រាជធានីភ្នំពេញ ៖ អ្នកសារព័ត៌មានដែលមកពីស្ថាប័នជាង៤០ បានមកជួបជុំគ្នាពិភាក្សាស្តីពីការប្រែប្រួលអាកាសធាតុជាមួយស្ថាប័នពាក់ព័ន្ធមានក្រសួងកសិកម្ម រុក្ខាប្រមាញ់ និងនេសាទ រួមជាមួយអង្គការជាដៃគូជាតិ អន្តរជាតិ ដើម្បីប្រមូលផ្តុំចំណេះដឹង វិទ្យាសាស្ត្រសម្រាប់ការប្រែប្រួលអាកាសធាតុ កសិកម្ម សន្តិសុខស្បៀង និងការធ្វើឲ្យប្រព័ន្ធផ្សព្វផ្សាយចូលរួមនៅកម្ពុជា។
កម្មវិធីនេះធ្វើឡើងរយៈពេល២ថ្ងៃ គឺថ្ងៃទី២៨-២៩ ឧសភា នៅសណ្ឋាគារកាំបូឌីយ៉ាណាភ្នំពេញ ដោយមានការចូលរួមពីលោក ទី សុគន្ធ រដ្ឋលេខាធិការក្រសួងកសិកម្ម រុក្ខាប្រម៉ាញ់ និងនេសាទ និងក្រុមអ្នកសិក្សាស្រាវជ្រាវមកពីប្រទេសហ្វីលីពីនផងដែរ។
សិក្ខាសាលានេះ ធ្វើឡើងក្នុងន័យប្រមូលផ្តុំចំណេះដឹងវិទ្យសាស្ត្រសម្រាប់ការប្រែប្រួលអាកាសធាតុកសិកម្ម និងសន្តិសុខស្បៀងជូនដល់សិក្ខាកាម ដែលជាអ្នកសារព័ត៌មានតំណាងស្ថាប័នពាក់ព័ន្ធនានា ដើម្បីយកទៅផ្សព្វផ្សាយបន្តជូនដល់ប្រជាពលរដ្ឋ និងសាធារណជនទូទៅឲ្យយល់ដឹង និងមានវិធានការចូលរួមការពារ និងទប់ស្កាត់រាល់បញ្ហាដែលអាចកើតជាយថាហេតុនៅកម្ពុជា ពិសេសទៅលើការប្រែប្រួលអាកាសធាតុលើវិស័យកសិកម្ម និងសន្តិសុខស្បៀង។
លោក Leo Sebastian ប្រធានកម្មវិធីគម្រោងស្រាវជ្រាវដំណាំស្រូវអន្តរជាតិ ទទួលបន្ទុកការងារបម្រែបម្រួលអាកាសធាតុ កសិកម្ម និងសន្តិសុខស្បៀងសម្រាប់ភូមិភាគអាស៊ីអាគ្នេយ៍ បានឲ្យដឹងថា នេះជាលើកទី១ហើយដែលអង្គការ CCAFS-SEA បានរៀបចំធ្វើនៅឥណ្ឌូចិន ដោយចាប់ផ្តើមពីកម្ពុជា បន្ទាប់ពីបានបញ្ចប់នៅហ្វីលីពីន ថៃ និងឥណ្ឌូនេស៊ី។
លោកបញ្ជាក់ថា ផលប៉ះពាល់ស្បៀងនៃការបម្រែបម្រួលអាកាសធាតុ បានក្លាយទៅជាបញ្ហាធ្ងន់ធ្ងរនៅលើពិភពលោក ដូច្នេះដើម្បីបង្កើននូវសុវត្ថិភាពចាំបាច់យើងទាំងអស់គ្នា និងអ្នកដឹកនាំត្រូវបង្កលទ្ធភាពជួបគ្នា ដើម្បីពិភាក្សាលើបញ្ហានេះ។
លោកបានបន្តថា អង្គការរបស់លោកចុះប្រតិបត្តិនៅពេលនេះ គឺផ្តោតទៅលើបញ្ហាមួយចំនួនសម្រាប់ដោះស្រាយបញ្ហាជាសកលទាក់ទងទៅនឹងអាកាសធាតុ កសិកម្ម សន្តិសុខស្បៀង នៅអាស៊ីអាគ្នេយ៍នេះឯង។ បញ្ហាបម្រែបម្រួលអាកាសធាតុបានបង្កផលប៉ះពាល់ដល់វិស័យកសិកម្ម និងជះលទ្ធិពលមកលើការបម្រែបម្រួលអាកាសធាតុវិញ ដូច្នេះប្រតិបត្តិការរបស់លោកនៅឆ្នាំ២០១៥នេះ គឺផ្តោតទៅលើប្រទេសតែចំនួន៣ គឺ កម្ពុជា វៀតណាម ឡាវដើម្បីរួមគ្នាទប់ស្កាត់ការប្រែប្រួលអាកាសធាតុនេះ។
លោក ទី សុគន្ធ រដ្ឋលេខាធិការក្រសួងកសិកម្ម រុក្ខាប្រម៉ាញ់ និងនេសាទ បានឲ្យដឹងថា វេទិកានេះពិតជាប្រសើរសម្រាប់ការងារផ្សព្វផ្សាយព័ត៌មានពិតពាក់ព័ន្ធការបម្រែបម្រួលអាកាសធាតុ កសិកម្ម និងសន្តិសុខស្បៀងដល់កសិករឲ្យបានដឹងពីហានិភ័យ និងគ្រោះមហន្តរាយដែលបានកើតឡើង ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ