រាជធានីភ្នំពេញ ៖ នៅថ្ងៃសៅរ៍ ទី៣០ ឧសភា ស្អែកនេះ អ្នកប្រដាល់ជើងខ្លាំង២រូប គឺកីឡាករផាន់ សារុន មកពីក្លិបគជសារកីឡា និងកីឡាករជ័យ ស៊ីនេត មកពីក្លិបឃ្លាំងមឿងកីឡាខេត្តពោធិ៍សាត់ នឹងឡើងសង្វៀនស៊ីធីអិនសាកកណ្តាប់ដៃគ្នាជាលើកដំបូងដើម្បីចង់ដឹងថា នរណាខ្លាំងជាងនរណា ។ កីឡាករទាំងពីរសុទ្ធតែបង្ហាញឆន្ទៈដូចគ្នាថា នឹងផ្តួលគូប្រកួតរៀងខ្លួន បើទោះជាភាពជាក់ស្តែងនៅមិនទាន់មានអ្នកព្យាករដឹងពីលទ្ធផលនៅឡើយក្តី ។
ផាន់ សារុន ហាក់មិនសូវមានសង្ឃឹមមុតមាំបុ៉ន្មានទេ បើទោះជាគេដឹងថា កីឡាករជ័យ ស៊ីនេត ហាក់ធ្លាក់ដៃក្នុងការប្រកួតខុសពីកាលមុននារយៈពេលចុងក្រោយនេះដោយសារមិនសូវបានឡើងប្រកួត ។ លោកនិយាយថា មិនអាចមើលស្រាលកីឡាកររូបនេះបានទេ ដោយសារតែគាត់ទោះបីអន់កម្ពស់បន្តិចមែន តែបើនិយាយពីចិត្តវិញ គឺសឿងគ្រាន់បើ កម្លាំងសុ៊ហ្វក៏ខ្លាំងវាយមិនចេះហត់ឡើយ ។ លោកសង្ឃឹមតែ៥០ភាគរយបុ៉ណ្ណោះសម្រាប់ឱកាសជួបគ្នាជាលើកទី១ ជាមួយកីឡាករជ័យ ស៊ីនេត នៅថ្ងៃស្អែកនេះ ។ ទោះបីយ៉ាងណា បញ្ច្រាសទិសនឹងភាពស្ទាក់ស្ទើរនេះ លោកបែរជាបញ្ជាក់ឱ្យដឹងពីផែនការហ្វឹកហាត់ជាប់លាប់ដែលលោកបានធ្វើនៅមុនគម្រោងចេញប្រកួតជាមួយ ជ័យ ស៊ីនេត ដែលនឹងចាប់ផ្តើមនៅថ្ងៃស្អែកនេះទៅវិញ ។ ផាន់ សារុន និយាយថា ខ្លួនបានហ្វឹកហាត់ទាំងផ្នែកប្រដាល់ និងហាត់រត់យ៉ាងហោច១សប្តាហ៍មុនដើម្បីបង្កើនក្បាច់គុនផង និងដើម្បីបង្កើនកម្លាំងកុំឱ្យឆាប់ហត់ផងក្នុងពេលប្រកួត ។ ផាន់ សារុន ត្រូវគេកត់សម្គាល់ថា ជាកីឡាករមួយរូបដែលខ្លាំងកណ្តាប់ដៃម៉ាត់ និងស្នៀតជើងទាត់គួរឱ្យសរសើរ បុ៉ន្តែការបង្ហាញភាពស្ទាក់ស្ទើរពេលជួប ជ័យ ស៊ីនេត លើកនេះត្រូវគេសន្និដ្ឋានថា ជាការបន្ទាបខ្លួនរបស់អ្នកគុននិយមបុ៉ណ្ណោះ ។
ដោយឡែកចំពោះកីឡាករជ័យ ស៊ីនេត ឯណេះវិញ ទោះបីលោកប្រាប់ថា មិនសូវបានហ្វឹកហាត់ដិតដល់ដោយសារជាប់រវល់ការងារផ្សេង ក៏លោកអះអាងថា ត្រូវតែយកឈ្នះកីឡាករផាន់ សារុន ឱ្យខាងតែបានក្នុងជំនួបលើកដំបូងនេះ ។ លោកនិយាយថា ការប្រកួតនៅថ្ងៃស្អែកនេះ លោកនឹងប្រឹងឱ្យអស់ពីសមត្ថភាពដែលខ្លួនមានមិនឱ្យទស្សនិកជន ក៏ដូចជាអ្នកគាំទ្រលោកខកចិត្តឡើយ ។ ចាំមើល តើកីឡាករទាំង២នាក់នេះអ្នកណានឹងក្លាយជាអ្នកឈ្នះពិតប្រាកដនៅថ្ងៃស្អែកនេះ ។
បន្ថែមពីលើការប្រកួតរវាងកីឡាករទាំងពីរនៅថ្ងៃស្អែក ក៏មានគូពិសេសមួយគូទៀត គឺកីឡាកររឿម វណ្ណៈ មកពីសមាគមកីឡាប្រដាល់ក្រសួងការពារជាតិ ជួបកីឡាករម៉ៅ ដាំដូច មកពីក្លិបខ្លារខិនមានរិទ្ធ ។ រឿម វណ្ណៈ ទោះបីគេជាអ្នកប្រដាល់ចាស់វស្សាដែលតែងលេចមុខនៅលើសង្វៀនញឹកញាប់ក្តី ក៏គេមិនហ៊ានមើលស្រាលសមត្ថភាពកីឡាករម៉ៅ ដាំដូច នោះទេ ។ តាមការសង្កេតការប្រកួតកន្លងមក កីឡាករទាំងពីរហាក់មានសមត្ថភាពប្រហាក់ប្រហែលគ្នាពិបាកបែងចែកថា នរណាខ្លាំងជាងនរណាណាស់ បើមើលលើវិជ្ជាគុន ។ បុ៉ន្តែបើពិនិត្យឱ្យបានដិតដល់ ម៉ៅ ដាំដូច ល្អជាងត្រង់មានចិត្តអំណត់ វាយមិនចេះច្រឡោតផ្តេសផ្តាស ដែលផ្ទុយស្រឡះពី រឿម វណ្ណៈ ដែលមានចិត្តឆេវឆាវធ្វើឱ្យគេឧស្សាហ៍ភ្លាត់ស្នៀតពេលប៉ះគូប្រកួតដែលវាយតាមបច្ចេកទេស ។
ក្រៅពីនេះ ក៏មានការប្រកួតរវាងកីឡាករណក់ ស៊ីនួន មកពីក្លិបតាព្រហ្មមានជ័យបង្ក្រាបគ្រឿងញៀន និងកីឡាករម៉ន វណី្ណ មកពីក្លិបការិយាល័យទី៥ កងទ័ពជើងគោក ។ កីឡាករផាន់ ផាត់យុទ្ធ មកពីក្លិបសាលវ័ន្តកីឡា ប្រកួតជាមួយកីឡាករឈាង ឡុង មកពីក្លិបអេភូថងកីឡា និងគូចុងក្រោយកីឡាករប្រាក់ រស្មី មកពីក្លិបតាឯកមានរិទ្ធ ប្រកួតជាមួយកីឡាករជឹម ចិត្រា មកពីក្លិបខ្លារខិនមានរិទ្ធ ៕
ចែករំលែកព័តមាននេះ