មេប៉េអឹមខេត្តសៀមរាបបញ្ជាឱ្យសង់ខ្លោងទ្វារចេញ-ចូលបែរមុខទៅទិសខាងកើតវិញ
ខេត្តសៀមរាប ៖ មន្ត្រីកងរាជអាវុធហត្ថមួយរូបបានបង្ហើបថា ដោយសារតែមានជំនឿដ៏ង៉ុបង៉ុលលើគ្រូចិនសែមកពីប្រទេសថៃ
ខេត្តសៀមរាប ៖ មន្ត្រីកងរាជអាវុធហត្ថមួយរូបបានបង្ហើបថា ដោយសារតែមានជំនឿដ៏ង៉ុបង៉ុលលើគ្រូចិនសែមកពីប្រទេសថៃ
ខេត្តសៀមរាប ៖ មន្ត្រីកងរាជអាវុធហត្ថមួយរូបបានបង្ហើបថា ដោយសារតែមានជំនឿដ៏ង៉ុបង៉ុលលើគ្រូចិនសែមកពីប្រទេសថៃ «ខ្លោងទ្វារចេញ-ចូលបញ្ជាការដ្ឋានកងរាជអាវុធហត្ថខេត្ត បច្ចុប្បន្នបែរមុខទៅទិសខាងលិច ត្រូវវាយកម្ទេចចោល ហើយបង្វែរទៅរកទិសខាងកើតក្រោយព្រះរាជដំណាក់វិញម្តង» ។ នេះជាការសម្រេចចិត្តរបស់លោកវរសេនីយ៍ឯក ប៉ោ វណ្ណនិត ដែលគិតថា ជាការពង្រឹងអានុភាពដឹកនាំរបស់គាត់ឲ្យដល់កម្រិតកំពូល ។
មន្ត្រីកងរាជអាវុធហត្ថដែលសុំមិនបញ្ចេញឈ្មោះម្នាក់បានឱ្យដឹងថា «បើគ្មានអ្វីប្រែប្រួលទេ ផែនការវាយកម្ទេចខ្លោងទ្វារនឹងត្រូវចាប់ផ្តើមនៅថ្ងៃស្អែក ថ្ងៃទី៣០ ឧសភា តំណាលគ្នានេះដែរ ក៏ត្រូវវាយបំផ្លាញអគារល្វែងខាងកើតចំនួន៤ម៉ែត្រ ទម្លុះរបងដើម្បីរៀបចំខ្លោងទ្វារថ្មី» ។ ការសម្រេចចិត្តបង្វែរខ្លោងទ្វារចេញ-ចូលបញ្ជាការដ្ឋានធ្វើឡើងតាមការចង្អុលបង្ហាញរបស់គ្រូចិនសែមួយរូប ដែលលោក ប៉ោ វណ្ណនិត ជួលមកពីប្រទេសថៃ ដើម្បីប្រមើលមើលទីតាំងភូមិសាស្ត្រ (ហុងស៊ុយ) នៅក្នុងបរិវេណបញ្ជាការដ្ឋានកងរាជអាវុធហត្ថខេត្ត ។
គ្រូចិនសែបានអះអាងថា ខ្លោងទ្វារបច្ចុប្បន្នបែរខុសទិស គឺបែរមុខទៅទិសខាងលិចជាទិសខ្មោច ផ្លូវបែកជាបួន ភូមិសាស្ត្រមិនល្អ ដែលអាចនាំមកនូវភាពចម្រូងចម្រាសពិបាកក្នុងការដឹកនាំកងកម្លាំង ទាំងក្នុងពេលបច្ចុប្បន្ន និងអនាគត ដូច្នេះបើចង់ពង្រឹងអំណាចឲ្យកូនចៅថ្នាក់ក្រោមគោរពស្រឡាញ់ រាប់អាន ព្រមទាំងស្តាប់បង្គាប់ ថែមទាំងមានសេចក្តីសុខ ត្រូវតែសង់ខ្លោងទ្វារបែរមុខទៅរកទិសខាងកើតវិញម្តង ។
ទោះបីជាបែបនេះក្តី មន្ត្រីកងរាជអាវុធហត្ថខ្លះក៏បានសម្តែងការមិនពេញចិត្តចំពោះគម្រោងវាយកម្ទេចខ្លោងទ្វារចាស់ ដោយអះអាងថា គម្រោងការនេះមិនបានធ្វើសេចក្តីជូនដំណឹងទៅក្រសួងការពារជាតិ ឬក៏ពិភាក្សាជាមួយមន្ត្រីថ្នាក់ក្រោមអ្វីទាំងអស់ គឺជាគំនិតរបស់លោកមេបញ្ជាការតែម្នាក់គត់ ។ បញ្ជាការដ្ឋានកងរាជអាវុធហត្ថខេត្តនេះ មិនមែនជាកម្មសិទ្ធិផ្តាច់មុខរបស់បុគ្គលណាម្នាក់ឡើយ ។
គួរបញ្ជាក់ថា លោក ប៉ោ វណ្ណនិត ជាកូនប្រសារបស់លោកឧត្តមសេនីយផ្កាយ៤ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងត្រូវជាកូនបង្កើតរបស់ លោក ប៉ោ វណ្ណៈ មេបញ្ជាការកងរាជអាវុធហត្ថខេត្ដបាត់ដំបង ត្រូវបានប្រកាសតែងតាំងជាមេបញ្ជាការកងរាជអាវុធហត្ថខេត្ដសៀមរាប កាលពីថ្ងៃទី១២ ខែឧសភា ឆ្នាំ២០១៥ កន្លងទៅ ជំនួសលោកឧត្ដមសេនីយ៍ត្រី ម៉ន សាម៉ុន ដែលបានកាន់តំណែងជាមេបញ្ជាការខេត្ដនេះអស់រយៈពេល២១ឆ្នាំកន្លងមក ។
ទោះបីជាយ៉ាងណាក្តី នៅរសៀលថ្ងៃទី២៩ ឧសភា គេមិនអាចស្វែងជួបលោកវរសេនីយ៍ឯក ប៉ោ វណ្ណនិត មេបញ្ជាការកងរាជអាវុធហត្ថខេត្ត ដើម្បីសុំបំភ្លឺជុំវិញព័ត៌មានខាងលើនេះបានឡើយ ៕
ព័ត៌មានពិស្តារមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ