សាលាដំបូងសម្រេចឃុំខ្លួនបុរសដុតផ្ទះខ្លួនឯង ព្រោះខឹងប្រពន្ឋមិនដាំបាយឱ្យហូប
ខេត្តកំពង់ឆ្នាំង៖ សាលាដំបូងខេត្ត សម្រេចឃុំខ្លួនបុរសម្នាក់ដាក់ពន្ធនាគារ កាលពីរសៀលថ្ងៃទី២៣ ឧសភា
ខេត្តកំពង់ឆ្នាំង៖ សាលាដំបូងខេត្ត សម្រេចឃុំខ្លួនបុរសម្នាក់ដាក់ពន្ធនាគារ កាលពីរសៀលថ្ងៃទី២៣ ឧសភា ក្នុងបទចោទប្រកាន់ប្រើអំពើហិង្សា និងដុតផ្ទះខ្លួនឯង កាលពីយប់ថ្ងៃទី២២ ឧសភា ។
មន្ត្រីនគរបាលក្រុងកំពង់ឆ្នាំង បានឱ្យដឹងថា បុរសឈ្មោះ គ្រុយ យឿន អាយុ៥២ឆ្នាំ មានទីលំនៅ ភូមិទី៦ សង្កាត់ខ្សាម ក្រុងកំពង់ឆ្នាំង និងប្រពន្ធឈ្មោះ កិ អ៊ីម អាយុ៤៧ឆ្នាំ។ មុនពេលកើតហេតុ បុរសរូបនេះ ពេលត្រឡប់មកពីផឹកស៊ីស្រវឹងជោក ប្រពន្ធឃើញក៏រត់ទៅសម្ងំពួននៅផ្ទះម្តាយមីង ដោយសារខ្លាចប្តីវាយធ្វើបាប ព្រោះជារឿយៗឱ្យតែផឹកស្រវឹងម្តងៗរករឿងឈ្លោះ និងវាយធ្វើបាបប្រពន្ធកូន ។ ខណៈបុរសជាប្តីរូបនេះមកដល់ផ្ទះរកប្រពន្ធមិនឃើញ និងបើកឆ្នាំងបាយមិនឃើញមានបាយផងនោះ ក៏ខឹងច្រឡោត រួចក៏ស្ទុះទៅយកចង្កៀងប្រេងកាតចាក់លើជញ្ជាំផ្ទះស្លឹកដុតតែម្តង ។
ពេលភ្លើងកំពុងឆេះប្រពន្ធដែលសម្ងំពូននៅឯផ្ទះម្តាយមីងឃើញក៏ស្រែកឆោឡោឡើង ហើយអ្នកជិតខាងក៏នាំគ្នាទៅជួយពន្លត់ទាន់ពេល ។ ទោះបីជាយ៉ាងណាក្តី អគ្គិភ័យគ្រាន់តែឆេះអស់ជញ្ជាំងផ្ទះមួយចំហៀងតែប៉ុណ្ណោះ ។
ក្រោយពេលកើតហេតុ ស្ត្រីជាប្រពន្ធដាក់ពាក្យប្តឹងបុរសជាប្តី ក្នុងបទប្រើអំពើហិង្សក្នុងគ្រួសារ ទើបសមត្ថកិច្ចចាប់ឃាត់ខ្លួន និងកសាងសំណុំរឿងបញ្ជូនទៅសាលាដំបូងខេត្តតាមនីតិវិធី នៅទីបំផុតសាលាដំបូងខេត្តក៏សម្រេចឃុំខ្លួនជាបណ្តោះអាសន្ន ៕
ចែករំលែកព័តមាននេះ