ខេត្តសៀមរាប ៖ តំបន់សង្គ្រាមរ៉ាំរ៉ៃយូរជាងគេនៅខេត្តសៀមរាប គឺស្រុកវ៉ារិនដែលមានព្រំប្រទល់ជាប់នឹងស្រុកអន្លង់វែង ហើយបច្ចុប្បន្នអជ្ញាធរកំពុងសហការជាមួយប្រជាពលរដ្ឋប្រមូលគ្រាប់មិនទាន់ផ្ទុះ និង
ខេត្តសៀមរាប ៖ តំបន់សង្គ្រាមរ៉ាំរ៉ៃយូរជាងគេនៅខេត្តសៀមរាប គឺស្រុកវ៉ារិនដែលមានព្រំប្រទល់ជាប់នឹងស្រុកអន្លង់វែង ហើយបច្ចុប្បន្នអជ្ញាធរកំពុងសហការជាមួយប្រជាពលរដ្ឋប្រមូលគ្រាប់មិនទាន់ផ្ទុះ និងអាវុធយុទ្ធភណ្ឌផ្សេងៗទៅរក្សាទុកឲ្យជំនាញស៊ីម៉ាក់កម្ទេចចោល ។
ការចុះទៅត្រួតពិនិត្យគ្រាប់មិនទាន់ផ្ទុះដែលពលរដ្ឋបានរាយការណ៍នោះបានធ្វើឡើងកាលពីវេលាម៉ោង៣រសៀល ថ្ងៃទី២៣ ឧសភា ២០១៥ នៅចំណុចដីបង្កបង្កើនផលរបស់ពលរដ្ឋ អណ្តូងចាន់ ក្នុងភូមិវត្ត ឃុំស្រែណូយ ស្រុកវ៉ារិន ។
លោកវរសេនីយ៍ទោ ណុប សារ៉ាក់ អធិការនគរបាលស្រុកវ៉ារិនបានប្រាប់កោះសន្តិភាពតាមទូរស័ព្ទនៅព្រឹកថ្ងៃទី២៤ ឧសភា ២០១៥នេះថា ដោយសារមានការព្រួយបារម្ភពីលោកស្នងការខេត្តអំពីគ្រាប់មិនទាន់ផ្ទុះនៅក្នុងតំបន់ធ្វើស្រែចំការរបស់ប្រជាពលរដ្ឋ លោកស្នងការបានឲ្យកម្លាំងរបស់លោកចុះទៅប្រមូលបានគ្រាប់ចំរុះប្រភេទធំៗចំនួន៨០គ្រាប់ និងគ្រាប់AK ចំនួន៥០គ្រាប់ យកទៅកម្ទេចចោល។
ប៉ុន្តែមានពលរដ្ឋខ្លះរក្សាទុកអាវុធផ្សេងៗខុសច្បាប់នៅក្នុងផ្ទះ ទើបកម្លាំងនគរបាលស្រុកសហការជាមួយអាជ្ញាធរមូលដ្ឋានចុះទៅណែនាំដល់ប្រជាពលរដ្ឋឲ្យយល់ដឹងពីច្បាប់ទម្លាប់ និងច្បាប់ស្តីភូមិ-ឃុំមានសុវត្ថិភាព ហើយក៏បានពន្យល់ឲ្យប្រជាពលរដ្ឋប្រគល់គ្រាប់មិនទាន់ផ្ទុះ និងអាវុធផ្សេងៗឲ្យសមត្ថកិច្ច ព្រោះការរក្សាទុកនូវអាវុធខុសច្បាប់ជាអំពើល្មើសច្បាប់។
លោកបន្ថែមថា ក្នុងមួយវគ្គកម្លាំងនគរបាលប្រមូលបានគ្រាប់មិនទាន់ផ្ទុះពី៧០គ្រាប់ទៅ១០០គ្រាប់ និងអាវុធកែច្នៃផ្សេងៗទៀតមួយចំនួនផងដែរ។ គួរបញ្ជាក់ផងដែរថា ស្រុកវ៉ារិនជាស្រុកមួយដាច់ស្រយាល និងមានចម្ងាយប្រមាណជា៧០គីឡូម៉ែត្រពីទីប្រជុំជនក្រុងសៀមរាបនៅភាគខាងជើងនៃខេត្តសៀមរាប រីឯពលរដ្ឋនៅតំបន់នោះនិយមប្រកបរបរធ្វើស្រែចំការជាត្រីមុខ៕
ចែករំលែកព័តមាននេះ