រូបចម្លាក់ឱបថើបនៅទីលាន TIMES SQUARE ពេលបើកបង្ហាញមានមនុស្សទស្សនាច្រើន
ដោយ ៖ ប្រុសកោះ
ថ្ងៃអង្គារ ទី១៧ ខែសីហា ឆ្នាំ២០១០ ម៉ោង ០៩:១៥
គេហទំព័របរទេស
ការថើបធ្វើត្រាប់តាមរូបចម្លាក់
រូបចម្លាក់យ៉ាងធំមួយនៃទាហានជើងទឹកអាមេរិកឱបថើបគិលានុបដ្ឋាយិកាម្នាក់នៅទីលាន TIMES SQUARE ក្រុងញូវយ៉ក ព្រោះសប្បាយចំពោះការបញ្ចប់សង្គ្រាមលោកលើកទី២ ត្រូវបានបើកបង្ហាញជាសាធារណៈ កាលពីថ្ងៃទី១២ សីហា កន្លងមកនេះ ។ ថ្ងៃទី១៤ សីហា ឆ្នាំ១៩៤៥ ជាថ្ងៃសុំចុះចាញ់សង្គ្រាមរបស់ជប៉ុន នាវិកម្នាក់ស្លៀកពាក់ឯកសណ្ឋានជាទាហានជើងទឹកនៃកងម៉ារីនអាមេរិកបានថើបជញ្ជក់មាត់គិលានុបដ្ឋាយិកាវ័យក្មេង នាង EDITHJ SHAIN នៅ TIMES SQURE អបអរសាទរចំពោះជ័យជំនះក្នុងសង្គ្រាម ។ រូបភាពនេះត្រូវបានថតជាប់ដោយអ្នកថតរូបលោក ALFRED EIDSEN-STADT ហើយរូបថតនេះជារូបថតឯកសារសំខាន់មួយនៃសតវត្សទី២០ ។ គេបានធ្វើរូបចម្លាក់មួយដូចរូបថតនៃការឱបថើបគ្នានេះ ហើយយកមកដាក់តាំងនៅទីលាន TIMES SQUARE ដោយក្រោយការដាក់តាំងមានមនុស្សស្រីប្រុស និងគូស្នេហ៍ជាច្រើនទៅទស្សនា និងថតរូបជាប់រូបចម្លាក់នេះ ហើយមានគូស្នេហ៍ខ្លះឱបថើបគ្នាធ្វើត្រាប់តាមការថើបគ្នាដូចរូបចម្លាក់ទៀតផង៕
