រាជធានីភ្នំពេញ ៖ ជនសង្ស័យជាចោរឆក់ទូរស័ព្ទម្នាក់ត្រូវបានម្ចាស់ទូរស័ព្ទ និងប្រជាពលរដ្ឋនាំគ្នាជិះម៉ូតូដេញចាប់ខ្លួនបានយកទៅប្រគល់ឱ្យប៉ូលិស ក្រោយពីជននោះជិះម៉ូតូមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ១BG-១៥៣២ តែម្នាក់ឯងធ្វើសកម្មភាពឆក់យកទូរស័ព្ទដៃម៉ាក iphone6 plus ពីជនរងគ្រោះពីរនាក់ធ្វើដំណើរតាមម៉ូតូរ៉ឺម៉កមួយគ្រឿង ហើយព្យាយាមជិះគេចខ្លួន។
ករណីនេះបានកើតឡើងកាលពីវេលាម៉ោង៩ និង៣០នាទីព្រឹក ថ្ងៃទី២៧ ឧសភា ២០១៥ នៅខាងមុខសាលាវិទ្យាល័យទួលស្វាយព្រៃ ផ្លូវលេខ១៩៩ ក្នុងសង្កាត់ទួលស្វាយព្រៃទី១ ខណ្ឌចំការមន។
តាមប្រភពព័ត៌មានពីកម្លាំងនគរបាលបានឱ្យដឹងថា ជនល្មើសដែលឃាត់ខ្លួនបាននេះមានឈ្មោះឆោម ចាន់ឡាយ ហៅថន អាយុ៣៤ឆ្នាំ ស្នាក់នៅម្តុំលូប្រាំ ក្នុងសង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅភូមិពោធិចិនដាំ ឃុំខ្លាវ ស្រុកព្រៃវែង ខេត្តព្រៃវែង ។
មុនពេលកើតហេតុជនរងគ្រោះទាំងពីរនាក់ប្តីប្រពន្ធបានធ្វើដំណើរតាមម៉ូតូរ៉ឺម៉កមួយគ្រឿងក្នុងទិសដៅពីត្បូងទៅជើង លុះដល់កន្លែងកើតហេតុបុរសជាជនល្មើសក៏បានជិះម៉ូតូមកពីក្រោយ និងធ្វើសកម្មភាពឆក់យកទូរស័ព្ទពីដៃជនរងគ្រោះបាន ហើយជិះរត់តែម្តង។
ប្រភពដដែលបានឱ្យដឹងទៀតថា ពេលនោះជនរងគ្រោះទាំងពីរនាក់ប្តីប្រពន្ធក៏បានស្រែកឆោឡោឡើង និងឱ្យម៉ូតូរ៉ឺម៉ក រួមទាំងអ្នកធ្វើដំណើរតាមផ្លូវជិះម៉ូតូដេញតាមទាន់ធាក់ផ្តួលម៉ូតូដែលជនសង្ស័យកំពុងជិះយកទូរស័ព្ទដៃបានមកវិញ ទើបចាប់ខ្លួនប្រគល់ទៅឱ្យកម្លាំងនគរបាល៕
ចែករំលែកព័តមាននេះ