រាជធានីភ្នំពេញ ៖ មេគោ២ក្បាល និងកូនគោឈ្មោល១ក្បាល ត្រូវចោរលួចយកទៅពន្លះយកសាច់ទៅបាត់ បន្សល់ទុកតែ ក្បាល ឆ្អឹង និងគ្រឿងក្នុង ត្រូវអ្នកភូមិប្រទះឃើញនៅក្នុងត្រពាំងទឹកមួយកន្លែង
រាជធានីភ្នំពេញ ៖ មេគោ២ក្បាល និងកូនគោឈ្មោល១ក្បាល ត្រូវចោរលួចយកទៅពន្លះយកសាច់ទៅបាត់ បន្សល់ទុកតែ ក្បាល ឆ្អឹង និងគ្រឿងក្នុង ត្រូវអ្នកភូមិប្រទះឃើញនៅក្នុងត្រពាំងទឹកមួយកន្លែង បង្កឱ្យមានការភ្ញាក់ផ្អើល កាលពីវេលាម៉ោង៣និង៤០នាទីរសៀលថ្ងៃទី២៨ ឧសភា ស្ថិតនៅខាងមុខវត្តត្រពាំងឈូក ភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ ។
អ្នកភូមិបាននិយាយថា គោទាំង៣ក្បាល ដែលក្រុមចោរលួចយកមកកាប់ពន្លះយកសាច់នេះ គឺមិនទាន់ស្គាល់ម្ចាស់គោទាំងនេះនៅឡើយទេ ព្រោះមិនដឹងថាចោរលួចពីកន្លែងណាមក ខណៈពេលគាត់ដឹកគោទៅចងឲ្យស៊ីស្មៅនៅត្រង់ចំណុចនោះ ស្រាប់តែប្រទះឃើញក្បាល ឆ្អឹង គ្រឿងក្នុង និងលាមកខាងលើ ទើបបង្កឲ្យមានការភ្ញាក់ផ្អើលឆោឡោឡើងភ្លាមៗតែម្ដង ។
ប្រភពដដែលបានបន្តថា ខណៈនោះមានមនុស្សទៅចោមរោមមើលយ៉ាងច្រើន ប៉ុន្តែមិនមាននរណាម្នាក់ស្គាល់ ចំណែកអ្នករស់នៅជិតខាងក៏មិនមាននរណាម្នាក់បាត់គោដែរ តាមការស្មានប្រហែលជាគោទាំង៣ក្បាលនេះចោរលួចពីទីឆ្ងាយ ហើយយកមកពន្លះយកសាច់នៅទីនេះ ។
មន្ត្រីនគរបាលបានឱ្យដឹងថា ក្រោយពេលមានការភ្ញាក់ផ្អើល កម្លាំងសមត្ថកិច្ចចុះទៅកាន់កន្លែងកើតហេតុ ដើម្បីពិនិត្យជាក់ស្ដែង ឃើញនៅសល់តែក្បាល៣ ឆ្នឹង គ្រឿងក្នុងមួយចំនួន និងលាមក នៅក្នុងត្រពាំងទឹក ដែលក្រុមចោរបានកាប់ពន្លះយកសាច់ទៅបាត់អស់ បន្ទាប់មកអ្នកភូមិក៏នាំគ្នាកាត់ចែកគ្នាយកទៅផ្ទះរៀងៗខ្លួន ៕
ព័ត៌មានពិស្តារមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ