រាជធានីភ្នំពេញ ៖ តាំងពីមានឈ្មោះល្បីល្បាញ កីឡាករផន ផល្លា ដែលមនុស្សភាគច្រើនស្គាល់ឈ្មោះចាស់ថា គង់ វង្សរាជ មិនដែលបានសាកកម្លាំងជាមួយកីឡាករជើងខ្លាំង ជុន សាវុធ នោះទេ ។ ប៉ុន្តែនៅថ្ងៃសៅរ៍ ទី៣០ ឧសភា ស្អែក អ្នកទាំងពីរបានប៉ះគ្នាហើយដើម្បីសាកល្បងកម្លាំងរៀងខ្លួន ។ ការប្រកួតរវាងកីឡាករទាំង២ នឹងធ្វើឡើងនៅលើសង្វៀនទូរទស្សន៍ SEA-TV ក្នុងព្រឹត្តិការណ៍ប្រដាល់ពេលរសៀល ។
អ្នកទាំងពីរនេះនឹងត្រូវប៉ះគ្នាក្នុងប្រភេទទម្ងន់៦០គីឡូក្រាម ដែលជាការប៉ះគ្នាលើកដំបូងក្នុងប្រវត្តិសាស្ត្របន្ទាប់ពីភាគីម្ខាងៗមានឈ្មោះបោះសំឡេងនៅក្នុងពិភពប្រដាល់នោះផងដែរ ។ យោងតាមប្រវត្តិ ផន ផល្លា គឺជាអ្នកប្រដាល់ជើងចាស់ដែលមានស្នៀតប្រដាល់មុតស្រួច ហើយអាចនិយាយបានថា ក្នុងចំណោមកីឡាករដែលមានប្រភេទទម្ងន់ប្រហែលគ្នា និងមានវ័យស្របាលគ្នា គឺពិបាកវាយស៊ីគេណាស់ ។ ប៉ុន្តែ ជុន សាវុធ ឯណោះវិញ ក៏មិនណយនោះដែរដោយសារតែគេ គឺជាកីឡាករចាស់វស្សាដែលក្រៅពីមានបទពិសោធន៍ពេញខ្លួន ក៏នៅមានកម្លាំងស៊ុហ្វខ្លាំង និងមានថាមពលមិនទាន់ចុះខ្សោយនៅឡើយ ។ ជុន សាវុធ គឺជាជើងខ្លាំងម្នាក់ដែលកីឡាករស្របាលគេ ឬជើងចាស់មុនជំនាន់សុទ្ធតែមិនអាចមើលស្រាលដោយសារការប្រើក្បាច់គុន និងកម្រិតវាយលុករបស់គេនៅតែល្អដែលអាចនិយាយបានថា នៅមានកម្លាំងពេញនៅឡើយ ។ បើទោះជាមួយរយៈចុងក្រោយគេបានរយាលពីការឡើងរេញ ក៏សន្ទុះនៃការសម្រេចផលនៅតែល្អធ្វើឱ្យអ្នកគាំទ្រពេញចិត្ត។ ទោះបីយ៉ាងណា គេក៏មិនអាចប្រដូចនឹងលទ្ធផលប្រកួតដែលកីឡាកររូបនេះធ្លាប់សម្រេចបានកាលពីមួយរយៈមុននោះដែរ ដោយសារតែវ័យក៏កាន់តែជ្រេ ហើយការចូលខ្លួនហ្វឹកហាត់ក៏មិនសូវសស្រាក់សស្រាំ ។ ជុន សាវុធ ជាកីឡាករនៅមានកណ្ដាប់ដៃ និងជើងធ្ងន់ ហើយបើទោះជាការវាយចេញហាក់មិនសូវច្បាស់បន្តិចមែន ក៏អ្នកទស្សនាមើលឃើញថា ការប្រើកម្លាំងបាយរបស់គេនៅទទួលបានផ្លែផ្កាជាជាងការប្រើបច្ចេកទេសនោះទៅទៀត ។ កីឡាករនេះបើគិតពីស្នាដៃអតីតកាល គេល្អជាង ផន ផល្លា និងជារៀមច្បងល្អម្នាក់ ទើបអ្នកណាក៏យល់ថា ការប៉ះប្រកួតរបស់អ្នកទាំងពីរនៅវេលារសៀលថ្ងៃស្អែក គឺការសាកកម្លាំងរបស់ ផន ផល្លា ទៅលើជើងចាស់ និងជាជើងខ្លាំង ជុន សាវុធ ។
លោកញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍ប្រាប់ថា កីឡាករជុន សាវុធ ទើបតែបានបង្ហាញខ្លួនឡើងប្រកួតនៅលើសង្វៀនទូរទស្សន៍របស់លោក២លើកទាំងលើកហ្នឹងប៉ុណ្ណោះ ដោយការប្រកួតលើកមុន គេបានឈ្នះកីឡាករវ័យក្មេង និងជើងខ្លាំង ចាន់ គង់រាជ មកពីក្លិបតាព្រហ្មមានជ័យដោយពិន្ទុ ។ ប៉ុន្តែសម្រាប់ប៉ុស្ដិ៍ផ្សេង កីឡាកររូបនេះឡើងរេញស្ទើររាប់ភ្លេចទៅហើយដោយការឡើងរេញរបស់គេ គឺមិនសូវជាធ្វើឱ្យអ្នកទស្សនាខកចិត្តឡើយ។ លោកមានជំនឿថា នេះជាការប្រកួតដែលធ្វើឱ្យ ផន ផល្លា ហ៊ឹងត្រចៀក ដោយសារតែ ផន ផល្លា បើទោះជាអាចឈ្នះបាន ក៏ត្រូវប្រថុយដោយសាច់ស្រស់ ឈាមស្រស់ ហើយស្រួលមិនស្រួលអាចមានរបួស ឬអាចនឹងចាញ់ក្នុងការតស៊ូនោះផង ។ លោកមើលឃើញថា កីឡាករទាំងពីរមិនស៊ីសងគ្នានោះទេ ប៉ុន្តែសម្រាប់អ្នកទស្សនាគឺពិតជាជ្រើសយក ផន ផល្លា ច្រើនជាង ដោយសារតែ ផន ផល្លា គេជាកីឡាករវ័យក្មេង និងនៅមានកម្លាំងប្រយុទ្ធមុតជាង ។ គាប់ជួនជាជុន សាវុធ ត្រូវគេមើលឃើញថា មិនសូវរឹងប៉ឹងសម្រាប់ជំហរ និងអន់ជើងក្រោមផង ទើបអ្នកស្នេហាវិស័យប្រដាល់ថ្លែងការចាប់អារម្មណ៍ច្រើនជាងគូប្រកួត ។ បើទោះជា ជុន សាវុធ សម្បូរល្បិច និងមានបច្ចេកទេសពិបាកមើលស្រាល ក៏ការប្រកួតចាញ់ ចាន់ ស៊ីណាត មកពីក្លិបនិរោធមានជ័យក្នុងទឹកទី៤ កាលលើកចុងក្រោយធ្វើឱ្យអ្នកគាំទ្រមានមន្ទិលសម្រាប់ការប្រកួតលើកនេះដែរ ។ អ្នកស្នេហាការប្រដាល់ទាយថា គូនេះ ផន ផល្លា នឹងឈ្នះ បើទោះជាឈ្នះដោយតានតឹងបន្តិចក្ដី ។ ប៉ុន្តែក៏មានអ្នកបង្ហាញការមិនជឿជាក់លើភាគីណាម្នាក់ផងដែរដោយសារតែ ផន ផល្លា ក៏បានចាញ់កីឡាករហេង វាសនា មកពីក្លិបព្រៃទទឹងខេត្តបាត់ដំបងក្នុងទឹកទី៣ ក្នុងការប្រកួតលើកចុងក្រោយដូចគ្នា ។
នៅក្នុងព្រឹត្តិការណ៍នោះដែរ កីឡាករល្អ និងមានសមត្ថភាពផ្សេងទៀត ក៏បានបង្ហាញខ្លួនមុនការប៉ះប្រកួតរបស់កីឡាករទាំង២ផងដែរដើម្បីញ៉ាំងកម្មវិធីប្រដាល់នាពេលរសៀលនោះឱ្យមើលទៅទាក់ទាញ និងប្រកបដោយភាពជក់ចិត្ត។ ការប្រកួតនោះរួមមាន កីឡាកររិទ្ធ ប្រាក់ប៊ិន មកពីក្លិបកងពលតូចលេខ៧០ ប៉ះប្រកួតជាមួយកីឡាករថាន រ៉ាឌី មកពីក្លិបសម្រែករាជសីហ៍បង្ក្រាបគ្រឿងញៀនក្នុងនាមជាគូសងសឹក ។ គូនេះ កាលពី២សប្ដាហ៍មុន កីឡាកររិទ្ធ ប្រាក់ប៊ិន វាយឈ្នះ រ៉ាឌី ទាំងត្រដាបត្រដួស ទើបគេរង់ចាំមើលថា តើអ្នកធ្លាប់ចាញ់ពីមុននឹងសងសឹកបាន ឬក្លាយជាអ្នកចាញ់ទៀត ? គូបន្ទាប់រួមមាន ខឹក សុខឿន មកពីក្លិបកងពលតូចទ័ពឆត្រយោង៩១១ ជួបសងសឹកដូចគ្នាជាមួយកីឡាករស៊ឹម ប៊ុនឆៃ មកពីក្លិបព្រៃទទឹងខេត្តបាត់ដំបង ។ គូនេះកាលប្រកួតលើកមុនមានសភាពល្អមើលណាស់ ហើយក៏ទទួលបានភាពទាក់ទាញខ្លាំងណាស់ដែរ។ គូបន្ទាប់ គឺការប៉ះគ្នារវាងកីឡាកររស់ វិបុល មកពីក្លិបសាលវ័ន្តកីឡា ឡើងសងសឹកដូចគ្នាជាមួយកីឡាករ គង់ ហ៊ូវ មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ