ខេត្តកំពង់ឆ្នាំង ៖ ក្រុមអាជីវករលក់ដូរក្នុងផ្សារលើខេត្តកំពង់ឆ្នាំង នៅតែប្រកាន់ជំហរដាច់ខាតមិនឱ្យអាជ្ញាធរខេត្តធ្វើតូបលក់ដូរនៅសងខាងផ្សារតាមគម្រោងរៀបចំរបស់អាជ្ញាធរឡើយ ។ ការតវ៉ាបែបនេះធ្វើឡើងគ្រាដែលអាជ្ញាធរខេត្ត ក្រុង និងសាម៉ីមន្ទីរពាក់ព័ន្ធបានកោះហៅពួកគាត់មកប្រជុំដើម្បីព្យាយាមពន្យល់ក្រុមអាជីវករទាំងនោះ អំពីការអភិវឌ្ឍន៏ផ្សារឱ្យមានសោភ័ណភាព សណ្តាប់ធ្នាប់ និងអនាម័យ កាលពីរសៀលថ្ងៃទី ២៥ ឧសភា ២០១៥ នៅសាលាក្រុងកំពង់ឆ្នាំង ។
ក្រុមអាជីវករទាំងនោះបានលើកឡើងម្តងម្នាក់ៗថា ក្រុមអាជីវករលក់ដូរក្នុងផ្សារមិនឯកភាពឱ្យមានការធ្វើតូប មានដំបូលនៅសងខាងផ្សារលើជាដាច់ខាត ដោយពួកគាត់មានហេតុផលថា បណ្តាលឱ្យជិតផ្លូវសងខាងផ្សារ ដែលជាផ្លូវសម្រាប់យានយន្ត និងអ្នកធ្វើដំណើរចេញចូលក្នុងផ្សារបានងាយស្រួល ម្យ៉ាងវិញទៀតការពារបង្ការគ្រាមានអគ្គិភ័យកើតឡើង គឺរថយន្តពន្លត់អគ្គិភ័យមានលទ្ឋភាពអាចជួយអន្តរាគមន៏ក្នុងការបាញ់ទឹកពន្លត់ទាន់ពេលវេលា។
បើមានការធ្វើតូបលក់ដូរតាមផ្លូវក្រាលការឺឡាដែលទើបកសាងដោយអង្គការចៃកានៅសងខាងផ្សារធ្វើឱ្យជិតផ្លូវចូលក្នុងផ្សារ ធ្វើឱ្យពួកគាត់ជាអាជីវករខាងក្នុងលក់មិនដាច់ ដូចមានគម្រូនៅផ្សារឆ្នាំងស្រាប់ គ្មានអាជីវករចូលលក់ខាងក្នុងទេ សព្វថ្ងៃគឺលក់តែខាងក្រៅបង្កឱ្យស្ទះចរាចរណ៍រាល់ថ្ងៃ ។
លើសពីនេះពួកគាត់ជាអាជីវករសុំឱ្យក្រុមហ៊ុន ថូ ម៉ាក់ ដែលជាអ្នកសាងសង់ផ្សារគោរពទៅតាមលក្ខន្តិកៈ ដែលបានសាងសង់ផ្សារលើ សព្វថ្ងៃដំបូលផ្សារបានលិចស្ទើរគ្រប់កន្លែង ទទឹក ស្ទះលិច លក់ដូរ មិនបាន ប្រព័ន្ធលូលិចលង់ ទាំងនេះសុំឱ្យក្រុមហ៊ុនជួសជុលឡើងវិញ ព្រោះកិច្ចកុងត្រាមានរយៈពេល២៥ឆ្នាំ គឺពីឆ្នាំ២០០១ មកដល់ពេលនេះទើបតែបានជាង១៥ឆ្នាំប៉ុណ្ណោះ ហើយក្នុងកិច្ចកុងត្រាដដែលនេះមិនអនុញ្ញាតឱ្យមានការសាងសង់អ្វីបន្ថែមឡើយ ហេតុនេះពួកគាត់សុំឱ្យអាជ្ញាធរខេត្តមេត្តាជួយពិនិត្យមើលកិច្ចកុងត្រានេះផង ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ