ខេត្តតាកែវ ៖ ប៉ូលិសស្រុកព្រៃកប្បាសបានឃាត់ខ្លួនជន២នាក់ រួមជាមួយវត្ថុតាងជាក់ស្តែង ខណៈពេលក្រុមជននេះបានយកសែរាជវង្ស ដោយតាំងខ្លួនជាបុត្រារបស់សម្តេចឪ ព្រះបរមរតនកោដ្ឋ មកផ្សព្វផ្សាយឱ្យមនុស្សគ្រប់គ្នាធ្លាក់ក្នុងឧបាយកលឆបោក
ខេត្តតាកែវ ៖ ប៉ូលិសស្រុកព្រៃកប្បាសបានឃាត់ខ្លួនជន២នាក់ រួមជាមួយវត្ថុតាងជាក់ស្តែង ខណៈពេលក្រុមជននេះបានយកសែរាជវង្ស ដោយតាំងខ្លួនជាបុត្រារបស់សម្តេចឪ ព្រះបរមរតនកោដ្ឋ មកផ្សព្វផ្សាយឱ្យមនុស្សគ្រប់គ្នាធ្លាក់ក្នុងឧបាយកលឆបោកដើម្បីលក់វត្ថុស័ក្តិសិទ្ធិឱ្យប្រជាពលរដ្ឋមាន ចិញ្ចៀន ចែកាច់ និងវត្ថុផ្សេងៗជាច្រើនទៀត ។ បុរសវ័យចំណាស់ទាំង២នាក់ ត្រូវបានចាប់ខ្លួនកាលពីថ្ងៃទី២៣ ឧសភា វេលាម៉ោង១១ព្រឹក នៅភូមិរកា ឃុំស្នោ ស្រុកព្រៃកប្បាស ។
លោក ជុំ ឈឿន អធិការនគរបាលស្រុកព្រៃកប្បាសឱ្យដឹងថា ជនទាំង២នាក់ដែលត្រូវបានឃាត់ខ្លួននេះ ម្នាក់អះអាងថា ឈ្មោះ នរោត្តម រដ្ឋា អាយុ៦២ឆ្នាំ រស់នៅភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល ជាអ្នកផ្សព្វផ្សាយ និងម្នាក់ទៀតឈ្មោះ ជឹម ភាន់ អាយុ៥៥ឆ្នាំ រស់នៅភូមិកំពង់ពោធិ៍ ឃុំក្រាំងយូ៉វ ស្រុកស្អាង ខេត្តកណ្តាល។ នៅពេលផ្សាយលក់នោះ ជនទាំង២នាក់បានតាំងខ្លួនជាបុត្រារបស់សម្តេចឪ និងជាប់សែរាជវង្សផ្សេងទៀត ដោយអួតអាងនិងឆបោកប្រជាពលរដ្ឋ ជាពិសេសលោកតា លោកយាយ ។
លោកអធិការបន្តថា វត្ថុតាងជាក់ស្តែងដែលក្រុមជននេះយកមកបង្ហាញប្រជាពលរដ្ឋនោះមាន ចិញ្ចៀនពណ៌សដាំត្បូង៥វង់ ចែកាច់ចំនួន៩ ត្បូងពណ៌សតូចចំនួន៥ ទូរស័ព្ទ៣គ្រឿង និងវត្ថុតាងជាច្រើនទៀត ហើយនៅក្នុងប័ណ្ណសម្គាល់ខ្លួន គេបានសរសេរដោយខ្លួនឯងថា ប្រើបាន២៦ខេត្ត-ក្រុង ។ ជាមួយនឹងការចាប់ឃាត់ខ្លួននេះ សមត្ថកិច្ចក៏បានដកហូតម៉ូតូម៉ាកគុបមូល ពណ៌ស្លែមួយគ្រឿង ពាក់ស្លាកលេខកណ្តាល 1N-7612 ផងដែរ ។
នៅចំពោះមុខសមត្ថកិច្ច ក្រុមជននេះមិនបានសារភាពអ្វីទេ ហើយនិយាយថា វត្ថុស័ក្តិសិទ្ធិទាំងអស់នេះ គឺសម្តេចយាយឱ្យផ្សព្វផ្សាយដល់ប្រជាពលរដ្ឋជាវយកទៅរកស៊ីមានបានត្រជាក់ត្រជំនៅក្នុងគ្រួសារ ។ ជនទាំង២នាក់ និងវត្ថុតាងត្រូវបាននគរបាលការិយាល័យព្រហ្មទណ្ឌកម្រិតស្រាលខេត្តកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ