រាជធានីភ្នំពេញ ៖ គ្រោះថ្នាក់ចរាចរណ៍មួយកើតឡើងរវាងម៉ូតូវីវ៉ាពីរគ្រឿងបុកគ្នាពេញទំហឹង បណ្តាលឱ្យរបួសធ្ងន់និងស្រាល៤នាក់ កាលពីវេលាម៉ោង៩និង២០នាទីយប់ថ្ងៃទី២៧ ឧសភា នៅក្បែរស្ថានីយបូមទឹក
រាជធានីភ្នំពេញ ៖ គ្រោះថ្នាក់ចរាចរណ៍មួយកើតឡើងរវាងម៉ូតូវីវ៉ាពីរគ្រឿងបុកគ្នាពេញទំហឹង បណ្តាលឱ្យរបួសធ្ងន់និងស្រាល៤នាក់ កាលពីវេលាម៉ោង៩និង២០នាទីយប់ថ្ងៃទី២៧ ឧសភា នៅក្បែរស្ថានីយបូមទឹក តាមផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន ។
អ្នកឃើញហេតុការណ៍បានឲ្យដឹងថា មុនពេលកើតហេតុ គេឃើញម៉ូតូបង្កម៉ាកវីវ៉ា ពណ៌ខ្មៅ ស៊េរី២០០៦ ពាក់ស្លាកលេខភ្នំពេញ1K-1972 ជិះគ្នា២នាក់ ធ្វើដំណើរពីលិចទៅកើត ជិះនៅខាងឆ្វេងដៃ ទៅបុកម៉ូតូវីវ៉ា ស៊េរី២០០៨ ពណ៌ខ្មៅ ពាក់ស្លាកលេខភ្នំពេញ1X-0167 ជិះគ្នា២នាក់ ដូចគ្នា ពីកើតទៅលិច ពេញទំហឹង បណ្តាលឲ្យអ្នកជិះម៉ូតូទាំងពីរគ្រឿងរបួសធ្ងន់២នាក់ និងអ្នករួមដំណើរជាមួយរបួសស្រាល២នាក់ ។
ក្រោយពេលកើតហេតុ អ្នកបើកម៉ូតូវីវ៉ាបង្ករបួសធ្ងន់រហូតសន្លប់ ចំណែកអ្នកបើកម៉ូតូវីវ៉ាមួយគ្រឿងទៀតរបួសធ្ងន់ដែរតែមិនសន្លប់ទេ បានទូរស័ព្ទហៅសាច់ញាតិមកជួយដោះស្រាយ និងទាមទារសំណងនៅកន្លែងកើតហេតុ រីឯភាគីម្ខាងទៀតដែលសន្លប់ក៏ចង់ចរចាគ្នាដែរ ។
អ្នកសន្លប់ស្តូកស្តឹងត្រូវគេបញ្ជូនតាមរថយន្តសង្គ្រោះទៅគ្លីនិកឯកជនមួយ ចំណែកអ្នករបួសធ្ងន់ដែលចង់ទាមទារដោះស្រាយនោះមិនបានឡើងរថយន្តទៅព្យាបាលទេ ហើយត្រូវសាច់ញាតិជូនទៅព្យាបាលដោយខ្លួនឯង ។
ចំណែកម៉ូតូទាំងពីរគ្រឿងត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌចំការមន រង់ចាំដោះស្រាយតាមច្បាប់ ៕
ចែករំលែកព័តមាននេះ