១-ឆ្មាកំជិលគិតតែដេកស៊ី
«ណាឡា» ឆ្មាអាយុ៥ឆ្នាំ របស់ន័រវែស ត្រូវម្ចាស់ថតវីដេអូបង្ហាញពីអាការកំជិលរបស់វាដោយ មួយថ្ងៃៗគិតតែស៊ីដេក និងដល់ថ្នាក់យកជើងទៅកាន់ទាញចំណីទុកស៊ីទាំងពេលកំពុងដេក ។
២-ហាមបរបាញ់សត្វ
អ្នកទេសចរមួយក្រុមថតរូបដំរីអាហ្វ្រិកនៅមាត់ទន្លេ «សូបេ» ក្នុងឧទ្យានជាតិ «សូបេ» ភាគខាងកើតឆៀងខាងជើងប្រទេសបុតស្វាណា ក្រោយពេលរដ្ឋាភិបាលប្រកាសប្រើច្បាប់ហាមបរបាញ់សត្វព្រៃគ្រប់ប្រភេទនៅក្នុងប្រទេស ។
៣-រូបគំនូរមានតម្លៃខ្ពស់
ស្ត្រីម្នាក់បានថតរូបគំនូរ Les meules Giverny ជាសមិទ្ធផលរបស់លោកគ្លោត ម៉ូណេ វិចិត្រករជនជាតិបារាំង ដាក់តាំងបង្ហាញនៅក្រុមហ៊ុនដេញថ្លៃគ្រីស្ទី ក្នុងតំបន់មេនហាតតាន ក្រុងញូវយ៉ក សហរដ្ឋអាមេរិក ដោយរំពឹងថា រូបគំនូរនេះនឹងលក់បានក្នុងតម្លៃខ្ពស់ដល់ទៅ១៨លានដុល្លារ ។
៤-យន្តហោះណាសា (NASA)
អង្គការ «ណាសា» សហរដ្ឋអាមេរិកបង្ហាញយន្តហោះគំរូ «ហ្គ្រីសឡៃនិង» ឬ «GL-10» ក្នុងពេលសាកល្បងហោះហើរនៅរដ្ឋវើជីនៀ រួមទាំងប្រើបច្ចេកវិទ្យាបញ្ជាហោះហើរពីចម្ងាយ មានស្លាបប្រវែង៣,០៥ម៉ែត្រ និងមានកង្ហារ៨ភ្ជាប់នៅពីលើស្លាបជួយឱ្យឡើងចុះជាលក្ខណៈចំណោតដូចឧទ្ធម្ភាគចក្រ ។
៥-សត្វប្រចាំត្រកូលអូស្ត្រាលីដែលជិតផុតពូជ
«Mountain Possum Pygmy» ជាសត្វស្រុកនៅអូស្ត្រាលី ដែលគេគិតថាវាបានផុតពូជក្នុងឆ្នាំ១៩៦៦ ប៉ុន្តែបានប្រទះឃើញកាលពីពេល
ថ្មីៗកន្លងមកនៅក្នុងមជ្ឈមណ្ឌលអភិរក្សសត្វរដ្ឋវិចតូរីយ៉ា ភាគខាងត្បូងប្រទេស ។
៦-អាយុ៦៧ឆ្នាំទើបរៀនចប់បរិញ្ញាបត្រ
លោករ៉េ រ៉េតឌិក អាយុ៦៧ឆ្នាំ នៅរដ្ឋ «វ៉ែស សាស់សេក» ចក្រភពអង់គ្លេស ទើបរៀនចប់ក្រោយពីចាប់ផ្តើមរៀនអស់រយៈពេល៣៥ឆ្នាំកន្លងមក ។ មិនមែនជាការរៀនមិនចេះ ឬប្រលងធ្លាក់ទេ ដោយសារតែជាប់រវល់ទៅប្រកបរបររកស៊ីអស់រយៈពេល២៣ឆ្នាំ ចូលមករៀនឡើងវិញហើយទទួលបានសញ្ញាបត្រ ។
៧-ប៉េងប៉ោងឆ្កែ តំណាងដល់បុណ្យកានីវ៉ាល់
ទស្សនិកជនម្នាក់ឈរមើលប៉េងប៉ោងឆ្កែ របស់លោកជេហ្វ ឃូន សិល្បករដ៏ល្បីជនជាតិអាមេរិករៀបតាំងលំអនៅក្នុងពិធី «កានីវ៉ាល់ រីយ៉ូ ដឹហ្សាណេរ៉ូ» នៅសារមន្ទីរក្រុងរីយ៉ូ ដឺហ្សាណេរ៉ូ ប្រទេសប្រេស៊ីល ។
៨-គំរប់៧២ឆ្នាំនៃសង្គ្រាមលោកលើកទី២
ប្រធានាធិបតីអាល្លឺម៉ង់ និងប៉ូឡូញបានដាក់កម្រងផ្កានៅឯវិមានអនុស្សាវរីយ៍ សង្គ្រាមលោកលើកទី២ ក្នុងឱកាសគំរប់ខួប៧២ឆ្នាំនៅប៉ូឡូញ ៕
ចែករំលែកព័តមាននេះ