ខេត្តកំពង់ធំ ៖ មនុស្សប្រុស ស្រី ៣នាក់ និងត្រាក់ទ័រ២គ្រឿងត្រូវបានកំលាំងសមត្ថកិច្ចជលផលស្រុកបារាយណ៍សហការជាមួយផ្នែកសឹករងស្រុក នគរបាល និងអាវុធហត្ថស្រុក ឃាត់ចាប់ខ្លួនបានកាលពីថ្ងៃទី២១ ឧសភា ២០១៥ បន្ទាប់ពីពួកគេបានធ្វើសកម្មភាព កាប់រាន ឈូសឆាយ និងហ៊ុមព័ទ្ធកាន់កាប់ដីព្រៃតំបន់៣ នៅតំបន់វាលក្រោម ភូមិសាស្ត្រឃុំស្រឡៅ ស្រុកបារាយណ៍ ។
ពាក់ព័ន្ធករណីខាងលើមន្ត្រីជំនាញបានឲ្យដឹងថា ជនសង្ស័យជាម្ចាស់គ្រឿងចក្រ និងម្ចាស់ដី បានធ្វើសកម្មភាពកាប់រាន ឈូសឆាយ និងហ៊ុមព័ទ្ធកាន់កាប់ដីព្រៃតំបន់៣ នៅតំបន់វាលក្រោម ដែលជាតំបន់ហាម ឃាត់ ហើយពួកគេនាំគ្នាធ្វើសកម្មភាពនៅពេលយប់ទើបសមត្ថកិច្ចឃាត់ចាប់តែម្ដង។
ជុំវិញករណីឃាត់ចាប់គ្រឿងចក្រ និងមនុស្សខាងលើនេះ ប្រភពព័ត៌មានបានឲ្យដឹងថា បច្ចុប្បន្នសកម្មភាព កាប់រាន ឈូសឆាយ និងហ៊ុមព័ទ្ធកាន់កាប់ដីព្រៃតំបន់៣ និងតំបន់២ កំពុងកើតឡើងយ៉ាងអណាធិតេយ្យ មិនថាភូមិសាស្ត្រស្រុកបារាយណ៏ នៅមានភូមិសាស្ត្រស្រុកសន្ទុក ស្រុកកំពង់ស្វាយ ស្រុកស្ទោង និងក្រុងស្ទឹងសែន តែគេពុំសូវឃើញមានសមត្ថកិច្ចអើពើប៉ុន្មានឡើយ ជាក់ស្ដែងក្នុងព្រៃលិចទឹកក្នុងស្រុកកំពង់ស្វាយ និង ក្រុងស្ទឹងសែន ត្រូវបានគេកាប់រានទន្ទ្រានដោយគ្រឿងចក្រ និងកំលាំងពលកម្ម យ៉ាងអណាធិបតេយ្យ ហើយពុំសូវឃើញមានជំនាញចុះបង្គ្រាបឡើយ។
ដោយឡែកជនសង្ស័យទាំងបីនាក់ រួមជាមួយត្រាក់ទ័រ២គ្រឿងត្រូវបានប្រគល់ឲ្យលោកព្រះរាជអាជ្ញាហើយនៅថ្ងៃទី២២ ឧសភា ២០១៥ នេះ៕
ចែករំលែកព័តមាននេះ