រាជធានីភ្នំពេញ ៖ ស្រវឹងស្រាបើកម៉ូតូកង់បីរេចង្កូតទៅបុករ៉ឺម៉កម៉ូតូដែលដឹកភ្ញៀវ២នាក់ បណ្តាលឲ្យក្រឡាប់រងរបួសស្រាល ចំណែកអ្នកបើកម៉ូតូកង់បីបង្កហេតុបាក់ជើងរបួសធ្ងន់ កាលពីវេលាម៉ោង៩និង៣០នាទីយប់ថ្ងៃទី២៥ ឧសភា ស្ថិតនៅមុខផ្ទះលក់សម្ភារសំណង់ កែងផ្លូវលេខ១៩៩ និងលេខ៣៨៤ សង្កាត់ទួលស្វាយព្រៃទី២ ខណ្ឌចំការមន ។
ប្រភពព័ត៌មានបានឲ្យដឹងថា មុនពេលកើតហេតុ រ៉ឺម៉កម៉ូតូដែលដឹកភ្ញៀវប្រុស២នាក់ បើកតាមផ្លូវលេខ១៩៩ ទិសដៅពីត្បូងទៅជើង ចំណែកម៉ូតូកង់បីបង្កហេតុបើកបញ្ច្រាសទិសគ្នាពីជើងទៅត្បូង ក្នុងស្ថានភាពស្រវឹងជោក លុះមកដល់ចំណុចខាងលើក៏រេចង្កូតទៅបុករ៉ឺម៉កម៉ូតូបណ្តាលឲ្យក្រឡាប់នៅកណ្តាលផ្លូវរបួសស្រាល រីឯអ្នកបើកម៉ូតូកង់បីបង្កហេតុរបួសបាក់ជើងខាងស្តាំ ។
ក្រោយពេលកើតហេតុ អ្នករងរបួសត្រូវរថយន្តសង្គ្រោះដឹកយកទៅព្យាបាលនៅគ្លីនិកឯកជនមួយ ។ ចំណែកម៉ូតូកង់បី និងរ៉ឺម៉កម៉ូតូ សមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌចំការមន ៕
ចែករំលែកព័តមាននេះ