រាជធានីភ្នំពេញ ៖ នារាត្រីថ្ងៃទី២៤ ឧសភា ២០១៥ កន្លងទៅ តារាសម្តែងល្បីឈ្មោះប្រចាំប្រទេសសាំងហ្គាពួរ អ្នកនាង ហ្សូអ៊ីថេ ដែលប្រជាជនកម្ពុជាស្គាល់ច្បាស់ក្នុងតួអង្គបូបូ ជាមួយតារាសម្តែងប្រុសរូបសង្ហាលោកអែល វិនអ៊ីង មកប្រទេសកម្ពុជា ដើម្បីផ្សព្វផ្សាយរឿងភាគថ្មីដែលមានចំណងជើងថា «សន្តានចិត្តអ្នកមានបុណ្យ» ជាប្រភេទរឿងនិយាយពីការយកចិត្តទុកដាក់របស់គ្រូពេទ្យ និងជាប្រភេទរឿងភាគថ្មី ដែលកំពុងតែទទួលបានភាពល្បីល្បាញចាប់អារម្មណ៍ពីសំណាក់ប្រជាជនសាំងហ្គាពួរ។ តារាភាពយន្តពីរដួងនេះ បានចូលរួមការប្រគំតន្ត្រីមានការផ្សាយផ្ទាល់ដែលជាការរៀបចំពីក្រុមហ៊ុនទូរទស្សន៍ខ្សែកាប រាជធានីភ្នំពេញ PPCTV ដោយសហការជាមួយក្រុមហ៊ុន Media Corp Singapore។
ខ្សែភាពយន្តរឿងភាគថ្មីរបស់សាំងហ្គាពួ រមានចំណងជើងថា «សន្តានចិត្តអ្នកមានបុណ្យ» នេះ នឹងត្រូវដាក់បញ្ចាំងនៅលើកញ្ចក់ទូរទស្សន៍ខ្សែកាប រាជធានីភ្នំពេញ ភីភីស៊ីធីវី ប៉ុស្តិ៍លេខ៩ ចាប់ពីថ្ងៃទី៣០ ឧសភា ២០១៥ ខាងមុខនេះ។ នេះជាលើកទី២ ដែលក្រុមហ៊ុនទូរទស្សន៍ខ្សែកាប រាជធានីភ្នំពេញ PPCTV បានរួមសហការជាមួយក្រុមហ៊ុន Media Corp Singapore។ ក្នុងដំណើរលើកនេះ តារាទាំង២ដួង គឺអ្នកនាង ហ្សូ អ៊ីថេ (Zoe Tay) ហៅបូបូ និងលោកអែល វីនអ៊ឹង (Elvin Ng) ក្រៅពីរៀបចំធ្វើកម្មវិធីសន្និសីទកាសែត កម្មវិធីជួបជុំតារាសាំងហ្គាពួរ ក៏នឹងមានការចូលរួមសកម្មភាពសប្បុរសធម៌ដោយនាំយកអំណោយ និងមូលនិធិសប្បុរសរបស់ក្រុមហ៊ុនភីភីស៊ីធីវី និងក្រុមហ៊ុន Media Corp ទៅផ្តល់ជូនកុមារនៅមណ្ឌល AFESIP នៅភូមិថ្លុកជ្រៅ ឃុំខ្ចៅ ស្រុកកងមាស ខេត្តកំពង់ចាម។ លើសពីនេះ ក៏មានការប្រគំតន្ត្រីផ្សាយបន្តផ្ទាល់នៅលើកញ្ចក់ទូរទស្សន៍កម្ពុជា ប៉ុស្តិ៍លេខ៨ HD ចាប់ពីម៉ោង៦និង៣០នាទីល្ងាចផងដែរ ក្នុងនោះក៏មានតារាចម្រៀងនៃប្រទេសកម្ពុជាចូលរួមជាកិត្តិយសមួយចំនួនដែរ ដូចជាអ្នកនាងខាត់ សុឃីន, សុន ស្រីពេជ្រ, កញ្ញាស៊ូ ស៊ីរីកា, កុមារីអេឡេន និងកុមារាសាន់នីជាដើម។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ