Solf-Tennis បើកការប្រកួតដណ្តើមពានរង្វាន់លោក ស ខេង
រាជធានីភ្នំពេញ ៖ ការប្រកួតកីឡា Solf-Tennis ដណ្តើមពានរង្វាន់លោកឧបនាយករដ្ឋមន្ត្រី ស ខេង លើកទី២ បានចាប់ផ្តើមហើយនៅព្រឹកថ្ងៃទី២៨ ឧសភា ហើយតាមការគ្រោងទុកការ
រាជធានីភ្នំពេញ ៖ ការប្រកួតកីឡា Solf-Tennis ដណ្តើមពានរង្វាន់លោកឧបនាយករដ្ឋមន្ត្រី ស ខេង លើកទី២ បានចាប់ផ្តើមហើយនៅព្រឹកថ្ងៃទី២៨ ឧសភា ហើយតាមការគ្រោងទុកការប្រកួតនេះនឹងបញ្ចប់នៅថ្ងៃទី៣០ ឧសភា ។
លោកជា ប៊ុនហេង ប្រធានអង្គភាពកីឡាក្រសួងមហាផ្ទៃអះអាងថា ព្រឹត្តិការណ៍នេះឧបត្ថម្ភទាំងស្រុងដោយលោកឧបនាយករដ្ឋមន្ត្រី ស ខេង តែម្តង ដោយមានកីឡាករ-កីឡាការិនីសរុប៩៨នាក់ ក្នុងនោះ៥នាក់ជាកីឡាការិនីមកពីក្លិប-សមាគមចំនួន៩ ចូលរួម។ ក្លិប-សមាគមទាំង៩នោះមានក្រសួងមហាផ្ទៃ, ក្រសួងការពារជាតិ, I Can, ខេត្តកំពង់ស្ពឺ, ខេត្តកំពង់ឆ្នាំង, ខេត្តព្រៃវែង, ខេត្តកណ្តាល និងក្លិបមហាជន ។ ការប្រកួតចែកចេញជា២ក្របខ័ណ្ឌ គឺក្របខ័ណ្ឌក-១ ដែលមានវិញ្ញាសាវាយទោល និងវាយគូបុរស-នារី និងក្របខ័ណ្ឌក-២ មានវិញ្ញាសាវាយទោល និងវាយគូបុរស-នារី និងវិញ្ញាសាវាយគូចម្រុះ ។
សូមបញ្ជាក់ថា ប្រភេទកីឡា Solf-Tennis ដែលហូរចូលមកស្រុកខ្មែរនៅឆ្នាំ២០១១នោះ ទើបតែចុងឆ្នាំ២០១៤ទេ ដែលសហព័ន្ធត្រូវបង្កើតឡើង ។ ជាមួយនឹងការបង្កើតនេះ កីឡា Solf-Tennis បានចេញទៅប្រកួតក្នុងព្រឹត្តិការណ៍ធំៗនៅក្រៅប្រទេសជាញឹកញាប់ដោយដណ្តើមបានមេដាយប្រាក់ និងសំរឹទ្ធទៀតផង។ សព្វថ្ងៃនេះមានខេត្តចំនួន៤ ដែលមានកីឡា Solf-Tennis ហើយថ្ងៃខាងមុខប្រភេទកីឡានេះអាចនឹងបញ្ចូលទៅតាមសាលារៀនទៀតផង បុ៉ន្តែអ្វីដែលលំបាកនោះគឺសម្ភារសម្រាប់កីឡានេះមិនមានលក់នៅស្រុកខ្មែរឡើយ ។
ទោះបីយ៉ាងនេះក៏ដោយ ក៏សហព័ន្ធនៅតែជំរុញឱ្យបើកក្លិបឱ្យបានច្រើនដោយសហព័ន្ធមិនត្រឹមតែផ្តល់សម្ភារជូនប៉ុណ្ណោះទេ តែប្រសិនបើរ៉ាកែតខូច សហព័ន្ធនឹងជួយជួសជុល និងចាក់សំណាញ់ឱ្យជាថ្មីទៀតផង សំខាន់សហព័ន្ធចង់ឱ្យកីឡា Solf-Tennis រីកចម្រើនគ្រប់ច្រកល្ហកក្នុងប្រទេសកម្ពុជា ។
គួររំលឹកផងដែរថា កីឡាប្រភេទនេះ ថ្វីដ្បិតទើបតែមាននៅក្នុងប្រទេសកម្ពុជាក្នុងរយៈពេលខ្លីក៏ពិតមែន ប៉ុន្តែកាលពីពេលថ្មីៗនេះ កីឡា Solf-Tennis បានបង្កើតឱ្យមានការចាប់អារម្មណ៍យ៉ាងខ្លាំងតាមរយៈនៃការដណ្តើមបាននូវមេដាយយ៉ាងច្រើនពីការទៅចូលរួមនៅលើឆាកអន្តរជាតិនាពេលកន្លងមក ៕
ចែករំលែកព័តមាននេះ