ខេត្តស្វាយរៀង ៖ ផ្ទះក្បឿងមួយខ្នងនៅភូមិព្រៃរកា ឃុំឈើទាល ស្រុកស្វាយជ្រំ ត្រូវអគ្គិភ័យឆេះអស់ទាំងស្រុង និងបណ្តាលឱ្យក្មេងស្រីអាយុ៧ឆ្នាំម្នាក់ស្លាប់យ៉ាងអាណោចអាធ័ម កាលពីវេលាម៉ោង១២ និង៣០នាទីរំលងអាធ្រាតថ្ងៃទី២២ ឧសភា ឈានចូលថ្ងៃទី២៣ ឧសភា ២០១៥ ។
បើតាមមន្ត្រីនគរបាលឃុំឈើទាលបានឱ្យដឹងថា ជនរងគ្រោះជាម្ចាស់ផ្ទះឈ្មោះមាស ទ្រី ភេទប្រុស អាយុ៥៥ឆ្នាំ មុខរបររត់តាក់ស៊ី មានប្រពន្ធឈ្មោះវ៉ឹង ធី អាយុ៤៩ឆ្នាំ មានកូន៥នាក់ ហើយចៅដែលស្លាប់ឈ្មោះគឹម ចាន់ថន ភេទស្រី អាយុ៧ឆ្នាំ ឆេះរួញខ្លោចទៅជាធ្យូង។
ប្រភពបានឱ្យដឹងថា ទ្រព្យសម្បត្តិដែលបាត់បង់ដោយសារអគ្គិភ័យ មានរថយន្ត២គ្រឿង ម៉ូតូ១គ្រឿង ស្រូវមួយ ជង្រុកមាស៥ដំឡឹង ប្រាក់៣លានរៀល ប្រាក់ដុល្លា១ពាន់ដុល្លារ ទូរទស្សន៍២១អ៊ីង២គ្រឿង និងអង្ករ៣តៅ ស្រូវ២០០តៅ និងសម្ភារប្រើប្រាស់មួយចំនួនទៀត។
បើតាមជនរងគ្រោះឈ្មោះមាស ទ្រី បានឲ្យដឹងថា កន្លងមករូបគាត់ដេកនៅក្រោមផ្ទះយាមរថយន្ត ហើយនៅយប់ថ្ងៃកើតហេតុរូបគាត់បានទៅដេកយាមផ្ទះឲ្យកូននៅភូមិតារាក់ ឃុំឈើទាលខាងជើងផ្ទះចម្ងាយប្រមាណ៣គីឡូម៉ែត្រ ដោយទុកកូនស្រីពៅឈ្មោះលឹម ស្រីពៅ អាយុ១៥ឆ្នាំ ដេកចាំផ្ទះជាមួយក្មួយស្រីឈ្មោះគឹម ចាន់ថន អាយុ៧ឆ្នាំ ដេកជាមួយ គាត់មិននឹកស្មានថា មានគ្រោះអាក្រក់បែបនេះទេ រូបគាត់សង្ស័យថា មានមនុស្សលួចដុតផ្ទះរបស់គាត់ច្រើនជាងទុស្សេខ្សែភ្លើង។
ជនរងគ្រោះបន្តទៀតថា ភ្លើងឆេះចេញពីរថយន្តនៅក្រោមផ្ទះ ដូច្នេះពុំមានខ្សែភ្លើងទេ ហើយកន្លងមកគាត់ដេកក្រោមផ្ទះ ពេលគាត់មិននៅ ចៅចូលដេកជំនួស រីឯកូនស្រីពៅអាយុ១៥ឆ្នាំឡើងដេកនៅលើផ្ទះពេលឆេះផ្ទះនាងរត់មកតាមជណ្តើមុខ តែភ្លើងឆេះរថយន្តនៅជាប់ជណ្តើរក៏រត់ទៅក្រោយលោតចេញតាមបង្អួចធ្លាក់មកទល់ផ្អកបានអ្នកស្រុកមកជួយ។
ជនរងគ្រោះសូមអំពាវនាវដល់អាជ្ញាធរ និងសមត្ថកិច្ចជួយអង្កេតស្រាវជ្រាវជាថ្មីដើម្បីរកការពិត ព្រោះសង្ស័យមានមនុស្សលួចចាក់សាំងដុតរថយន្តបណ្តាលឲ្យឆាបឆេះផ្ទះ និងស្លាប់ចៅស្រីរបស់គាត់ ហើយផ្ទះជនរងគ្រោះឈ្មោះខឹម វន់ ភេទប្រុស អាយុ៤២ឆ្នាំ នៅជាប់គ្នាឆេះអស់មួយចំហៀងត្រូវរថយន្តពន្លត់អគ្គិភ័យមកជួយពន្លត់បានជោគជ័យ ហើយផ្ទះជនរងគ្រោះឈ្មោះសួន អ៊ា ភេទស្រី អាយុ៥១ឆ្នាំ ប្រជាពលរដ្ឋនាំគ្នារុះជញ្ជាំងចេញ ហើយរថយន្តពន្លត់អគ្គិភយ័បាញ់ទឹកការពារ ទើបរួចផុតពីអគ្គិភ័យនេះ។
ទាក់ទិនអគ្គីភយ័នេះដែរសមត្ថកិច្ចធ្វើការសន្និដ្ឋានជំហានដំបូងថា ដោយសារទុស្សេខ្សែភ្លើង ហើយនឹងបន្តធ្វើការស៊ើបអង្កេតបន្ត។ នៅព្រឹកថ្ងៃទី២៣ ឧសភា វេលាម៉ោង១០ និង៣០នាទីព្រឹក លោកជំទាវបណ្ឌិតម៉ែនសំអន បានអញ្ជើញចូលរួមរំលែកទុក្ខក្រុមគ្រួសារជនរងគ្រោះផងដែរ ដោយលោកជំទាវបានឧបត្ថម្ភថវិកា២លានរៀល អង្ករ១០០គីឡូក្រាម និងសម្ភារមួយចំនួនផងដែរ។ រីឯអាជ្ញាធរស្រុកឃុំក៏បានជួយធ្វើបុណ្យសពកុមារីរងគ្រោះតាមប្រពៃណីនៅមុខផ្ទះឆេះតែម្តង៕
ចែករំលែកព័តមាននេះ