ស្មៀនសង្កាត់អូរអំបិល ចាក់ដីលុបប្រឡាយមេដើម្បីប្រយោជន៍ផ្ទាល់ខ្លួន
ខេត្តបន្ទាយមានជ័យ៖ ស្មៀនសង្កាត់អូរអំបិល ចាក់ដីលុបប្រឡាយមេយកធ្វើជាកម្មសិទ្ធិផ្ទាល់ខ្លួន ដែលមានទំហំ១០ម៉ែត្រគុណ៧០០ម៉ែត្រ
ខេត្តបន្ទាយមានជ័យ៖ ស្មៀនសង្កាត់អូរអំបិល ចាក់ដីលុបប្រឡាយមេយកធ្វើជាកម្មសិទ្ធិផ្ទាល់ខ្លួន ដែលមានទំហំ១០ម៉ែត្រគុណ៧០០ម៉ែត្រ នៅជាប់ផ្លូវជាតិលេខ៥ ខាងលិចនិងខាងត្បូងប្រឡាយស្ពានតាផាន់ នៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
សកម្មភាពរបស់ស្មៀនសង្កាត់អូរអំបិល គឺកំពុងសម្រុកចាក់ដីលុបប្រឡាយទាំងថ្ងៃ ទាំងយប់ ដែលការចាក់ដីនេះស្ទើរតែរួចរាល់ហើយ នៅតែមិនឃើញមានមន្ត្រីជំនាញ ឬអាជ្ញាធរណាមានវិធានការទប់ស្កាត់ឡើយ ប្រហែលជាទទួលបានលាភសក្ការៈខ្លះៗហើយ បានជាមើលលែងឃើញ ពិសេសមន្ទីរធនធានទឹក និងឧតុនិយមខេត្ត ។
លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្ត បានឱ្យដឹងថា ក្រោយពីទទួលបានព័ត៌មានថា ស្មៀនសង្កាត់អូរអំបិល ឈ្មោះ ឈន ប៊ុនថេន បានចាក់ដីលុបប្រឡាយរំលោភចំណីប្រព័ន្ធមេជាប្រព័ន្ធធារាស្គ្រធំមួយ ក្នុងក្រុងសិរីសោភ័ណ ដែលមានប្រវែងប្រមាណជិត៧០០ម៉ែត្រ ។ លោកបានសហការជាមួយមន្ត្រីជំនាញសាលាក្រុងបានចុះពិនិត្យ និងបានហាមឃាត់ឱ្យផ្អាកសកម្មភាពចាក់ដីរំលោភយកដីរដ្ឋធ្វើជាកម្មសិទ្ធិផ្ទាល់ខ្លួន ។ ដីចំណីប្រឡាយមេត្រង់ចំណុចអក្សប្រវែង១៥ម៉ែត្រ និងផ្លូវជាតិលេខ៥អក្សប្រវែង៣០ម៉ែត្រ បើសិនប៉ះពាល់ នឹងមានវិធានការតាមច្បាប់ ៕
ព័ត៌មានពិស្តារមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ