រាជធានីភ្នំពេញ ៖ ថ្ងៃទី២២ ឧសភា ឆ្នាំ២០១៥ វេលាម៉ោង៨និង៣០នាទី នៅវិមានសន្តិភាព មានបើកកិច្ចប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
រាជធានីភ្នំពេញ ៖ ថ្ងៃទី២២ ឧសភា ឆ្នាំ២០១៥ វេលាម៉ោង៨និង៣០នាទី នៅវិមានសន្តិភាព មានបើកកិច្ចប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី៥ដើម្បីឆ្លង ៖
១-សេចក្តីព្រាងអនុក្រឹត្យស្តីពីលក្ខខណ្ឌ និងនីតិវិធីនៃការស្នើសុំអាជ្ញាប័ណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ និងការបើកមន្ទីរពិសោធន៍វិស័យផ្លូវថ្នល់។
២-សេចក្តីព្រាងរបាយការណ៍ស្វ័យវាយតម្លៃ ស្តីពីការត្រួតពិនិត្យឡើងវិញនៃការអនុវត្តអនុសញ្ញាអង្គការសហប្រជាជាតិប្រឆាំងអំពើពុករលួយ(អ៊ុនកាក់ ឬ UNCAC ) នៅកម្ពុជា ។
៣-បញ្ហាផ្សេងៗ ។
ក្រោយពីបានស្តាប់របាយការណ៍ និងមតិពិភាក្សាផ្លាស់ប្តូរយោបល់រួចមក កិច្ចប្រជុំពេញអង្គគណៈរដ្ឋមន្ត្រីបានសម្រេចអនុម័ត ៖
១-សេចក្តីព្រាងអនុក្រឹត្យ ស្តីពីលក្ខខណ្ឌ និងនីតិវិធីនៃការស្នើសុំអាជ្ញាប័ណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ និងការបើកមន្ទីរពិសោធន៍វិស័យផ្លូវថ្នល់
កិច្ចប្រជុំពេញអង្គគណៈរដ្ឋមន្ត្រី បានអនុម័តគាំទ្រគោលការណ៍ចំពោះសេចក្តីព្រាងអនុក្រឹត្យស្តីពីលក្ខខណ្ឌ និងនីតិវិធីនៃការស្នើសុំអាជ្ញាប័ណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែរក្សាផ្លូវថ្នល់ និងការបើកមន្ទីរពិសោធន៍វិស័យផ្លូវថ្នល់ ដោយគ្រាន់តែស្នើសុំឱ្យធ្វើការសម្រួលពាក្យតាមអនុសាសន៍ សម្តេចអគ្គមហាសេនាបតីតតេជោ ហ៊ុន សែន ចំនួនពីរចំណុច ។
១-អង្គភាពរដ្ឋ ឬក្រុមហ៊ុនឯកជន ដែលធ្វើសកម្មភាពក្នុងវិស័យហេដ្ឋារចនាសម្ព័ន្ធផ្លូវថ្នល់ តម្រូវឱ្យមានអាជ្ញាប័ណ្ណត្រឹមត្រូវមុននឹងប្រកបអាជីវកម្ម ។
២-សមត្ថកិច្ចទទួលខុសត្រូវក្នុងការចេញអាជ្ញាប័ណ្ណ គឺមានតែក្រសួងសាធារណការ និងដឹកជញ្ជូនតែប៉ុណ្ណោះ ។
រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន បានខិតខំប្រឹងប្រែងស្តារ សាងសង់ និងអភិវឌ្ឍវិស័យហេដ្ឋារចនាសម្ព័ន្ធផ្លូវថ្នល់ បានយ៉ាងច្រើនសន្ធឹកសន្ធាប់គ្រប់ខេត្ត-ក្រុង ទូទាំងព្រះរាជាណាចក្រកម្ពុជា បានតភ្ជាប់ជាមួយនឹងរាជធានីភ្នំពេញ ឬមជ្ឈមណ្ឌលនយោបាយ សេដ្ឋកិច្ច អប់រំ វប្បធម៌ និងទេសចរណ៍នានា ដោយកសាងស្ថាបនាបានផ្លូវថ្នល់ចាក់កៅស៊ូដើម្បីបំពេញតម្រូវការដឹកជញ្ជូនទំនិញ និងមនុស្ស និងសម្រួលដល់ការចែកចាយផលិតផលកសិ-ឧស្សាហកម្ម ការធ្វើដំណើររបស់ប្រជាពលរដ្ឋទៅកាន់មណ្ឌលសុខភាព សាលារៀន ឬទីតាំងផ្តល់សេវាសាធារណៈ និងឯកជនផ្សេងទៀត និងបានរួមចំណែកទ្រទ្រង់ការអភិវឌ្ឍសេដ្ឋកិច្ច សង្គមកិច្ច យ៉ាងឆាប់រហ័សតាមរយៈការធ្វើសមាហរណកម្មជាតិ ការតភ្ជាប់ជាមួយប្រទេសជិតខាង តំបន់ និងសាកលលោក ហើយក៏ឆ្លើយតបចំពោះការត្រៀមខ្លួនចូលក្នុងសហគមន៍ប្រជាជាតិអាស៊ានឆ្នាំ២០១៥នេះដែរ ។
សេចក្តីព្រាងអនុក្រឹត្យ ស្តីពីលក្ខខណ្ឌ និងនីតិវិធីនៃការស្នើសុំអាជ្ញាប័ណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ និងការបើកមន្ទីរពិសោធន៍វិស័យផ្លូវថ្នល់នេះ ត្រូវបានរៀបចំឡើងដោយក្រសួងសាធារណការ និងដឹកជញ្ជូន មានគោលបំណង និងគោលដៅដូចតទៅ ៖
១-លើកកម្ពស់គុណភាពការសាងសង់ ការជួសជុល ការថែទាំ និងការអភិវឌ្ឍវិស័យហេដ្ឋារចនាសម្ព័ន្ធផ្លូវថ្នល់ឱ្យមានចីរភាព និងធានាបានការអភិវឌ្ឍប្រកបដោយនិរន្តរភាព តាមរយៈការធ្វើឱ្យមានតម្លាភាព សុចរិតភាព គណនេយ្យភាព និងសមភាព ក្នុងការចូលរួមដេញថ្លៃ ការសាងសង់ ការជួសជុលថែទាំ និងការផ្តល់សេវាទីប្រឹក្សាបច្ចេកទេសសំណង់ផ្លូវថ្នល់ឱ្យសមស្របតាមច្បាប់ស្តីពីផ្លូវថ្នល់ ។
២-ដាក់ចេញនូវគោលការណ៍លក្ខខណ្ឌ និងនីតិវិធីនៃការស្នើសុំអាជ្ញាប័ណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ និងការបើកមន្ទីរពិសោធន៍វិស័យផ្លូវថ្នល់ សំដៅពង្រឹងឧត្តមភាពជំនាញវិស្វកម្មកម្ពុជា ឱ្យឆ្លើយតបនឹងការធ្វើសមាហរណកម្មអាស៊ានឆ្នាំ២០១៥ និងសកលភាវូបនីយកម្ម ។
២-សេចក្តីព្រាងរបាយការណ៍ស្វ័យវាយតម្លៃ ស្តីពីការត្រួតពិនិត្យឡើងវិញ នៃការអនុវត្តអនុសញ្ញាអង្គការសហប្រជាជាតិប្រឆាំងអំពើពុករលួយ (អ៊ុនកាក់ ឬ UNCAC) នៅកម្ពុជា
រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានយកចិត្តទុកដាក់យ៉ាងខ្លាំងក្នុងការប្រឆាំងអំពើពុករលួយតាំងពីនីតិកាលមុនៗ ក៏ដូចជានីតិកាលទី៥ នៃរដ្ឋសភា ។
សេចក្តីព្រាងរបាយការណ៍ស្វ័យវាយតម្លៃ ស្តីពីការត្រួតពិនិត្យឡើងវិញនៃការអនុវត្តអនុសញ្ញាអង្គការសហប្រជាតិប្រឆាំងអំពើពុករលួយ(អ៊ុនកាក់ ឬUNCAC) នៅកម្ពុជា ត្រូវបានរៀបចំឡើងដោយអង្គភាពប្រឆាំងអំពើពុករលួយ ។
ដើម្បីឆ្លើយសំណួរក្នុងតារាងស្វ័យវាយតម្លៃ (Selt -Assessment Checklist) រាជរដ្ឋាភិបាលកម្ពុជា បានបើកទូលាយឱ្យតួអង្គពាក់ព័ន្ធជាច្រើនចូលរួម ដូចជាតំណាងរដ្ឋសភា ព្រឹទ្ធសភា ក្រសួង ស្ថាប័នពាក់ព័ន្ធមួយចំនួន (ក្រសួងយុត្តិធម៌ ក្រសួងមហាផ្ទៃ ក្រសួងព័ត៌មាន ធនាគារជាតិនៃកម្ពុជា អាជ្ញាធរសវនកម្មជាតិ គណៈកម្មាធិការសិទ្ធិមនុស្សកម្ពុជា) ស្ថាប័នតុលាការ គណៈមេធាវីនៃព្រះរាជាណាចក្រកម្ពុជា វិស័យព័ត៌មាន អង្គការមិនមែនរដ្ឋាភិបាល ផ្នែកសិក្សាធិការ និងវិស័យឯកជន តាមរយៈសេចក្តីសម្រេចលេខ៣៧ សសរ ចុះថ្ងៃទី១១ ខែកញ្ញា ឆ្នាំ២០១៤ ស្តីពីការបង្កើតគណៈកម្មាធិការដឹកនាំការត្រួតពិនិត្យឡើងវិញនូវការអនុវត្ត UNCAC នៅកម្ពុជា ដែលមានតួនាទី និងភារកិច្ចក្នុងការដឹកនាំ គ្រប់គ្រង និងត្រួតពិនិត្យដំណើរការការងារនេះ ។
UNCAC ជាលិខិតបទដ្ឋានគតិយុត្តអន្តរជាតិ ដែលមានសារសំខាន់ក្នុងការប្រយុទ្ធប្រឆាំងអំពើពុករលួយកម្រិតសាកលលោក ។ UNCAC ត្រូវបានអនុម័តដោយមហាសន្និបាតអង្គការសហប្រជាជាតិកាលពីថ្ងៃទី៣១ ខែតុលា ឆ្នាំ២០០៣ ហើយបានចូលជាធរមាននៅថ្ងៃទី១៤ ខែធ្នូ ឆ្នាំ២០០៥ ។ រហូតមកដល់ពេលនេះ UNCAC មានរដ្ឋសមាជិកចំនួន១៧៥ ហើយប្រទេសកម្ពុជាបានចូលជាសមាជិកនៅថ្ងៃទី៥ ខែកញ្ញា ឆ្នាំ២០០៧ ។
៣-បញ្ហាផ្សេងៗ
សម្តេចអគ្គមហាសេនាបតីតេជោហ៊ុន សែន បានផ្តាំផ្ញើសួរសុខទុក្ខដល់កងកម្លាំងប្រដាប់អាវុធទូទាំងប្រទេស និងបានក្រើនរំលឹកចំពោះអង្គភាពយោធានានា អំពីការចែកជូនយុទ្ធជន នូវអាវភ្លៀង ក៏ដូចជាការបើកប្រាក់បៀវត្ស ខែឧសភា ជូនផងដែរ ៕
ចែករំលែកព័តមាននេះ