រាជធានីភ្នំពេញ ៖ បុរសអ្នករត់ម៉ូតូឌុបម្នាក់បានស្លាប់ភ្លាមៗនៅនឹងកន្លែងកើតហេតុ ខណៈពេលកំពុងតែបើកម៉ូតូម្នាក់ឯងចុះពីស្ពានព្រះមុនីវង្សចាស់ ត្រូវរថយន្តដឹកទឹកកកមួយគ្រឿងបើកមកបុកពីក្រោយពេញទំហឹង កាលពីវេលាម៉ោង៥ និង៤៥នាទីព្រឹក ថ្ងៃទី២៣ ឧសភា ២០១៥ នៅចំណុចខាងក្រោមស្ពានអាកាសក្បាលថ្នល់ ផ្លូវព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន។
តាមប្រភពព័ត៌មានពីមន្ត្រីនគរបាលម្នាក់បានឱ្យដឹងថា បុរសរងគ្រោះមានឈ្មោះប៉ែន សឿន អាយុ៤៥ឆ្នាំ មានមុខរបរជាអ្នករត់ម៉ូតូឌុប ស្នាក់នៅផ្ទះជួលនៅក្នុងសង្កាត់ស្រះចក ខណ្ឌដូនពេញ មានស្រុកកំណើតនៅស្រុកតានី ខេត្តកំពត ។
ប្រភពដដែលបានឱ្យដឹងទៀតថា មុនពេលកើតហេតុទាំងរថយន្តបង្កជារថយន្តដឹកទឹកកករបស់ក្រុមហ៊ុនសេង ហ៊ី ម៉ាកហ៊ីយន់ដាយ ព៌ណស ពាក់ស្លាកលេខភ្នំពេញ៣B-៨៣០១ និងម៉ូតូរបស់បុរសរងគ្រោះម៉ាកស៊ុយហ្ស៊ុយគីស្មាស់ ពណ៌ខ្មៅ ពាក់ស្លាកលេខតាកែវ១G-០៨៣៤ បានធ្វើដំណើរស្របទិសគ្នាក្នុងទិសដៅពីកើតទៅលិចចុះពីស្ពានព្រះមុនីវង្សចាស់ លុះដល់កន្លែងកើតហេតុមិនដឹងយ៉ាម៉េចស្រាប់តែរថយន្តជ្រុលទៅបុកម៉ូតូពីក្រោយពេញទំហឹងបណ្តាលអ្នកបើកម៉ូតូស្លាប់ភ្លាមៗតែម្តង។
ក្រោយបង្កហេតុរួចអ្នកបើកបររថយន្តបានបើកទ្វាររថយន្តចុះរត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុ៕
ចែករំលែកព័តមាននេះ