រាជធានីភ្នំពេញ ៖ នៅស្នាក់ការគណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃទី២៦ ឧសភា មានរៀបចំធ្វើសន្និសីទសារព័ត៌មានមួយស្តីពីការឧបត្ថម្ភរបស់ក្រុមហ៊ុនថ្មីមួយឈ្មោះ Union Pay ដល់ក្រុមប្រតិភូកីឡាកម្ពុជាដែលត្រូវចេញទៅចូលរួមប្រកួតកីឡាស៊ីហ្គេមលើកទី២៨ នៅប្រទេសសិង្ហបុរី ។ សន្និសីទសារព័ត៌មាននេះបានការអញ្ជើញចូលរួមពីលោកព្រុំ ប៊ុនយី អគ្គនាយករងនៃក្រសួងអប់រំ យុវជន និងកីឡា, លោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ។
លោកវ៉ាត់ ចំរើន បានមានប្រសាសន៍ក្នុងឱកាសនោះថា ពេលនេះគណៈកម្មាធិការជាតិអូឡាំពិកកម្ពុជាទទួលបានដៃគូឧបត្ថម្ភថ្មីមួយទៀតហើយ ។ ដៃគូថ្មីមួយនេះបានជួយឧបត្ថម្ភជាលើកដំបូងដល់ប្រតិភូកីឡាកម្ពុជាដែលត្រូវចេញទៅចូលរួមប្រកួតកីឡាស៊ីហ្គេមលើកទី២៨ នៅប្រទេសសិង្ហបុរី ។ លោកបានបន្តទៀតថា ក្នុងចំនួនទឹកប្រាក់ឧបត្ថម្ភទាំង១២.៨០០ដុល្លារនេះនឹងត្រូវធ្វើការបែងចែកជា៣ចំណែក ក្នុងនោះទឹកប្រាក់ចំនួន៤.៨០០ដុល្លារសម្រាប់ទុកចែកដល់កីឡាករ-កីឡាការិនីចំនួន១២នាក់ដំបូងដែលទទួលបានមេដាយ ។ ទឹកប្រាក់ចំនួន៣.០០០ដុល្លារនឹងត្រូវផ្តល់ទៅឱ្យក្រុមកីឡាបាល់ទាត់ជម្រើសជាតិ និងនៅសល់៥.០០០ដុល្លារនឹងត្រូវផ្តល់ជូនទៅដល់គណៈកម្មាធិការជាតិអូឡាំពិកកម្ពុជាសម្រាប់ការចំណាយផ្សេងៗ ។ លោកបញ្ជាក់ថា ក្រុមហ៊ុនថ្មីមួយនេះគឺជាក្រុមហ៊ុនចិនដែលមកធ្វើការបណ្តាក់ទុនរកស៊ីនៅក្នុងប្រទេសកម្ពុជាលើផ្នែកហិរញ្ញវត្ថុ ដែលសព្វថ្ងៃមានសាខាជាច្រើននៅលើពិភពលោក ។ ក្រុមហ៊ុនចិនមួយនេះគេមានឆន្ទៈចង់ជួយដល់វិស័យកីឡានៅកម្ពុជា មិនថាប្រភេទកីឡាអ្វីនោះទេ បុ៉ន្តែជំហានដំបូងគេធ្វើបានតែបុ៉ណ្ណឹងដោយសន្យាថា គេនឹងបន្តជួយដល់រាល់ការចេញដំណើររបស់អត្តពលិកកម្ពុជាទៅចូលរួមប្រកួតនៅលើឆាកអន្តរជាតិទាំងព្រឹត្តិការណ៍ប្រកួតកីឡាអូឡាំពិក ទាំងព្រឹត្តិការណ៍កីឡាអាស៊ីហ្គេមជាដើម ។
លោកវ៉ាត់ ចំរើន មានការចាប់អារម្មណ៍យ៉ាងខ្លាំងចំពោះការទទួលបានដៃគូឧបត្ថម្ភថ្មីមួយនេះ ។ កន្លងមកយើងមានដៃគូឧបត្ថម្ភធំៗមួយចំនួនដែលគេបានចូលរួមចំណែកជួយដល់កីឡាករ-កីឡាការិនីនៅរាល់ព្រឹត្តិការណ៍នៃការប្រកួតនៅលើឆាកអន្តរជាតិ ។ នៅពេលនេះយើងមានដៃគូថ្មីមួយទៀតដែលគេមានឆន្ទៈចូលមកជួយដល់វិស័យកីឡាខ្មែរយើង ។ លោកសង្ឃឹមថា វិស័យកីឡានៅកម្ពុជានឹងកាន់តែរីកចម្រើនយ៉ាងឆាប់រហ័សតាមរយៈការយកចិត្តទុកដាក់ពីរាជរដ្ឋាភិបាល និងដៃគូឧបត្ថម្ភនានាដែលមានចំនួនកាន់តែច្រើនឡើងជាលំដាប់ ៕
ចែករំលែកព័តមាននេះ