រាជធានីភ្នំពេញ ៖ នៅព្រឹកថ្ងៃទី២៤ ឧសភា ២០១៥ អាជ្ញាធរខណ្ឌមានជ័យ បានបើកវេទិការសាធារណៈពិគ្រោះយោបល់ស្តីពីគោលនយោបាយភូមិ-ឃុំមានសុវត្ថិភាព ក្នុងមូលដ្ឋានជាមួយនឹងប្រជាពលរដ្ឋប្រមាណជាង១០០នាក់ ដែលរស់នៅក្នុងក្រុមទី៥ ភូមិត្នោតជុំ៤ សង្កាត់បឹងទំពុន ខណ្ឌមានជ័យ ក្រោមអធិបតីភាពលោកឌី រ័ត្នខេមរុណ អភិបាលរងនៃគណៈអភិបាលខណ្ឌមានជ័យ លោកសួស សារិន ចៅសង្កាត់បឹងទំពុន រួមទាំងមន្ត្រីរាជការ មន្ត្រីនគរបាល កម្លាំងកងរាជអាវុធហត្ថខណ្ឌ និងសមាជិតសមាជិការជាច្រើននាក់ទៀតផងដែរ ។
ឆ្លៀតក្នុងឱកាសខាងលើនេះ ក្រុមប្រជាពលរដ្ឋបានលើកឡើងពីបញ្ហាផ្លូវថ្នល់មួយចំនួនក្នុងមូលដ្ឋានដែលអាជ្ញាធរមិនទាន់បានកែសម្រួលឱ្យបានល្អ ពោលគឺមានស្ថានភាពពិបាកក្នុងការធ្វើដំណើរ ជាពិសេសផ្លូវមួយខ្សែត្រង់ផ្លូវវត្តអង្គពោធិ៍ញាន ដែលបច្ចុប្បន្នរងការខូចខាតស្ទើរតែទាំងស្រុង ដោយសារតែរថយន្តធុនធំជាច្រើន តែងតែបើកកាត់ទីនោះ ជាហេតុធ្វើឱ្យផ្លូវប៉េតុងមិនអាចទ្រនូវទម្ងន់របស់រថយន្តបាន ទើបត្រូវបាក់បែករងការខូចខាតតែម្តងទៅ ដូចនេះប្រជាពលរដ្ឋសំណូមពរឱ្យអាជ្ញាធរ មេត្តាធ្វើយ៉ាងណារាំងស្ទាក់ ចំពោះរថយន្តធុនធំផង ដែលបច្ចុប្បន្នកំពុងបើកបរឆ្លងកាត់ផ្លូវប៉េតុង ក្នុងមូលដ្ឋានជាច្រើន ដោយមិនគិតពីផលប៉ះពាល់ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ