រាជធានីភ្នំពេញ ៖ ជាច្រើនលើកច្រើនសារមកហើយ ដែលអាជ្ញាធររាជធានីភ្នំពេញ បានជំរុញឲ្យក្រុមហ៊ុនស៊ិនទ្រីកែលម្អការប្រមូលសំរាមក្នុងទីក្រុងឱ្យបានទាន់ពេលវេលា ដើម្បីបង្កើនការដឹកជញ្ជូនចេញទៅក្រៅក្រុង ស្របពេលដែលប្រជាពលរដ្ឋមានការរិះគន់ខ្លាំងៗទៅលើក្រុមហ៊ុននេះពីភាពយឺតយ៉ាវ ធ្វើឲ្យសំរាមគរជាច្រើនកន្លែងក្នុងរាជធានីភ្នំពេញ តែក្រុមហ៊ុនស៊ិនទ្រី ហាក់មិនបានកែលម្អរការងាររបស់ខ្លួនឱ្យមានការប្រែប្រួលជាដុំកំភួននោះទេ ។
ក្នុងការដាស់តឿននេះ កាលពីវេលាព្រឹកថ្ងៃទី២៥ ឧសភា ២០១៥ លោកប៉ា សុជាតិវង្ស អភិបាលរាជធានីភ្នំពេញ បានកោះតំណាងក្រុមប្រមូលសំរាមហ៊ុនស៊ិនទ្រីប្រជុំ ដើម្បីឱ្យក្រុមហ៊ុននេះ ជំរុញការប្រមូលសំរាមឲ្យបានលឿនបំផុត ។
លោកប៉ា សុជាតិវង្ស មានប្រសាសន៍ថា សំរាមជាបញ្ហាធ្ងន់ធ្ងរប៉ះពាល់ខ្លាំងដល់សុខុមាលភាពប្រជាពលរដ្ឋ ប៉ះពាល់បរិស្ថាន និងសោភ័ណភាពទីក្រុង ត្រូវតែមានសេវាប្រមូលសំរាមជាចាំបាច់ តែកន្លងមកប្រជាពលរដ្ឋយើង ដែលជាអ្នកផលិតសំរាម ក៏មានចំណែកក្នុងការពង្រាយសំរាមដោយខ្វះការយល់ដឹងផងដែរ ។ ការងារគ្រប់គ្រង និងកែលម្អរកាកសំណល់ (សំរាម)នេះ សាលារាជធានីភ្នំពេញ បានធ្វើតាំងពីដំបូងមកដោយយើងចង់ឲ្យអ្នកផលិតអ្នកប្រមូល និងអ្នកដឹកសំរាមបានយល់គ្នាមិនមើលបំណាំគ្នា ។
លោកបន្តថា យកល្អក្រុមហ៊ុនស៊ិន ទ្រី មិនត្រូវផ្ញើខ្លួនថ្លៃសេវាដឹកសំរាមទៅនឹងអគ្គិសនី ឬទឹកនោះទេ ដែលបញ្ហានេះតែងទទួលការរិះគន់យ៉ាងខ្លាំងពីប្រជាពលរដ្ឋ ព្រោះប្រជាពលរដ្ឋយល់ថា ពួកគាត់ប្រើភ្លើង ត្រូវបង់ថ្លៃឲ្យភ្លើង មិនមានពាក់ពន្ធ័នឹងរឿងសំរាមទេ សំខាន់ឱ្យតែក្រុមហ៊ុនស៊ិន ទ្រី ប្រមូលសំរាមទាន់ពេលវេលា និងមានការកំណត់តំលៃត្រឹមត្រូវពូកគាត់មិនខ្លាចនឹងបង់ប្រាក់នោះ
ទេ ។
ក្នុងកិច្ចប្រជុំនោះ បានសំរេចជ្រើសរើសយកខណ្ឌចំការមន ក្នុងការអនុវត្តផែនការប្រមូលសំរាមមុនគេដោយជ្រើសរើសមន្ត្រី២រូប ជាអ្នកទទួលខុសត្រូវរឿងសំរាម ក្នុងមូលដ្ឋានរបស់ខ្លួន រួមទាំងការផាកពិន័យចំពោះអ្នកបោះសំរាមចោលផ្តេសផ្តាសផងដែរ ។
ចែករំលែកព័តមាននេះ