រលកក្តៅខ្លាំងនៅប្រទេសឥណ្ឌា បានសម្លាប់មនុស្សជាង១.៥០០នាក់ហើយ គិតមកត្រឹមល្ងាចថ្ងៃទី២៨ ឧសភា ២០១៥ ហើយហាក់ពុំទាន់បង្ហាញពីការចុះថយ នាំឱ្យមានការប៉ះពាល់យ៉ាងខ្លាំងដល់សុខភាព ពិសេសបណ្តាអ្នកក្រីក្របំផុត ដែលបង្ខំចិត្តធ្វើការនៅកណ្តាលវាល ។
មន្ទីរពេទ្យទាំងឡាយនៃបណ្តារដ្ឋនៅភាគខាងត្បូងឥណ្ឌា ដែលរងការប៉ះពាល់ខ្លាំង បានប្រមូលកម្លាំង ដើម្បីជួយដល់ជនរងគ្រោះ ដោយសារក្តៅខ្លាំង ហើយអាជ្ញាធរបានណែនាំកុំឱ្យប្រជាជនចេញទៅក្រៅ ។
ផ្នែកឧតុនិយមឥណ្ឌា បានចេញការប្រកាសអាសន្នពណ៌ក្រហម សម្រាប់ក្នុងរដ្ឋជាច្រើន ដោយសារសីតុណ្ហភាពឡើងដល់ជាង៤៥អង្សាសេ ។ លោក យ៉ាដាវ អ្នកនាំពាក្យ របស់ផ្នែកឧតុនិយមឥណ្ឌា បាននិយាយថា យើងពុំព្យាករណ៍ឃើញការចុះថយនៃរលកក្តៅខ្លាំងបំផុតនេះនៅឡើយ សម្រាប់ប៉ុន្មានថ្ងៃខាងមុខទៀត ។
មនុស្សជាច្រើនរយនាក់ ពិសេសបណ្តាអ្នកក្រីក្របំផុត តែងស្លាប់ដោយសារធាតុអាកាសក្តៅខ្លាំង រៀងរាល់រដូវក្តៅ នៅឥណ្ឌា ។ នៅរដ្ឋឥន្ទ្រាប្រាដេស ជារដ្ឋរងការប៉ះពាល់ខ្លាំងជាងគេ មនុស្សជិត៩០០នាក់ស្លាប់ចាប់តាំងពី១សប្តាហ៍កន្លងមកនេះ ដោយសីតុណ្ហភាពក្នុងរដ្ឋនេះ ឡើងដល់៤៧អង្សារសេ កាលពីថ្ងៃទី២៧ ឧសភា ។
លោក ទូលស៊ី រ៉ានី អ្នកទទួលខុសត្រូវ នៃអង្គភាពគ្រប់គ្រងគ្រោះមហន្តរាយ រដ្ឋឥន្ទ្រាប្រាដេស និយាយថា រដ្ឋាភិបាលរដ្ឋនេះបានបង្កើតកម្មវិធីព័ត៌មានតាមទូរទស្សន៍ និងតាមសារព័ត៌មានឯទៀតៗ ដើម្បីណែនាំមនុស្សទាំងឡាយ កុំឱ្យចេញទៅក្រៅ ដោយមិនពាក់មួក ឬទទូរឆ័ត្រ ហើយឱ្យនាំគ្នាផឹកទឹកឱ្យច្រើន ។
វិថីទាំងឡាយនៃទីក្រុងហ៊ីដឺរ៉ាបាដ រដ្ឋធានីរបស់រដ្ឋនោះ ពុំសូវមានមនុស្សឡើយ នាពេលថ្ងៃ ។ រលកក្តៅខ្លាំងប៉ះពាល់ដល់ផ្នែកមួយធំរបស់ប្រទេស ក្នុងនោះមានរដ្ឋធានីញូវដែល្លី ផងដែរ ដោយនៅទីនោះ សូម្បីកៅស៊ូថ្នល់ក៏រលាយស្អិតដែរ ។
យោងតាមកាសែត Hindustan Times ថា សីតុណ្ហភាពអតិបរមា នៅក្រុងញូវដែល្លី ឡើងដល់៤៥,៥អង្សារសេ គឺឡើង៥អង្សារលើសពីសីតុណ្ហភាពមធ្យមប្រចាំរដូវ ។
ចំណែកនៅរដ្ឋតេឡានហ្គាណា ជាប់ជិតខាងរដ្ឋឥន្ទ្រាប្រាដេស រដ្ឋអូរីសា និង រដ្ឋបឹងហ្គាល់ខាងលិច សីតុណ្ហភាពនៅទីនោះឡើងដល់៤៨អង្សាសេ ៕
ចែករំលែកព័តមាននេះ