ខេត្តកំពង់ស្ពឺ ៖ ឈើប្រណីតជាច្រើនដុំ ដែលដឹកជញ្ជូនតាមគោយន្តបន្តកន្ទុយគ្នាដែលគេដឹងថា ជារបស់ក្រុមឈ្មួញរកស៊ីដុសស្លែ ប្រចាំតំបន់ត្រពាំងជោរ កំពុងតែសមុ្រកដឹកចេញពីតំបន់ដែនជម្រកសត្វព្រៃភ្នំឱរ៉ាល់ ដោយមានការបើកដៃពីលោកយ៉ង ភិរម្យ នាយកដែនជម្រកផ្ទាល់ ។
តាមប្រភភពព័ត៌មានបានបង្ហើបឱ្យដឹងថា ការដឹកជញ្ជូនឈើធម្មតា និងឈើប្រណីតនៅតែកើតមាន ខណៈដែលដែនជម្រកសត្វព្រៃភ្នំឱរ៉ាល់ បិទមិនឱ្យមានការដឹកជញ្ជូនឆ្លងកាត់តំបន់នោះ ។ ការដឹកចេញឈើប្រណីតទាំងអស់នេះ គឺមានការរត់ការជាមួយលោកយ៉ង ភិរម្យ នាយកដែនជម្រកសត្វព្រៃភ្នំឱរ៉ាល់ ។ បើក្រុមឈ្មួញមិនរត់ការទេនោះ ច្បាស់ជាត្រូវចាប់បង្ក្រាបបង្ហាញស្នាដៃមិនខានឡើយ ។
ប្រភពបានបន្តថា ឈើប្រណីតដែលដឹកតាមគោយន្តឆ្លងកាត់តំបន់ដែនជម្រកសត្វព្រៃភ្នំនោះ ជាឈើរបស់ឈ្មួញរកស៊ីដុះស្លែ មានឈ្មោះជឿង ថេង ជាមន្ត្រីយោធាភូមិភាគ៣ និងឈ្មោះណុប ឌី បានលួចដឹកទាំងយប់ទាំងថ្ងៃ មកស្តុកទុកនៅម្តុំត្រពាំងជោរ ក្នុងស្រុកឱរ៉ាល់ ។
ប្រភពបានបង្ហើបឱ្យដឹងថា ការដឹកឈើលួួចលាក់ និងឃុបឃិតជាមួយជំនាញ និងដែនជម្រកសត្វព្រៃភ្នំឱរ៉ាល់នេះ គឺក្រុមឈ្មួញបានបង់លុយទៅឱ្យក្នុង១ខែ ១ពាន់ដុល្លារ ជាថ្នូរនឹងការមិនបង្ក្រាបនោះទេ ។
ការប្រព្រឹត្ត និងឃុបឃិតរវាងក្រុមឈ្មួញរកស៊ីដឹកឈើជាមួយលោកយ៉ង ភិរម្យ នាយកដែនជម្រកសត្វព្រៃភ្នំឱរ៉ាល់នេះ សបញ្ជាក់ឱ្យឃើញថា កំពុងតែប្រព្រឹត្តអំពើពុករលួយជាជំហរហើយ ។
ប្រជាពលរដ្ឋរស់នៅក្នុងខេត្តកំពង់ស្ពឺ សំណូមពរដល់ថ្នាក់លើ សូមពិនិត្យមើលទង្វើរបស់លោកនាយកដែនជម្រកសត្វព្រៃភ្នំឱរ៉ាល់និងមានចំណាត់ការរឹតបន្តឹងទង្វើរបស់មន្ត្រីថ្នាក់ក្រោម បើបណ្តែតបណ្តោយតទៅទៀត ព្រៃឈើក្នុងដែនជម្រកច្បាស់ជារលាយហិនហោចជាក់ជាមិនខានឡើយ ។
ពាក់ព័ន្ធនឹងការលើកឡើងនេះ អ្នកយកព័ត៌មានមិនអាចសុំការបកស្រាយកពីលោកយ៉ង ភិរម្យ នាយកដែនជម្រកសត្វព្រៃភ្នំឱរ៉ាល់បានទេ ។
ចែករំលែកព័តមាននេះ