រាជធានីភ្នំពេញ ៖ បុរសជាកម្មករសំណង់ម្នាក់ត្រូវបានគេប្រទះឃើញដេកស្លាប់ដោយសារតែជំងឺខ្យល់គរនៅក្នុងការដ្ឋានសំណង់មួយកន្លែង កាលពីវេលាម៉ោង៥និង២០នាទីព្រឹក ថ្ងៃទី២៤ ឧសភា ២០១៥ នៅក្នុងសំណង់ការដ្ឋានផ្ទះលេខ៤EZ ផ្លូវលេខ១៩ ក្រុមទី១៧ សង្កាត់ចតុមុខ ខណ្ឌដូនពេញ។
តាមប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា បុរសរងគ្រោះមានឈ្មោះជួប វ៉ែន អាយុ៥២ឆ្នាំ មុខរបរជាកម្មករសំណង់ មានស្រុកំណើតនៅភូមិកំពង់ឈូក ឃុំកំពង់ឈូក ស្រុកកោះអណ្តែត ខេត្តតាកែវ ត្រូវបានកម្មករដែលធ្វើការជាមួយគ្នាប្រទះឃើញដេកស្លាប់នៅប៉ៅអ៊ីក្នុងការដ្ឋានខាងលើ។ នៅព្រឹកនោះ បុរសកម្មករសំណង់ម្នាក់ដែលធ្វើការនៅក្នុងការដ្ឋានជាមួយគ្នាបានដើរទៅដាស់បុរសរងគ្រោះឱ្យក្រោក តែជនរងគ្រោះមិនងើបឡើយ ដោយមានការសង្ស័យក៏បានហៅគេឯងឱ្យមកជួយមើល។ ប្រភពដដែលបានបន្តទៀតថា ពេលដែលក្រុមកម្មករក្នុងការដ្ឋាននោះ នាំគ្នាមកជួយដាស់ នៅតែមិនព្រមក្រោក ហើយក៏អង្រួនដៃ ជើងមើលមានសភាពរឹងកំព្រឹសមិនកំរើក ទើបបានដឹងថា ជនរងគ្រោះបានស្លាប់បាត់ទៅហើយ។
ក្រោយពីកម្លាំងសម្ថកិច្ចជំនាញចុះមកធ្វើការត្រួតពិនិត្យ និងកោសល្យវិនិច្ឆយនៅនឹងកន្លែងកើតហេតុបានឃើញថា បុរសរងគ្រោះបានស្លាប់ដោយសារតែគាំងបេះដូង (ខ្យល់គរ)។ ក្រោយពីមានការត្រួតពិនិត្យអំពីសំណាក់កម្លាំងសម្ថកិច្ចរួចហើយ សពជនរងគ្រោះត្រូវបានក្រុមគ្រួសារបញ្ជូនយកទៅធ្វើបុណ្យតាមប្រពៃណី។
ចែករំលែកព័តមាននេះ