តបតាមការអញ្ជើញរបស់លោក MASWADI BIN HAJI MOHSIN អគ្គនាយកនៃរដ្ឋបាលគយប្រទេសប៊្រុយណេ គណៈប្រតិភូអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ ដឹកនាំដោយលោកបណ្ឌិតគុណ ញឹម អគ្គនាយក
តបតាមការអញ្ជើញរបស់លោក MASWADI BIN HAJI MOHSIN អគ្គនាយកនៃរដ្ឋបាលគយប្រទេសប៊្រុយណេ គណៈប្រតិភូអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ ដឹកនាំដោយលោកបណ្ឌិតគុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានអញ្ជើញទៅចូលរួមកិច្ចប្រជុំអគ្គនាយកគយអាស៊ានលើកទី២៤ ដែលប្រព្រឹត្តទៅចាប់ពីថ្ងៃទី២០ ដល់ថ្ងៃទី២២ ខែឧសភា ឆ្នាំ២០១៥ នៅទីក្រុង BandarSeri Begawan ប្រទេសប៊្រុយណេ ដែលមានការចូលរួមពីថ្នាក់ដឹកនាំបណ្តារដ្ឋបាលគយប្រទេសអាស៊ានទាំងអស់ និងអគ្គលេខាធិការរងអាស៊ាន ។
កិច្ចប្រជុំអគ្គនាយកគយអាស៊ានលើកទី២៤ បានពិភាក្សា និងអនុម័តលើរបាយការណ៍វឌ្ឍនភាពសំខាន់ៗរបស់គណៈកម្មការសម្របសម្រួលគយអាស៊ាន គណៈកម្មការដឹកនាំបញ្ជរតែមួយអាស៊ាន ក្រុមការងារនីតិវិធីគយនិងសម្របសម្រួលពាណិជ្ជកម្ម ក្រុមការងារអនុវត្តច្បាប់គយនិងអនុលោមភាព និងក្រុមការងារកសាងសមត្ថភាពចំណេះដឹងពាក់ព័ន្ធនឹងការធ្វើសមាហរណកម្មគយនិងកិច្ចសម្រួលពាណិជ្ជកម្ម ដែលជាធាតុដ៏សំខាន់ដើម្បីសម្រេចបានសហគមន៍សេដ្ឋកិច្ចអាស៊ាន២០១៥ ។ ដើម្បីជម្រុញបន្ថែមទៀត កិច្ចសម្រួលពាណិជ្ជកម្មតំបន់និងពិភពលោក អង្គប្រជុំបានអនុម័តផែនការយុទ្ធសាស្ត្រអភិវឌ្ឍន៍គយ ២០១៦-២០២០ ចំនួន១៤ផែនការយុទ្ធសាស្ត្រ ដែលផ្តោតទៅលើនីតិវិធីគយ ការអភិវឌ្ឍធនធានមនុស្ស និងភាពជាដៃគូជាមួយផ្នែកឯកជន ។
កិច្ចប្រជុំអគ្គនាយកដ្ឋានគយអាស៊ានលើកទី២៤ ក៏បានប្រជុំពិគ្រោះយោបល់ជាមួយថ្នាក់ដឹកនាំរដ្ឋបាលគយចិន ជប៉ុន កូរ៉េ និងផ្នែកឯកជន ដើម្បីពិនិត្យវឌ្ឍនភាពនៃកិច្ចសហប្រតិបត្តិការ ព្រមទាំងពិភាក្សាពីការផ្តល់ជំនួយបច្ចេកទេសផងដែរ ។ ទន្ទឹមនឹងនេះ អង្គប្រជុំបានឯកភាពជ្រើសតាំងលោកបណ្ឌិត គុណ ញឹម ជាសហប្រធាននៃកិច្ចប្រជុំពិគ្រោះយល់រវាងអគ្គនាយកគយអាស៊ាន និងក្រុមប្រឹក្សាធុរៈកិច្ចអាស៊ាន-សហរដ្ឋអាេមរិកលើកទី១៨ ។
ក្នុងបរិបទកិច្ចសម្រួលពាណិជ្ជកម្ម និងកាតពកិច្ចរបស់គយកម្ពុជានៅក្នុងសហគមន៍សេដ្ឋកិច្ចអាស៊ាន អគ្គនាយកដ្ឋានគយ និងរដ្ឋាករកម្ពុជាទទួលបាននូវជោគជ័យដូចជា ទំនើបកម្មច្បាប់និងបទបញ្ញត្តិគយ ការប្រមូលចំណូលកើនឡើង និងនីតិវិធីគយស្របតាមស្តង់ដាអន្តរជាតិ ។ ក្នុងបរិបទនេះ សន្ទស្សន៍លទ្ធផលដឹកជញ្ជូនទំនិញ (LPI) របស់កម្ពុជាមានភាពប្រសើរឡើងពីលេខរៀង១២៩ មកលេខរៀង៨៣ នៅឆ្នាំ២០១៤ ។
អនុលោមតាមលំដាប់អក្សរក្រម កម្ពុជានឹងទទួលរៀបចំ និងជាប្រធានកិច្ចប្រជុំអគ្គនាយកគយអាស៊ានលើកទី២៥នៅឆ្នាំ២០១៦ ៕
ចែករំលែកព័តមាននេះ