រាជធានីភ្នំពេញ ៖ ការប្រកួតដ៏ស្វិតស្វាញនៅក្នុងព្រឹត្តិការណ៍ K-Cement កាលពីថ្ងៃសៅរ៍ ទី២៣ ឧសភា ម្សិលម្ង៉ៃ ធ្វើឱ្យអ្នកទស្សនាជក់ចិត្តទាំង៣គូតែម្ដងសម្រាប់ការប្រកួតសន្សំពិន្ទុរបស់គូ
រាជធានីភ្នំពេញ ៖ ការប្រកួតដ៏ស្វិតស្វាញនៅក្នុងព្រឹត្តិការណ៍ K-Cement កាលពីថ្ងៃសៅរ៍ ទី២៣ ឧសភា ម្សិលម្ង៉ៃ ធ្វើឱ្យអ្នកទស្សនាជក់ចិត្តទាំង៣គូតែម្ដងសម្រាប់ការប្រកួតសន្សំពិន្ទុរបស់គូប្រជែងដណ្ដើមយកខ្សែក្រវាត់ទាំង៦នាក់ ។ កីឡាករសូត្រ ប៊ុនធី បានក្លាយជាអ្នកស្គាល់ចាញ់គួរឱ្យភ្ញាក់ផ្អើលក្រោមដៃ ឃីម បូរ៉ា ខណៈដែលកីឡាករ៣រូបទៀត ក៏អាចកែប្រែជោគវាសនាខុសពីការគ្រោងទុកផ្ទុយពីការទស្សន៍ទាយនៅមុនប្រកួត ។
សម្រាប់គូប្រកួត ឃីម បូរ៉ា និង សូត្រ ប៊ុនធី មិនមានមនុស្សច្រើនប៉ុន្មានទេ ជឿថាកីឡាករដែលធ្លាប់ចាញ់កាលពីវគ្គ១រូបនេះនឹងឈ្នះគូសងសឹកដែលមានពិន្ទុលំដាប់កំពូលនៅ៣ប្រកួតក្នុងវគ្គ២ ។ កាលប៉ះគ្នាដំបូង សូត្រ ប៊ុនធី ធ្វើឱ្យ ឃីម បូរ៉ា ចាញ់ពិន្ទុយ៉ាងអាម៉ាស់ បើទោះជាក្នុងវគ្គនោះអ្នកទាំងពីរជាជើងខ្លាំងស្មើគ្នា។ កីឡាករសូត្រ ប៊ុនធី ស្គាល់ចាញ់តែម្ដងគត់ក្រោមដៃរបស់ មាស ច័ន្ទមាន ឬ សារឹម ង៉ា កាលពីវគ្គ១នោះ ។ គាប់ជួនជាជុំទី២ កីឡាកររូបនេះបើកឆាកឈ្នះ មាស ច័ន្ទមាន ដែលជាគូប្រជែងដ៏ខ្លាំងរបស់ខ្លួនធ្វើឱ្យគេមើលឃើញភាពខ្លាំងក្លាផង ទើបមានការប៉ាន់ស្មានភ្លាមថា កីឡាករ៤រូបផ្សេងទៀតមិនមែនជាដៃគូរបស់ សូត្រ ប៊ុនធី ឡើយ បូករួមទាំងការប៉ះគ្នាលើកទី២ ជាមួយ ឃីម បូរ៉ា នោះផង ។ អ្នកទស្សនាភាគច្រើនបានបង្ហាញការចាប់អារម្មណ៍ ដែលការប្រកួតសន្សំពិន្ទុក្នុងជុំទី៤ កាលពីរសៀលម្សិលម្ង៉ៃ កែប្រែជោគវាសនារបស់កីឡាករទាំងពីរ ដោយសូត្រ ប៊ុនធី គឺជាអ្នកចាញ់ ឃីម បូរ៉ា ម្ដង។ ឃីម បូរ៉ា ដែលមានមនុស្សមិនតិចគិតថា នឹងចាញ់ខុសពីពេលមុនបានបើកប្រវត្តិសាស្ត្រវាយសន្ធាប់យ៉ាងជក់ចិត្តទៅលើគូសងសឹក ហើយធ្វើឱ្យលទ្ធផលចុងក្រោយបានឈរចំណាត់ថ្នាក់កំពូលជាបណ្ដោះអាសន្នក្រោយចប់៤ប្រកួតនេះ ។ កាលពីវគ្គ១ ឃីម បូរ៉ា មានសំណាងបានអង្គុយត្រឹមកៅអីលេខរៀងទី៣ប៉ុណ្ណោះ ដោយ មាស ច័ន្ទមាន ឈរចំណាត់ថ្នាក់លេខ១ និង សូត្រ ប៊ុនធី ឈរលេខ២ ។ ប៉ុន្តែសម្រាប់វគ្គនេះទំនងជា ឃីម បូរ៉ា នឹងឈរលេខមួយហើយ បើទោះជានៅសល់មួយប្រកួតម្នាក់នៅ២សប្ដាហ៍ក្រោយ ។ លទ្ធផលកាលពីជុំទី៤នោះ មិនត្រឹមតែធ្វើឱ្យកីឡាករទាំងពីរផ្លាស់ប្ដូរកៅអីគ្នាអង្គុយប៉ុណ្ណោះទេ ប៉ុន្តែជោគវាសនារបស់កីឡាករផ្សេងទៀតត្រូវកែប្រែផងដែរ ពិសេសគឺកីឡាករថុល មករា និងលាស់ យីន ដែលជាគូប្រកួតក្នុងជុំផ្ដាច់ព្រ័ត្ររបស់អ្នកទាំងពីរ ។
យោងតាមការវិភាគ នៅជុំចុងក្រោយកីឡាករឃីម បូរ៉ា ពិតជាបើកដៃឱ្យ ថុល មករា យកឈ្នះដើម្បីទម្លាក់ មាស ច័ន្ទមាន ប៉ុន្តែផ្អែកតាមលទ្ធផលដែលបានបញ្ចប់កាលពីថ្ងៃម្សិលម្ង៉ៃ ស្ថានភាពនោះមិនអាចកើតឡើងទៀតទេ ដូចគ្នាដែរកីឡាករលាស់ យីន ដែលពិតជាប្រឹងយកឈ្នះ សូត្រ ប៊ុនធី ឱ្យបានដាច់ខាត ក៏លែងខ្វល់ពីការស្ទុះស្ទាទៀតដែរ ។ នោះគឺដោយសារកីឡាករលាស់ យីន បានយកឈ្នះកីឡាករឱម សំរេច ធ្វើឱ្យគេដណ្ដើមបានជ័យជម្នះ៣ប្រកួត ក្នុងចំណោម៤ប្រកួត ហើយបានឡើងដោយស្វ័យប្រវត្តិ ដែលមានន័យថា ទោះជាការប្រកួតជាមួយ សូត្រ ប៊ុនធី មានលទ្ធផលដូចម្ដេច ក៏គ្មានបញ្ហា ។ មិនខុសគ្នាដែរ កីឡាករមាសច័ន្ទមាន ដ្បិតថាទើបតែឈ្នះ ថុល មករា ក្នុងចំណោម៤ប្រកួត ប៉ុន្តែលទ្ធភាពដែលផ្ដួលថុល មករា ក្នុងទឹកទី២ កាលពីម្សិលម្ង៉ៃ ក៏ធ្វើឱ្យគេបានឡើងដោយស្វ័យប្រវត្តិផងដែរ ។ នោះគឺដោយសារតែក្នុងជុំចុងក្រោយ គេត្រូវប្រកួតជាមួយកីឡាករឱម សំរេច ដែលធ្លាក់ដោយស្វ័យប្រវត្តិ និងជាកីឡាករមិនមានសមត្ថភាពក្នុងចំណោម៦រូបដែលមានឱកាសឡើងមកកាន់វគ្គ២នេះ ។ បើគ្មាន២នាក់ក្នុងវគ្គ១ បោះបង់ការប្រកួត និងមានរបួសប្រកួតមិនបាន ឱម សំរេច ត្រូវគេមើលឃើញជ្រុះតាំងពីមុនគេម្ល៉េះ ។ ត្រង់ហ្នឹងហើយដែលការប៉ះគ្នាជាមួយ មាស ច័ន្ទមាន គឺពិតជា ឱម សំរេច មិនប្ដូរឈឺសាច់នោះឡើយ ពិតជាលែងវាយក្នុងទឹកណាមួយដោយសំអាងថា ខ្លួនទៅមិនរួចជាមួយ មាស ច័ន្ទមានផង ។ បើការប្រកួតកាលពីម្សិលម្ង៉ៃ ថុល មករា ចាញ់ត្រឹមពិន្ទុនោះ ឃីម បូរ៉ា នឹងបើកដៃឱ្យ ថុល មករា វាយសន្លប់ក្នុងទឹកណាមួយដើម្បីទម្លាក់មាស ច័ន្ទមាន ។ ប៉ុន្តែដល់ពេល ថុល មករា ជាអ្នកសន្លប់ក្នុងទឹកទី២បែបនេះ គឺទោះជា ឃីម បូរ៉ា យល់ព្រមធ្វើសន្លប់ក្នុងទឹកទី២ ក៏ ថុល មករា មិនបានឡើងនោះដែរដោយសារមាស ច័ន្ទមាន ដែលឈ្នះ ឱម សំរេច គឺពិតជាឈ្នះដោយវាយឱ្យសន្លប់ដែលមានន័យថា នឹងមានក្រេឌីតល្អជាង ថុល មករា បើទោះជាអ្នកទាំងពីរស្គាល់ឈ្នះ២ម្នាក់ដូចគ្នា ។ ដូច្នេះមានន័យថា ថុល មករា នឹងធ្លាក់ដោយស្វ័យប្រវត្តិ ដោយសារតែឃីម បូរ៉ា មិនអាចបើកដៃឱ្យឈ្នះទៀតទេ គឺមានតែផ្ដួលឱ្យឈ្នះដើម្បីយកក្រេឌីតឈរលេខ១វិញ ដោយសារតែទោះឱ្យឈ្នះក៏ឡើងទៅវគ្គពាក់កណ្ដាលផ្ដាច់ព្រ័ត្រមិនរួច ។
អ្នកតាមដានព្រឹត្តិការណ៍ប្រដាល់នេះសុទ្ធតែមើលឃើញថា ការប្រកួតកាលពីម្សិលម្ង៉ៃបានកែប្រែជោគវាសនារបស់កីឡាករទាំងនេះស្ទើរទាំងអស់ខុសពីការទស្សន៍ទាយ ។ ឃីម បូរ៉ា ដែលត្រូវគេគិតដូចគ្នាថា នឹងពិបាកឈ្នះ សូត្រ ប៊ុនធី បានក្លាយជាអ្នកឈរចំណាត់ថ្នាក់លេខ១ក្នុងពូល ។ កីឡាករលាស់ យីន ដែលគេបារម្ភថា បើភ្លាត់ចាញ់ ឱម សំរេច នឹងត្រូវប្រទាញប្រទង់ជាមួយកីឡាករដែលមានពិន្ទុស្មើដែលអាចប្រឈមធ្លាក់ ក៏បានឡើងដោយស្វ័យប្រវត្តិ ។ កីឡាករមាស ច័ន្ទមាន ដែលមនុស្សភាគច្រើនអ្នកណាក៏ថា នឹងធ្លាក់បើចាញ់ថុល មករា ឬត្រឹមឈ្នះ ថុល មករា ដោយពិន្ទុ បែរជាមានសំណាង ។ រីឯកីឡាករថុល មករា ដែលមានការប៉ាន់ស្មានថា នឹងត្រូវ ឃីម បូរ៉ា បើកដៃឱ្យឈ្នះដើម្បីទម្លាក់ មាស ច័ន្ទមាន ក៏ត្រូវ ឃីម បូរ៉ា ប្ដូរចិត្តលែងជួយ ដោយសារតែជួយក៏ទៅមិនរួច ។ សរុបមក ទោះជាការប្រកួតទាំងមូលនៅមួយជុំចុងក្រោយ ក៏ព្រឹត្តិការណ៍នេះ ធ្វើឱ្យគេមើលឃើញបាត់ទៅហើយថា ឃីម បូរ៉ា នឹងឈរចំណាត់ថ្នាក់លេខ១ សូត្រ ប៊ុនធី បានត្រឹមចំណាត់ថ្នាក់លេខ២ លាស់ យីន នឹងឈរចំណាត់លេខ៣ និង មាស ច័ន្ទមាន នឹងបានឡើងជាន់ពន្លិច ថុល មករា ដោយមិនពិបាក ដើម្បីបន្តឱកាសទៅកាន់វគ្គបន្ទាប់ ៕
ចែករំលែកព័តមាននេះ