ខេត្តបាត់ដំបង ៖ បុរស-នារីជួញដូរគ្រឿងញៀន២នាក់ ត្រូវកម្លាំងការិយាល័យនគរបាលប្រឆាំងគ្រឿងញៀន សហការជាមួយក្រុមកម្លាំងបង្ការបង្ក្រាបនៃស្នងការដ្ឋាននគរបាលខេត្តធ្វើការឃាត់ខ្លួន២កន្លែងផ្សេងគ្នា មួយកាលពីវេលាម៉ោង០៥ល្ងាចថ្ងៃទី២៩ ឧសភា ២០១៥ ស្ថិតនៅចំណុចផ្ទះសំណាក់ក្នុងបន្ទប់លេខ១០៥ ក្រុមទី១០ ភូមិរំចេក សង្កាត់រតនៈ ក្រុងបាត់ដំបង និងមួយកន្លែងទៀតកាលពីវេលាម៉ោង៦ល្ងាចថ្ងៃដដែល ស្ថិតនៅក្រុមទី១ ភូមិរំចេក៤ ក្នុងសង្កាត់រតនៈដូចគ្នា ។
ប្រភពបានឱ្យដឹងថា នារីសង្ស័យឈ្មោះគឹម លី ហៅម៉ី អាយុ២០ឆ្នាំ មានទីលំនៅក្នុងភូមិវត្តលៀប សង្កាត់ចំការសំរោង ក្រុងបាត់ដំបង ។ ចំណែកជនសង្ស័យឈ្មោះកាមរីម សាគី អាយុ៣៦ឆ្នាំ មានទីលំនៅភូមិនរា១ ឃុំនរា ស្រុកសង្កែ ខេត្តបាត់ដំបង ។ចំណែកវត្ថុតាងដែលរឹបអូសបានមានថ្នាំញៀនប្រភេទមេតំហ្វេតាមីន ICE ម៉ាទឹកកកសរុបចំនួន១១កូនថង់, ទូរស័ព្ទដៃស៊េរីចាស់២គ្រឿង និងកាបូបលុយ២, ដែកកេះ៤ និងសម្ភារសម្រាប់ជក់មួយចំនួនផងដែរ ។
បច្ចុប្បន្ន ជនសង្ស័យទាំង២នាក់ និងវត្ថុតាង ត្រូវបានកំពុងរៀបចំបញ្ជូនទៅតុលាការ ។
ចែករំលែកព័តមាននេះ