ខេត្តកំពង់ចាម ៖ សាមណេរមួយអង្គព្រះនាម ឆើត រ៉ាវ៉ាន់ ព្រះជន្ម១៨វស្សា មានទីលំនៅភូមិស្រាម ឃុំទំនប់ ស្រុកបាធាយ ត្រូវបានគេលួចធ្វើគុតដោយប្រើដំបងវាយលើព្រះកាយយ៉ាងចាស់ដៃរហូតអនិច្ចធម្ម ។
ខេត្តកំពង់ចាម ៖ សាមណេរមួយអង្គព្រះនាម ឆើត រ៉ាវ៉ាន់ ព្រះជន្ម១៨វស្សា មានទីលំនៅភូមិស្រាម ឃុំទំនប់ ស្រុកបាធាយ ត្រូវបានគេលួចធ្វើគុតដោយប្រើដំបងវាយលើព្រះកាយយ៉ាងចាស់ដៃរហូតអនិច្ចធម្ម ។ ហេតុការណ៍នេះបានកើតឡើងកាលពីវេលាម៉ោង៥ព្រឹក ថ្ងៃទី២៣ ឧសភា ២០១៥ ស្ថិតនៅក្នុងបរិវេណវត្តគោកពង្រ ហៅវត្តស្រាម ក្នុងភូមិក្រាំង ឃុំស្រម៉ ស្រុកជើងព្រៃ។
លោកវរសេនីយ៍ត្រី យ៉ែម សុផល អធិការរងនគរបាលស្រុកជើងព្រៃប្រាប់ឲ្យដឹងថា មុនពេលកើតហេតុ សាមណេ រ៉ាវ៉ាន់ បានតើនឡើងនៅពេលយប់ ដោយបានបើកសៀវភៅរៀនទន្ទេញព្រះធម៌ដើម្បីឲ្យចងចាំបានច្រើនដូចសព្វមួយដង ។
លុះដល់វេលាទៀបភ្លឺឈានចូលព្រឹកថ្ងៃទី២៣ ឧសភា ក៏ត្រូវគេលួចធ្វើគុតដោយមានស្នាមវាយលើព្រះកាយត្រូវជាច្រើនកន្លែង ភ្លាមៗនោះមិនមានអ្នកណាបានដឹងឡើយ ។ លោកវរសេនីយ៍ត្រី យ៉ែម សុផល អធិការរងនគរបាលស្រុកជើងព្រៃ ប្រាប់បន្តថា បន្ទាប់មកស្រាប់តែមានការភ្ញាក់ផ្អើលពេញវត្តតែម្តង ហើយព្រះចៅអធិការវត្តប្រញាប់រាយការណ៍ទៅប៉ុស្តិ៍រដ្ឋបាលឃុំស្រម៉ ទើបកម្លាំងសមត្ថកិច្ចចុះទៅដល់ជាបន្តបន្ទាប់ដោយបានសួរនាំសាក្សីទើបដឹងថា ជនសង្ស័យជាឃាតករនោះ ឈ្មោះ ញឹក វណ្ណា ភេទប្រុស អាយុ៤៧ឆ្នាំ នៅភូមិសង្កែ ឃុំស្តើងជ័យ ស្រុកជើងព្រៃ ជាមនុស្សកើតរោគសរសៃប្រសាទ និងជាអ្នកដាំទឹកតែឲ្យព្រះសង្ឃនៅវត្តស្រាម ។
ពេលសមត្ថកិច្ចចុះពិនិត្យនៅកន្លែងកើតហេតុ ជនសង្ស័យបានគេចខ្លួនបាត់មិនដឹងទៅទីណាទេ សមត្ថកិច្ចក៏បានដាក់កម្លាំងជាច្រើននាក់តាមប្រមាញ់ ទីបំផុតជនសង្ស័យត្រូវចាប់ខ្លួនបាននៅព្រឹកថ្ងៃដដែល(២៣ ឧសភា) ខណៈពេលកំពុងតែរត់គេចសំដៅឆ្ពោះមកកាន់ភ្នំជើងព្រៃដែលមានចម្ងាយពីវត្តជាង១០គីឡូម៉ែត្រ រួចបានបញ្ជូនមកកាន់អធិការដ្ឋាននគរបាលស្រុកជើងព្រៃដើម្បីសួរនាំ។
លោកវរសេនីយ៍ត្រី យ៉ែម សុផល អធិការរងនគរបាលស្រុកជើងព្រៃបញ្ជាក់ថា បុរសសង្ស័យជាឃាតករនោះជាមនុស្សកើតរោគសរសៃប្រសាទ បានមកនៅវត្តស្រាម ក្នុងអំឡុងឆ្នាំ២០១៣ ជាអ្នកដាំទឹកតែឲ្យព្រះសង្ឃឆាន់ ៕
ចែករំលែកព័តមាននេះ