ខេត្តកណ្តាល៖ ប្រជាពលរដ្ឋចំនួន៩១គ្រួសារ ដែលមានជីវភាពក្រីក្រទទួលអំណោយសង្គ្រោះបន្ថែមពីសប្បុរសជនតាមរយៈក្រុមការងារគណៈពង្រឹងមូលដ្ឋាន
ខេត្តកណ្តាល៖ ប្រជាពលរដ្ឋចំនួន៩១គ្រួសារ ដែលមានជីវភាពក្រីក្រទទួលអំណោយសង្គ្រោះបន្ថែមពីសប្បុរសជនតាមរយៈក្រុមការងារគណៈពង្រឹងមូលដ្ឋាន និងក្រុមការងារសហភាពសហព័ន្ធយុវជនកម្ពុជាខេត្ត ដើម្បីជួយសម្រាលទុក្ខលំបាកដល់ជីវភាពរស់នៅរបស់បងប្អូន ។
សកម្មភាពមនុស្សធម៌ចែកអំណោយដល់ពលរដ្ឋទីទ័លក្រ និងងាយរងគ្រោះដោយគ្រោះធម្មជាតិនេះបានធ្វើឡើងកាលពីថ្ងៃទី២៤ ឧសភា ។ ក្រុមការងារសហភាពសហព័ន្ធយុវជនកម្ពុជាខេត្ត ដឹកនាំដោយលោក គឿន សុភ័ត្រា អនុប្រធានសហភាពសហព័ន្ធយុវជនកម្ពុជាខេត្ត និងតំណាងឱ្យសមាគមម៉ាឡេស៊ី បាននាំយកអំណោយទៅចែកជូនដល់ពលរដ្ឋក្រីក្រចំនួន៤ឃុំ ក្នុងស្រុកកៀនស្វាយ រួមមាន ឃុំគគីរ ឃុំដីឥដ្ឋ ឃុំបន្ទាយដែក និងឃុំសំរោងធំ ក្នុងនោះ ក៏មានគ្រួសាររងគ្រោះខ្យល់កន្ត្រាក់សរុបចំនួន៧០គ្រួសារ ដោយក្នុងមួយគ្រួសារទទួលបានអង្ករ២៥គីឡូក្រាម ស្ករស១គីឡូក្រាម ទឹកដោះគោ ត្រីខកំប៉ុង ប្រេងឆា ទឹកត្រី ធុងដាក់ទឹកចំណុះ៤៥លីត្រ ឃិត១កញ្ចប់ និងប្រាក់៤មុឺនរៀល ។
ដោយឡែក នៅថ្ងៃដដែលដែរ លោក ម៉ក់ ពេជ្ជរិទ្ធ ប្រធានគណៈពង្រឹងឃុំភូមិធំបានដឹកនាំក្រុមការងារ រួមដំណើរដោយលោក អ៊ួ ឈាង អភិបាលស្រុកកៀនស្វាយ ក៏បានយកអំណោយទៅចែកជូនដល់លំនៅឋានពលរដ្ឋងាយរងគ្រោះដោយខ្យល់កន្ត្រាក់រលំផ្ទះ និងរបើកដំបូលចំនួន២១ខ្នងផ្ទះ ក្នុងឃុំភូមិធំ ដោយគ្រួសាររលំផ្ទះរាបដល់ដីចំនួន៧គ្រួសារ ក្នុងមួយគ្រួសារទទួលបានប្រាក់៥០ម៉ឺនរៀល និងផ្ទះរបើកដំបូល១៤គ្រួសារ ក្នុងមួយគ្រួសារ១៥ម៉ឺនរៀល ។
លោក អ៊ួ ឈាង បានលើកឡើងថា ប្រជាពលរដ្ឋដែលរងគ្រោះដោយខ្យល់កន្ត្រាក់ខូចខាតផ្ទះចំនួន៣៦គ្រួសារ ក៏ទទួលបានអំណោយសង្គ្រោះបន្ទាន់របស់សាខាកាកបាទក្រហមកម្ពុជាខេត្តរួចហើយ ក្រោមការដឹកនាំរបស់លោក ម៉ៅ ភិរុណ អភិបាលខេត្ត ។
នេះជាសកម្មភាពទី២ហើយ ដែលលោក គឿន សុភ័ត្រា និងលោក ម៉ក់ ពេជ្ជរិទ្ធ បានដឹកនាំក្រុមការងារនាំយកអំណោយ រួមមានគ្រឿងឧបភោគបរិភោគ និងប្រាក់ទៅចែកជូនបន្ថែមដល់ពលរដ្ឋរងគ្រោះដោយធម្មជាតិ និងទីទ័លក្រសរុបចំនួន៩១គ្រួសារ ដោយមិនប្រកាន់និន្នាការនយោបាយអ្វីឡើយ ៕
ចែករំលែកព័តមាននេះ