ខេត្តកំពត ៖ លបកន្ទុយកណ្តុរ ជាប្រភេទលបម្យ៉ាងដែលអ្នកនេសាទសមុទ្រនៅប្រទេសកម្ពុជាពុំធ្លាប់ប្រើប្រាស់ឡើយ គឺធ្លាប់តែប្រើប្រាស់ជាលបធម្មតា ធ្វើអំពីកូនឈើទន់ៗហើយមានប្រើសតែមួយ គេធ្វើលបឈើនេះមានពីរប្រភេទ ប្រភេទទី១-គេធ្វើសំរាប់ដាក់យកក្តាមថ្ម ឬក្តាមសេះ ប្រភេទទី២-គេធ្វើសំរាប់ដាក់ត្រី ឬមឹក ប៉ុន្តែប្រភេទលបដាក់ត្រី និងមឹកនេះគេធ្វើធំជាងលបដាក់ក្តាម ។
មកដល់បច្ចុប្បន្ននេះ ប្រភេទលបនេសាទទាំងពីរប្រភេទខាងលើត្រូវបានអ្នកនេសាទសមុទ្រមួយចំនួនធំឈប់ប្រើប្រាស់ហើយ ពីព្រោះលបប្រភេទនេះ បើលបក្តាមគឺចូលតែក្តាមមួយមុខទេ មិនអាចចូលមច្ឆាចម្រុះបានទេ ។ ដូច្នេះទើបក្រុមអ្នកនេសាទផ្នែកខាងរកស៊ីដាក់លប បច្ចុប្បន្នភាគច្រើនគេទិញលបប្រភេទថ្មី គឺលបកន្ទុយកណ្តុរ ផលិតនៅប្រទេសវៀតណាម ដែលលបប្រភេទនេះប្រើដោយសរសៃអំបោះនីឡុងមានក្រឡាមួយហ៊ុនកន្លះទៅពីរហ៊ុន បណ្តោយប្រវែងពី៨ ទៅ១០មែត្រ ហើយមានប្រើសសងខាង ជាច្រើនអាចចូលមច្ឆាចម្រុះគ្រប់ប្រភេទបាន ។
ប្រភេទលបថ្មីនេះត្រូវបានក្រសួងកសិកម្ម រុក្ខា ប្រម៉ាញ់ និងនេសាទ ចេញសារាចរណ៍ហាមឃាត់មិនឲ្យប្រើប្រាស់ធ្វើអាជីវកម្មនេសាទក្នុងដែនសមុទ្រកម្ពុជា ពិសេសសមុទ្រខេត្តកំពតនេះតែម្តង ។ នៅពេលថ្មីៗនេះគេឃើញអ្នកនេសាទដែលប្រើប្រាស់លបប្រភេទថ្មីនេះចូលមកធ្វើអាជីវកម្មនៅតាមដៃព្រែកតំបន់ទឹករាក់ និងជាកន្លែងមច្ឆាសមុទ្រគ្រប់ប្រភេទពង និងកូនផងដែរ ។
ការចូលមកនេសាទក្នុងដៃព្រែកដោយប្រើប្រាស់ឧប្បករណ៍នេសាទខុសច្បាប់ខាងលើ គេពុំឃើញមន្ត្រីជំនាញខាងជលផល និងស្ថាប័នពាក់ព័ន្ធធ្វើការផ្សព្វផ្សាយដល់អ្នកធ្វើអាជីវកម្មខុសច្បាប់ទាំងនោះ ឬមានវិធានការណ៍អ្វីនោះឡើយ ។ ផ្ទុយទៅវិញ អស់រយៈពេលជាច្រើនខែមកហើយគេឃើញនៅតែមានក្រុមអ្នកនេសាទចូលមកធ្វើនេសាទនៅចំណុចហាមឃាត់ខាងលើយ៉ាងអនាធិបតេយ្យដែល ។
ជុំវិញការធ្វើនេសាទក្នុងតំបន់ហាមឃាត់(ដៃព្រែក)ខាងលើ ភ្នាក់ងារយើងបានភ្ជាប់ទូរសព្ទ័ទៅលោកស សារិននាយខណ្ឌ័រដ្ឋបាលជលផលខេត្តដើម្បីសុំការបំភ្លឺលើករណីនេះ ប៉ុន្តែគួរឲ្យសោកស្តាយដែរ ដែលទូរសព្ទ័របស់លោកជាប់រវល់រហូតមិនបានបកស្រាយបំភ្លឺដល់អ្នកយកព័ត៌មានយើងឡើយ ៕
ចែករំលែកព័តមាននេះ