូមិពោងពាយសង្កាត់ភ្នំពេញថ្មី ខណ្ឌសែនសុខ ។
បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ឲ្យដឹងទៀតថា ក្នុងប្រតិបត្តិការចុះបង្រ្កាបដោយមិនមានការសហការជាមួយអាជ្ញាធរមូលដ្ឋាន តែមានការចូលរួមពីតំណាងអយ្យការអមសាលាដំបូងរាជធានីភ្នំពេញនេះ បានធ្វើឡើងបន្ទាប់ពីទីតំាងលេងល្បែងស៊ីសងខាងលើ មិនត្រូវបានអាជ្ញាធរមូលដ្ឋានយកចិត្តទុកដាក់ចុះបង្រ្កាប សង្ស័យដាក់ខែយកលុយ ទោះបីជាមានអ្នកភូមិរាយការណ៍ជាច្រើនដងនោះក្តី ។
សូមបញ្ជាក់ផងដែរថា នៅក្នុងភូមិសាស្រ្តខណ្ឌសែនសុខដែលមានលោក លី សាវ៉េតជាអភិបាលនេះ ទីតំាងល្បែងស៊ីសងគ្រប់ប្រភេទបានរីកដុះដាលដូច ផ្សិតដូចជាល្បែងកន្ទុយលេខ បាញ់ត្រី និង ល្បែងភ្នាល់បាល់តាមអនឡាញជាដើម ប៉ុន្តែគេកម្រឃើញអាជ្ញាធរចុះបង្រ្កាប ឬទប់ស្កាត់នោះឡើយ ហើយបើ បង្រ្កាបៗដូចភ្លៀងរលឹម និងមិនបានប៉ុន្មានថ្ងៃក្រោយការបង្រ្កាប ទីតំាងល្បែងនោះបើកឡើងវិញដដែល ។
ដោយឡែកក្រៅពីកើតមានល្បែងស៊ីសង អំពើលួចឆក់ប្លន់នៅក្នុងអាណាចក្រខណ្ឌសែនសុខក៍កើតមានច្រើនផងដែរ និងបានធ្វើឲ្យប្រជាពលរដ្ឋក្នុង មូលដ្ឋានព្រឺខ្លួននោះថែមទៀត ។
ទាក់ទងទៅនឹងបញ្ហានេះ កោះសន្តិភាពមិនអាចរកការសុំអត្ថាធិប្បាយ ឬ បំភ្លឺបានទេពីលោក លី សាវ៉េត អភិបាលខណ្ឌសែនសុខ ក៍ដូចជាមេប៉ូលិសនិងមេ PM ខណ្ឌ ៕
ចែករំលែកព័តមាននេះ