ខេត្តកំពង់ចាម ៖ កាលពីព្រឹកថ្ងៃទី២៥ ឧសភា ២០១៥ នៅភូមិថ្លុកជ្រៅ ឃុំខ្ចៅ ស្រុកកងមាស មានរៀបចំកម្មវិធីទស្សនកិច្ច និងសំណេះសំណាលរបស់ក្រុមហ៊ុន Media Corp ក្រោមកិច្ចសហការដោយក្រុមហ៊ុនទូរទស្សន៍ PPCTV និងCTV8 HD ដើម្បីផ្តល់ក្តីសង្ឃឹម និងស្នាមញញឹមដល់យុវនារីអង្កការអាហ្វេស៊ីបកម្ពុជា ដោយមានការចូលរួមពីសំណាក់តារាវីដេអូល្បីរបស់ប្រទេសសិង្ហបូរីចំនួន២រូប រួមទាំងខ្មែរផងដែរ ។
អគ្គនាយិកាអង្គការអាហ្វេស៊ីបកម្ពុជា ម៉ម សុម៉ាលី បានមានប្រសាសន៍ឲ្យដឹងថា ដោយមានទឹកចិត្តអាណិតស្រលាញ់ចំពោះក្មេងៗរស់នៅក្នុងមណ្ឌលបណ្តុះបណ្តាលវិជ្ជាជីវៈ និងស្តារនីតិសម្បាទាមូលដ្ឋានអាហ្វេស៊ីប កំពង់ចាម លោកជំទាវ យឹម ឆៃលីន-ហ៊ុន ម៉ានី រួមនិងសហការីជាច្រើននាក់មានទាំងតារាបរទេស២រូបនោះ គឺឈ្មោះ ZOE TAY និង ELUIN NG តារាខ្មែរលោកអេឡិចបានចំណាយពេលមកចុះសាកសួរសុខទុក្ខដល់យុវនារីចំនួនជាង៥០នាក់ដែលកំពុងស្នាក់នៅក្នុងមណ្ឌលនោះ ។
អគ្គនាយិកាអង្កការអាហ្វេស៊ីបកម្ពុជា ម៉ម សុម៉ាលី មានប្រសាសន៍បន្តថា សំរាប់អំណោយដែលត្រូវចែកជូនដល់យុវនារី រួមមានគ្រឿងឧបភោគ បរិគោគ ក្នុងនោះដូចជា អង្ករ អាវយឺត មី ស្ករគ្រាប់ សៀវភៅ សរសេរចំនួន១.០០០ក្បាល ប៊ិច១០០ដើម សឺមីដាក់ឯកសារចំនួន១០០ តែគុជហាយធីចំនួន១០០កែវ និងថវិកាដែលបានមកពីការជួយឧបត្ថម្ភរបស់សប្បុរសជននានាសរុបជិត៣.០០០ដុល្លារ ។
មណ្ឌលនេះត្រូវបានកកើតឡើងនៅក្នុងអំឡុងឆ្នាំ១៩៩៨ ក្នុងគោលបំណងជួយសង្គ្រោះដល់កុមាររងគ្រោះដោយការរំលោភបំពានផ្លូវភេទឲ្យមករស់នៅទីនេះថែមទាំងបានផ្តល់ការរៀនសូត្រនៅសាលារដ្ឋដែលស្ថិតនៅក្បែរមណ្ឌល៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ