ខេត្តកំពង់ឆ្នាំង ៖ កាលពីព្រឹកថ្ងៃទី២៦ ឧសភា ២០១៥ លោក សោម ភិរុណ នាយខណ្ឌរដ្ឋបាលជលផលកំពង់ឆ្នាំង និងលោក លី ឡា នាយរងខណ្ឌ បានដឹកនាំកម្លាំងសមត្ថកិច្ចចំរុះរួមនិងអាជ្ញាធរភូមិ ឃុំ ស្រុក ចុះយកស្លាកការពារព្រៃឈើលិចទឹកទៅបោះនៅទីតាំងព្រៃឈើលិចទឹក ស្ថិតក្នុងភូមិកំពង់ព្រះ ឃុំឆ្នុកទ្រូ ស្រុកបរិបូណ៌ ដែលកំពុងរងដោយការកាប់ឆ្ការ ដុតបំផ្លាញ និងការបាញ់ថ្នាំសំលាប់ព្រៃឈើពីសំណាក់ជនខិលខូចមួយចំនួនដើម្បីប្រយោជន៍ផ្ទាល់ខ្លួន។
ការអនុវត្តបែបនេះធ្វើឡើង ខណៈដែលសព្វថ្ងៃមានជនខិលខូចកំពុងធ្វើសកម្មភាពដូចគ្នានេះដែរនៅឃុំប្រឡាយមាស ស្រុកកំពុងលែង ដែលមានរូបភាពធំជាងនេះ នៅមិនទាន់មានមន្ត្រីជំនាញចុះលើកស្លាកបែបនេះនៅឡើយ ។
លោក សោម ភិរុណ នាយខណ្ឌរដ្ឋបាលជលផលកំពង់ឆ្នាំងបានឱ្យដឹងថា ទីតាំងព្រៃឈើលិចទឹកដែលកម្លាំងចំរុះបានដាក់ស្លាកការពារនេះ ត្រូវបានរងគ្រោះដោយអគ្គិភ័យចំនួន២លើក នៅក្នុងខែមេសា ២០១៥ ហើយបន្តមកទៀតក៏មានការលួចបាញ់ថ្នាំសំលាប់ព្រៃក្នុងរង្វង់ព្រៃទំហំប្រមាណជាង១១ហិកតា ដែលជនខិលខូចទាំងនោះបានធ្វើឡើងដោយលួចលាក់មិនឱ្យសមត្ថកិច្ចជំនាញដឹងដើម្បីយកដីធ្វើចំការ។
ការកាប់បំផ្លាញព្រៃឈើលិចទឹក គឺជាការបំផ្លាញអាយុជីវិត និងស្បៀងខ្លួនឯង ព្រោះថាព្រៃឈើលិចទឹកមានសារប្រយោជន៍ក្នុងការស្រូបយកសារធាតុពុលពីបរិយាកាសបាន៣ដង បើប្រៀបធៀបជាមួយព្រៃឈើនៅតំបន់ខ្ពង់រាប។
ព្រៃឈើលិចទឹកជាសំបុកសំរាប់ត្រីពងកូន នៅរដូវបិទនេសាទ ជាកន្លែងលាក់ខ្លួននៃកូនមច្ឆជាតិទាំងឡាយពីសត្រូវ ជារបាំងការពារការហូរច្រោះ និងជារបាំងការពារនូវខ្យល់ព្យុះនានាផងដែរ។
ការកាប់ទន្រានរំលោភយកដីព្រៃលិចទឹក គឺប្រឈមមុខនឹងការដាក់ទោសទណ្ឌនៅក្នុងមាត្រា៩៨នៃច្បាប់ស្តីពីជលផលដែលត្រូវជាប់ពន្ធនាគារពី៣ទៅ៥ឆ្នាំ និងត្រូវដកហូតវត្ថុតាងជាសម្បត្តិរដ្ឋ ហើយត្រូវពិន័យជាប្រាក់រាប់លានរៀលទៀតផង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ