ខេត្តកំពង់ឆ្នាំង ៖ រថយន្តម៉ាកតូយ៉ូតារ៉េវហ្វ័រមួយគ្រឿង បានរងការខូចខាតស្ទើរទាំងស្រុង បន្ទាប់ពីបានបុកជាមួយគូទរថយន្តធុនធំ ដឹកស្រូវ ខណៈដែលរថយន្តដឹកស្រូវកំពុងរ៉ឺយ៉ែទៅមុខថយក្រោយ ដើម្បីទយគូទរថយន្តចូលកន្លែងដាក់ស្រូវ ។
ខេត្តកំពង់ឆ្នាំង ៖ រថយន្តម៉ាកតូយ៉ូតារ៉េវហ្វ័រមួយគ្រឿង បានរងការខូចខាតស្ទើរទាំងស្រុង បន្ទាប់ពីបានបុកជាមួយគូទរថយន្តធុនធំ ដឹកស្រូវ ខណៈដែលរថយន្តដឹកស្រូវកំពុងរ៉ឺយ៉ែទៅមុខថយក្រោយ ដើម្បីទយគូទរថយន្តចូលកន្លែងដាក់ស្រូវ ។
ហេតុការណ៍នេះកើតឡើងកាលពីវេលាម៉ោង២ និង៥០នាទីរសៀលថ្ងៃទី២៧ ឧសភា ២០១៥ ស្ថិតលើកំណាត់ផ្លូវជាតិលេខ៥ ក្នុងចន្លោះគីឡូម៉ែត្រលេខ១០០ និង១០១ ក្នុងភូមិក្រាំងព្រះស្វាយ ឃុំស្វាយជ្រុំ ស្រុករលាប្អៀរ ក្នុងនោះសំណាងល្អណាស់ ដែលមនុស្សជិះក្នុងរថយន្ត២នាក់ប្តី-ប្រពន្ធ និងកូនតូចម្នាក់ទៀត គ្រាន់តែរងរបួសបន្តិចបន្តួចប៉ុណ្ណោះ ។
សមត្ថកិច្ចនគរបាលស្រុករលាប្អៀរបានឱ្យដឹងថា រថយន្តដែលរងការខូចខាតនោះម៉ាកតូយ៉ូតា រ៉េហ្វ័រ ពណ៌ទឹកប្រាក់ ពាក់ស្លាកលេខភ្នំពេញ 2AE.6650 បើកបរដោយស្ត្រីឈ្មោះរ៉េត រី អាយុ៣២ឆ្នាំរួ មដំណើរជាមួយប្តីដែលជិះនៅខាងក្រោយឈ្មោះលឹម សុភា អាយុ៤៣ឆ្នាំ និងកូនស្រីម្នាក់ទៀតអាយុប្រមាណ៦ឆ្នាំ ។ ចំណែកឯរថយន្តបង្កម៉ាកហ្វុយហ្សូ ពណ៌ខៀវ ពាក់ស្លាកលេខ រតនគីរី 3A.0168 បើកបរដោយជនពុំស្គាល់ឈ្មោះ ។
ប្រភពដដែលបានបន្តថា មុនពេលកើតហេតុ រថយន្តម៉ាករ៉េហ្វ័រខាងលើ បានធ្វើដំណើរពីកើតទៅលិច តាមបណ្តោយផ្លូវជាតិលេខ៥ លុះមកដល់ចំណុចកើតហេតុ ស្រាប់តែមានរថយន្តធុនធំម៉ាកហ្វុយហ្សូខាងលើ ដែលឈប់ក្នុងទិសស្របគ្នា បានដាក់លេខថយក្រោយចេញកន្ទុយរថយន្តមកក្រៅ ដើម្បីចូលកន្លែងដាក់ស្រូវ ក៏ត្រូវរថយន្តរ៉េហ្វ័របុកគូទរថយន្តដឹកស្រូវនោះយ៉ាងពេញទំហឹងតែម្តង បណ្តាលឱ្យរថយន្តរ៉េហ្វ័រខ្ទេចមួយចំហៀងខាងស្តាំទាំងស្រុង ។ សំណាងណាស់ ដែលអ្នកបើកបរជាប្រពន្ធនៅខាងឆ្វេង និងប្តីដែលជិះអោបកូនតូចនៅខាងក្រោយអង្គុយផ្នែកខាងឆ្វេងដែរ ទើបទាំង៣នាក់គ្រាន់តែ រងរបួសតិចតួចប៉ុណ្ណោះ ។
ក្រោយកើតហេតុ អ្នកបើកបររថយន្តធុនធំបានបើករថយន្តគេចតាមផ្លូវជាតិទៅលិច រួចបត់ចូលតាមផ្លូវលំ ហើយទៅបុកនិងបង្គោលដាក់ដងទង់ជាតិវត្តមួយក្នុងឃុំមេលំ រួចគេចយកទៅលាក់ទុកក្នុងស្រែ ក្នុងភូមិជំទាវបុត្រី ឃុំមេលំ ស្រុកបរិបូរណ៌ រួចរត់គេចខ្លួនបាត់តែម្តង ។
សមត្ថកិច្ចនគរបាលបានឱ្យដឹងថា រថយន្តហ្វុយហ្សូត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកបរិបូរណ៍ ជាបណ្តោះអាសន្ន ចំណែករថយន្តរ៉េវហ្វ័រដែលរងការខូចខាតស្ទើរទាំងស្រុង ត្រូវបានស្ទូចយកមករក្សាទុកនៅការិយាល័យចរាចរណ៍ផ្លូវគោក ។
ចែករំលែកព័តមាននេះ