រាជធានីភ្នំពេញ ៖ គ្រោះថ្នាក់ចរាចរណ៍មួយបានកើតឡើងរវាងម៉ូតូ និងម៉ូតូចំនួន២គ្រឿង បើកក្នុងទិសដៅបញ្ច្រាសគ្នា ដោយខ្វះការប្រុងប្រយ័ត្នបុកគ្នាចំពីមុខយ៉ាងពេញទំហឹង បណ្តាលឱ្យមនុស្សប្រុស-ស្រីចំនួន៣នាក់ បានរងរបួសធ្ងន់-ស្រាល កាលពីវេលាម៉ោង១១ និង៤៥នាទីថ្ងៃទី២៥ ឧសភា ២០១៥ ស្ថិតនៅតាមបណ្តោយផ្លូវព្រះនរោត្តម ក្បែរស្ពានអាកាសក្បាលថ្នល់ ក្នុងសង្កាត់ទន្លេបាសាក់ ខណ្ឌចំការមន ។
ប្រភពបានឱ្យដឹងដឹងថា ក្នុងចំណោមជនរងគ្រោះទាំង៣នាក់ ម្នាក់ឈ្មោះខៀវ រិន អាយុ៣០ឆ្នាំ មានទៅលំនៅក្នុងភូមិចំប៉ា សង្កាត់ក្បាលកោះ ខណ្ឌច្បារអំពៅ បានរងរបួសធ្ងន់ធ្ងរដោយបាក់ត្រង់ស្មងជើងខាងឆ្វេងម្ខាង ខណៈពេលដែលកំពុងតែជិះម៉ូតូម៉ាកវ៉េវ
ពណ៌ក្រហម ពាក់ស្លាកលេខ១Z-៤០៧១ មួយគ្រឿង ២នាក់ប្តីក្នុងបំណងឆ្លងផ្លូវដោយបានបើកភ្លើងស៊ីញ៉ូត្រឹមត្រូវផងនោះ ។
ពេលនោះក៏ស្រាប់តែមានម៉ូតូមួយគ្រឿងទៀត ម៉ាកហុងដាឌ្រីមសង់សេ១២៥ ពណ៌ខ្មៅ ពាក់ស្លាកលេខភ្នំពេញ ១BN-៥៧១៣ ដែលបើកបរដោយបុរសម្នាក់ក្នុងល្បឿនយ៉ាងលឿន ក្នុងទិសដៅពីជើងទៅត្បូងបញ្ច្រាសទិសគ្នាដោយខ្វះការប្រុងប្រយ័ត្ននោះ ក៏ទៅបុកចំជើងស្ត្រីរងគ្រោះពេញទំហឹង បណ្តាលឱ្យដួលទាំង២តែម្តង ។
តាមប្រភពដដែលបន្តទៀតថា ក្រោយពីម៉ូតូទាំង២គ្រឿងបានបុកគ្នាដួលរណូករណែលរួចមក គេឃើញស្ត្រីជាប្រពន្ធ បានរងរបួសធ្ងន់ ហើយបុរសជាប្តីរងរបួសស្រាល ចំណែកឯបុរសជាភាគីម្ខាងទៀត បានរងរបួសបែកចិញ្ចើមហូរឈាមស្រោចខ្លួន និងម៉ូតូទាំងទាំង២គ្រឿងរងការខូចខាតបន្តិចបន្ទួចតែប៉ុណ្ណោះ ។
ក្រោយពីកើតមាន ជនរងគ្រោះទាំង៣នាក់ត្រូវបានរថយន្តសាមុយដឹកយកទៅធ្វើការសង្គ្រោះនៅមន្ទីរពេទ្យមិត្តភាពខ្មែរ-សូវៀត ចំណែកឯម៉ូតូ២គ្រឿង ត្រូវបានបញ្ជូនយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរង់ចាំធ្វើការដោះស្រាយគ្នាជាបន្តទៀត។
ចែករំលែកព័តមាននេះ