ខេត្តកំពង់ស្ពឺ ៖ យ៉ាងហោចណាស់មនុស្សម្នាក់ស្លាប់ និង៣នាក់ទៀតរបួសធ្ងន់-ស្រាលក្នុងហេតុការណ៍គ្រោះថ្នាក់ចរាចរណ៍ជិះម៉ូតូបុករថយន្ត ដែលកើតឡើងកាលពីវេលាម៉ោង៩ និង៥៥នាទីយប់ ថ្ងៃទី២៣ ឧសភា ២០១៥ នៅតាមបណ្តោយផ្លូវជាតិលេខ៤ចន្លោះគីឡូម៉ែត្រលេខ៤៦-៤៧ ស្ថិតក្នុងភូមិសំណង់ សង្កាត់រកាធំ ក្រុងច្បារមន។
ជនរងគ្រោះដែលស្លាប់ឈ្មោះឌឿន បេះ ភេទប្រុស អាយុ១៨ឆ្នាំ ចំណែកអ្នករងរបួស ១-ឈ្មោះស៊ឹម វុទ្ធី ភេទប្រុស អាយុ១៧ឆ្នាំ, ២-ឈ្មោះកៅ ថន ភេទប្រុស អាយុ១៨ឆ្នាំ និង៣-ឈ្មោះខឹម ថន ភេទប្រុស អាយុ១៨ឆ្នាំ ។ អ្នកទាំង៤រស់នៅភូមិព្រៃក្បុង ឃុំព្រៃក្មេង ស្រុកភ្នំស្រួច ។
តាមការរៀបរាប់ពីឈ្មោះស៊ឹម វុទ្ធី បានឱ្យដឹងថា មុនពេលកើតហេតុពួកគេជិះម៉ុតូមួយគ្រឿងម៉ាកនិច ពណ៌ខៀវ អត់ស្លាកលេខធ្វើដំណើរពីចោមចៅក្នុងបំណងទៅផ្ទះ លុះពេលមកដល់ចំណុចកើតហេតុស្រាប់តែម៉ូតូបានរេចង្កូតចូលទៅខាងផ្លូវរថយន្តម្ខាងទៀតក៏ត្រូវរថយន្តបុកកិនបណ្តាលឱ្យឈ្មោះឌឿន បេះ ស្លាប់ភ្លាមៗនៅនឹងកន្លែង ចំណែករូបគេ និង២នាក់ត្រូវរថយន្តមន្ទីរពេទ្យបង្អែកខេត្តដឹកទៅសង្គ្រោះភ្លាមៗដែរ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ