ខេត្តកំពង់ធំ ៖ ខណៈដែលត្រីគ្រប់ប្រភេទប្រមាណជិត២០០តោន នៅតំបន់អភិរក្សទន្លេឆ្មា ក្នុងភូមិសាស្ត្រឃុំពាមបាង ស្រុកស្ទោង ខេត្តកំពង់ធំ បានងាប់ជាបន្តបន្ទាប់ បន្ទាប់ពីមានខ្យល់ព្យុះបោកបក់នាដើមរដូវវស្សាតាំងពីថ្ងៃទី២៣ដល់ថ្ងៃទី២៦ ឧសភា ២០១៥ កន្លងទៅនេះ មន្ត្រីជំនាញបានសំដែងការព្រួយបារម្ភយ៉ាងខ្លាំង ពិសេសទៅលើបញ្ហាបំរែបំរួលនៃអាកាសធាតុ ។
ប៉ុន្មាននាទីតាមប្រព័ន្ធទូរស័ព្ទ នារសៀលថ្ងៃទី២៧ ឧសភា ២០១៥ លោក អេង ជាសាន្ត ប្រធានរដ្ឋបាលជលផលបានគូសបញ្ជាក់ថា លោកមានការព្រួយបារម្ភយ៉ាងខ្លាំងពីបញ្ហាសីតុណ្ហភាព កំដៅឡើងខ្លាំងដែលជាហេតុធ្វើឲ្យប៉ះពាល់ដល់តំបន់អភិរក្សទន្លេឆ្មា ព្រោះថានៅតំបន់នោះស្ថានភាពទឹកគោករាក់។
លោកបានបន្តថា ចំពោះបញ្ហាប្រឈមមុខ ខាងជំនាញនឹងខិតខំរិះរកវិធីសាស្ត្រថាត្រូវធ្វើយ៉ាងណាដើម្បីឲ្យមានទឹកគ្រប់គ្រាន់សំរាប់ផ្គត់ផ្គង់តំបន់នោះ ដើម្បីបញ្ចៀសផលប៉ះពាល់ ។ ម្យ៉ាងទៀតលោកក៏សូមអំពាវនាវដល់ប្រជាពលរដ្ឋទាំងអស់កុំចូលទៅជិតតំបន់នោះ និងកុំប្រើប្រាស់ឧបករណ៍ណាដែលធ្វើឲ្យប៉ះពាល់ដល់អាយុជីវិតមច្ឆា ។ ប៉ុន្តែលោកបានបញ្ជាក់ថា ចំពោះស្ថានភាពត្រីងាប់ គឺប្រជាពលរដ្ឋអាចដងយកទៅប្រើការតាមតំរូវការចុះ ។
ជុំវិញការបាត់បង់ធនធានមច្ឆជាតិចំនួន១៧៦តោន នៅតំបន់អភិរក្សធនធានធម្មជាតិអេកូឡូស៊ី ទន្លេឆ្មា ត្រូវបានលោក ប៉ែន វណ្ណរិទ្ធ នាយខណ្ឌរដ្ឋបាលជលផលកំពង់ធំបានឲ្យដឹងថា នេះមិនមែនជាលើកទី១ នោះឡើយ ដែលត្រីគ្រប់ប្រភេទនៅតំបន់អភិរក្សទន្លេឆ្មាបានងាប់ ពោលគឺជារៀងរាល់ឆ្នាំ នៅអំឡុងខែឧសភា ត្រីនៅតំបន់នេះតែងតែងាប់រាបរយតោន ។
ទាក់ទងស្ថានភាពជាក់ស្ដែង លោកនាយខណ្ឌបានបន្តថា ក្នុងអំឡុងខែនេះ ទឹកកំពស់ប្រមាណជា២ទៅ៣តឹកតែប៉ុណ្ណោះ និងមានល្បាប់ភក់ច្រើន នៅពេលមានខ្យល់ព្យុះម្ដងៗ គឺបានធ្វើឲ្យទឹក និងល្បាប់ភក់កករល្អក់ និងបានធ្វើឲ្យបាត់អុកស៊ីសែន ។
វិធានការចំពោះមុខ រដូវបិទនេសាទជិតចូលមកដល់ លោកសូមអំពាវនាវដល់ប្រជាពលរដ្ឋ ធ្វើយ៉ាងណាចូលរួមអភិរក្សពូជត្រីគ្រប់ប្រភេទដែលជាធនធានធម្មជាតិរបស់យើងទាំងអស់គ្នាកុំឲ្យបាត់បង់៕
ចែករំលែកព័តមាននេះ